كەشە اقوردادا مەملەكەت باسشىسى نۇرسۇلتان نازارباەۆتىڭ «قازاقستان جولى–2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىنىڭ نەگىزگى باسىمدىقتارىن ءتۇسىندىرۋ جونىندەگى رەسپۋبليكالىق كەڭەستىڭ وتىرىسى ءوتتى.
كەشە اقوردادا مەملەكەت باسشىسى نۇرسۇلتان نازارباەۆتىڭ «قازاقستان جولى–2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىنىڭ نەگىزگى باسىمدىقتارىن ءتۇسىندىرۋ جونىندەگى رەسپۋبليكالىق كەڭەستىڭ وتىرىسى ءوتتى.
وعان قازاقستان پرەزيدەنتى اكىمشىلىگىنىڭ, ۇكىمەتتىڭ, پرەمەر-مينيستر كەڭسەسىنىڭ, پارلامەنت سەناتى مەن ءماجىلىسى اپپاراتتارىنىڭ, «نۇر وتان» پارتياسى ورتالىق اپپاراتىنىڭ وكىلدەرى, مينيسترلىكتەر مەن ۆەدومستۆولاردىڭ جاۋاپتى حاتشىلارى مەن مينيسترلەردىڭ ورىنباسارلارى, استانا, الماتى قالالارى اكىمدەرى مەن وبلىستار اكىمدەرىنىڭ ورىنباسارلارى مەن ىشكى ساياسات باسقارمالارىنىڭ باسشىلارى, ۇلتتىق جوو-لار مەن قوعامدىق بىرلەستىكتەر, زەرتتەۋ ينستيتۋتتارىنىڭ, باق-تاردىڭ باسشىلارى قاتىستى.
كەڭەس وتىرىسىن اشقان قازاقستان پرەزيدەنتى اكىمشىلىگى باسشىسىنىڭ ورىنباسارى ب.مايلىباەۆ بۇل جيىندا ەلباسى جولداۋىن ىسكە اسىرۋ اياسىنداعى رەسپۋبليكا اۋماعىندا اتقارىلاتىن اقپاراتتىق-ناسيحات جۇمىستارىنىڭ باسىم باعىتتارى تالقىلاناتىنىنا توقتالدى. ماسەلەن, ول: «وسىدان 10 كۇن بۇرىن ەلباسى ن.نازارباەۆ قازاقستان حالقىنا جولداۋىن جاريالادى. جولداۋدىڭ نەگىزگى ەرەكشەلىگى – ەلباسى قازاقستاندىقتاردىڭ ەڭ باستى ساۋالىنا جاۋاپ بەردى, ماڭگىلىك ەل – قازاقستان حالقىنىڭ ۇلتتىق يدەياسى ەكەنىن مالىمدەدى. حالىق ءماڭگىلىك ەلدى جۇرەگىنە وتە جاقىن, جىلى قابىلدادى. مىنە, سوندىقتان بۇل يدەيانى ءاربىر ازاماتتىڭ ساناسىنا سىڭىرۋگە ءتيىسپىز. ونى ءاربىر وتانداستىڭ باستى قۇندىلىعى ەتۋىمىز كەرەك. ۇلتتىق يدەيانىڭ توڭىرەگىنە توپتاسىپ, «قازاقستان-2050» ستراتەگياسىنىڭ ماقساتتارىنا ۇمتىلامىز. ەلباسى ايتقانداي, «قازاقستان-2050» ءماڭگىلىك ەلگە باستايتىن ەڭ ابىرويلى, ەڭ مارتەبەلى جول. بيىلعى جولداۋ «قازاقستان-2050» ستراتەگياسىنىڭ بيىك ماقساتتارىنا باستايتىن العاشقى ساتى», دەي كەلە, مەملەكەت باسشىسىنىڭ تاپسىرماسى بويىنشا, قازاقستاننىڭ الەمدەگى اسا دامىعان 30 ەلدىڭ قاتارىنا قوسىلۋ تۇجىرىمداماسى دايىندالعانىن, دەمەك, ءارى قارايعى ارەكەتتەر جولداۋ مەن تۇجىرىمداما اياسىندا ءوربيتىنىن اتاپ ءوتتى.
