اتوم ەنەرگەتيكاسى مەملەكەتتىڭ باقىلاۋى ارقىلى جۇزەگە اسىرىلادى

ءماجىلىستىڭ  ەكولوگيا ماسە­لەلەرى جانە تابيعاتتى پايدالانۋ كوميتەتىنىڭ ۇيىمداستىرۋىمەن “اتوم ەنەرگەتيكاسىن پايدالانۋ تۋرالى” زاڭ جوباسىنىڭ تانىستى­رىلىمى  كوميتەت توراعاسى ەرلان نىعماتۋليننىڭ جەتەكشىلىگىندە ءوتتى, دەپ حابارلادى وسى پالاتانىڭ ءباسپاسوز قىزمەتى. زاڭ جوباسىمەن دەپۋتاتتاردى يندۋستريا جانە جاڭا تەحنولو­گيالار ءمينيسترىنىڭ ورىنباسارى دۇيسەنباي تۇرعانوۆ تانىستىردى. “اتوم ەنەرگەتيكاسىن پايدالانۋ تۋرالى” زاڭ جوباسى ۇكىمەتتىڭ 2009 جىلعى 18 اقپانداعى №184 قاۋلىسىمەن بەكىتىلگەن. ول اتوم ەنەر­گياسىن بەيبىت ماقساتتا پايدالانۋ سالاسىنداعى قوعامدىق قاتىناستاردى رەتتەۋدىڭ قۇقىقتىق نەگىزىن بەلگىلەيدى  جانە ادامدار­دىڭ دەنساۋلىعى مەن ءومىرىن قور­عاۋعا ءارى يادرولىق جانە رادياتسيا­لىق قاۋىپسىزدىكتى قامتاماسىز ەتۋگە باعىتتالعان. زاڭ جوباسىن قابىلداۋدىڭ نەگىزگى ماقساتتارى – اتوم ەنەرگياسىن بەيبىت ماقساتتا پايدالانۋ كەزىندە جانە اتوم ەنەرگەتيكاسىنىڭ دامۋى جاعدايلارىندا حالىقتىڭ جانە قورشاعان ورتانىڭ قاۋىپسىزدىگى مەن دەنساۋلىعىنىڭ ءتيىمدى قور­عالۋىنىڭ لايىقتى قامتاماسىز ەتۋ; يادرولىق قىزمەتتىڭ قاۋىپسىز­دىگى جونىندەگى حالىقارالىق تالاپ­تارمەن ۇيلەستىرۋ. ۆيتسە-مينيس­تردىڭ مالىمدەۋىنشە, اتوم ەنەرگە­تيكاسى مەملەكەتتىك باقىلاۋ ارقىلى جۇزەگە اسىرىلادى. اتوم ستانسالارىن سالۋ دا مەملەكەتتىڭ قاداعالاۋىندا  بولادى. زاڭ جوباسى بويىنشا جۇمىس توبىنىڭ جەتەكشىسى دەپۋتات ۆالە­ري كوتوۆيچ, ال ونىڭ قۇرامىندا الەۋمەتتىك-مادەني دامۋ كوميتە­تىنەن قىلىشباي بيسەنوۆ, ەكونوميكالىق رەفورما جانە وڭىرلىك دامۋ كوميتەتىنەن ەرجان راحمەتوۆ, اگرارلىق ماسەلەلەر كوميتەتىنەن ەركىن رامازانوۆ, زاڭناما جانە سوت-قۇقىقتىق رە­فور­ما كوميتەتىنەن سەرىك تەمىر­بولاتوۆ, حالىقارالىق ىستەر, قورعانىس جانە قاۋىپسىزدىك كوميتە­تىنەن ۇسەنگەلدى مەدەۋوۆ, قارجى جانە بيۋدجەت كوميتەتىنەن قۇرمان­عالي ءۋالي سياقتى دەپۋتاتتار بار.