«ماقتاارال-4011» ماقتا سورتىن 5 گەكتار جەرگە ەككەن قوجالىق ءبىرىنشى تەرىمنىڭ وزىندە 25 تسەنتنەردەن ءونىم الدى. ماقتانىڭ ءاربىر كيلوسىن 30 تەڭگەدەن جەرگىلىكتى اۋىل تۇرعىندارى تەرۋدە. قوجالىق باسشىسى قانات ايبوتاەۆتىڭ ايتۋىنشا, جينالعان ءونىم «Cotton-ماقتا» جشس ماقتا وڭدەۋ زاۋىتىنا وتكىزىلەدى.
«اۋدان بويىنشا 3 مىڭ گەكتاردان استام ماقتالىق القاپقا دەفولياتسيا جۇمىستارى جۇرگىزىلگەن. ماقتا جيناۋ تەحنيكالارى, ماقتا زاۋىتتارى مەن قابىلداۋ بەكەتتەرى تولىق دايىن تۇر. كۇزگى جيىن-تەرىم ناۋقانىن ءساتتى وتكىزۋ – ءبارىمىزدىڭ ورتاق مىندەتىمىز», دەيدى اۋداننىڭ اۋىل شارۋاشىلىعى ءبولىمىنىڭ باسشىسى بايازيت الىمقۇل.
اۋدانداعى ماقتا تەرىم ناۋقانى ءۇشىن 567 تراكتور, 850 دانا تىركەمە جانە 162 دانا ماقتا تەرىم ماشيناسى دايىندالعان. جوسپار بويىنشا ماقتانىڭ 70 پايىزى تەحنيكانىڭ كۇشىمەن تەرىلەدى. اۋداندا 8 ماقتا وڭدەيتىن زاۋىت پەن 64 ماقتا قابىلداۋ بەكەتى جۇمىس ىستەيدى. ال شارۋالارعا كومەك رەتىندە مەملەكەت تاراپىنان جەڭىلدەتىلگەن باعامەن ءتيىستى دەڭگەيدە جانار-جاعارماي بوساتىلۋدا.
سونداي-اق جەتىساي اۋدانىنىڭ شارۋالارى دا ماقتا تەرىمىن باستادى. شارۋالار بيىل «اق التىننىڭ» ونىمدىلىگى جاقسى بولعانىن ايتادى. ماقتا شارۋاشىلىعىمەن تۇراقتى اينالىساتىن شارۋانىڭ ءبىرى – شولپانقۇدىق ەلدى مەكەنىندەگى «نۇرعيسا» شارۋا قوجالىعى بيىل 5 گەكتار جەرگە ماقتا تۇقىمىن سەپكەن.
«اۋىل تۇرعىندارى ماقتانىڭ ءاربىر كيلوسىن 20 تەڭگەدەن تەرۋدە. ماقتا وزگە داقىلدار سياقتى 2-3 ايدا ءونىم بەرمەيدى. ۇزاق ۋاقىت پىسەتىن بولعاندىقتان كۇتىمدى دە كوپ جاسايمىز. وسىنداي بەينەتى كوپ شارۋاشىلىققا قولايلى جاعداي جاساپ, سۋ ماسەلەسىن شەشىپ بەرگەن اۋدان باسشىلارىنا العىستان باسقا ايتارىمىز جوق. ەگىستىك القاپتى ۋاقىتىلى سۋعارىپ وتىردىق. ءونىم ازىرگە جامان ەمەس. باستىسى ماقتا باعاسى جوعارى بولىپ, شارۋالاردىڭ ەڭبەگى جانسا ەكەن», دەيدى قوجالىق توراعاسى نۇرعيسا سەيىلبەكوۆ.
ايتا كەتەلىك, بيىل جەتىساي اۋدانىندا 44 مىڭ گەكتاردان استام جەرگە ماقتا ەگىلگەن. ماقتا جيناۋ ناۋقانىنا 200-دەن استام كومباين دايىندالعان.
تۇركىستان وبلىسى