سونداي-اق, ب.مايلىباەۆ ەلباسىنىڭ ۇكىمەتكە ناقتى تاپسىرمالار جۇكتەگەنىن, ول تاپسىرمالار پرەزيدەنت اكىمشىلىگىنىڭ تىكەلەي باقىلاۋىندا ەكەنىن, سول سەبەپتى ءاربىر تاپسىرمانىڭ مۇقيات جانە ۋاقتىلى ورىندالۋى ماڭىزدى ەكەنىن جەتكىزدى. «ەلباسىنىڭ جولداۋىن ناسيحاتتاۋ باعىتىندا قازىر دە بىرقاتار شارالار اتقارىلدى. بىرىنشىدەن, جولداۋدى جۇزەگە اسىرۋ جونىندەگى جالپىۇلتتىق جوسپار بەكىتىلدى. ەكىنشىدەن, جولداۋدى اقپاراتتىق قولداۋدىڭ ارنايى ءىس-شارالار جوسپارى جاسالدى. ۇشىنشىدەن, 2014 جىلعا ارنالعان اقپاراتتىق ستراتەگيانىڭ جوباسى دايىن»,– دەدى باعلان اساۋباي ۇلى.
ول ءوز سوزىندە بۇگىندە اقپاراتتىق-ناسيحاتتىق جۇمىستاردىڭ ورتاق الگوريتمى جاسالعانىن, ول جۇمىستارعا 16 رەسپۋبليكالىق, 3 مىڭنان استام وڭىرلىك اقپاراتتىق توپ قاتىستىرىلعانىن اتاپ ءوتتى. «بۇعان قوسا, 3 اقپاراتتىق تولقىن ۇيىمداستىرىلاتىن بولادى. ءبىرىنشى اقپاراتتىق تولقىن بيىلعى جىلدىڭ 1 ناۋرىزىنا دەيىن جۇزەگە اسىرىلادى. بۇل جۇمىستار قازىردىڭ وزىندە باستالىپ كەتتى. ونىڭ نەگىزىندە تانىسۋ جۇمىستارى جاتىر. ەكىنشى تولقىن 1 ناۋرىز بەن 1 قىركۇيەك ارالىعىن قامتيدى. بۇل كەزەڭ جولداۋدىڭ ءاربىر باسىمدىعىن جۇزەگە اسىرۋ جونىندەگى اقپاراتتىق-ناسيحاتتىق جۇمىستارعا ارنالۋى ءتيىس. ال ءۇشىنشى تولقىن 1 قىركۇيەكتە باستالىپ, جىلدىڭ اياعىنا دەيىن جالعاسادى. بۇل كەزەڭدە ەلباسى جولداۋىندا ايتىلعان ماقسات-مىندەتتەردى جۇزەگە اسىرۋ جۇمىستارى قالاي ءجۇرگىزىلگەندىگى تۋرالى جىلدىق ەسەپ قورىتىندىلانادى», دەدى ب.مايلىباەۆ.
كەڭەس بارىسىندا «نۇر وتان» پارتياسى توراعاسىنىڭ ءبىرىنشى ورىنباسارى ب.بايبەك, قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىنىڭ ديرەكتورى ە.باباقۇماروۆ, ءبىلىم جانە عىلىم ءمينيسترى ا.ءسارىنجىپوۆ, ەڭبەك جانە حالىقتى الەۋمەتتىك قورعاۋ ءمينيسترى ت.دۇيسەنوۆا, الماتى قالاسى اكىمىنىڭ ورىنباسارى ز.امانجولوۆا ءسوز سويلەدى.
كەڭەس قورىتىندىسى بويىنشا قاتىسۋشىلارعا ناقتى تاپسىرمالار مەن ۇسىنىمدامالار بەرىلدى.
ءلايلا ەدىلقىزى,
«ەگەمەن قازاقستان».
––––––––––––––
سۋرەتتى تۇسىرگەن
يگور بۋرگاندينوۆ.
