قوعام • 07 قىركۇيەك، 2021

كولىك پوليتسەيلەرى پوەزد جولاۋشىسىن اكىمشىلىك جاۋاپكەرشىلىككە تارتتى

اعىمداعى جىلدىڭ سەگىز ايىندا قر ءىىم كولىكتەگى پوليتسيا دەپارتامەنتىندە پوەزدىڭ توقتاتۋ كرانىن ج ۇلىپ الۋدىڭ 27 فاكتىسى تىركەلدى. بۇل تۋرالى دەپارتامەنت باستىعى وڭال بەكەەۆ ايتتى، دەپ جازادى Egemen.kz.

مەرەي قاينار ۇلى

«ماسەلەن، اعىمداعى جىلدىڭ 5 قىركۇيەگىندە جامبىل وبلىسىنىڭ «بۋرىلبايتال-قاراساي» ارالىعىندا توقتاتۋ كرانىن قولدانۋىنا بايلانىستى «نۇر-سۇلتان-نۇرلى-جول – الماتى-2» باعىتىنداعى جولاۋشىلار پوەزدى توقتاعان. پوەزدىڭ جوسپارلانباعان تۇراعى 4 مينۋتتى قۇرادى.

تەكسەرۋ بارىسىندا كولىك پوليتسەيلەرى زاڭعا قايشى ارەكەت جاساعان جولاۋشىنى انىقتادى. ول تۇركىستان وبلىسىنىڭ 42 جاستاعى تۇرعىنى بولىپ شىقتى. ءتارتىپ ساقشىلارى جوعارىدا اتالعان ازاماتتىڭ سپيرتتىك ىشىمدىك ءىشىپ، ماس كۇيىندە توقتاتۋ كرانىن ج ۇلىپ العانىن انىقتادى»، دەدى و.بەكەەۆ.

مەديتسينالىق كۋالاندىرۋدىڭ قورىتىندىسىنا سايكەس، ونىڭ «ورتاشا دارەجەدەگى» الكوگولدىك ماساڭ كۇيدە بولعانى انىقتالدى.

دەپارتامەنت باستىعىنىڭ ايتۋىنشا، توقتاتۋ كرانى تەك ەرەكشە جاعدايلاردا عانا قولدانىلادى. اتاپ ايتقاندا ۆاگوندا جولاۋشىلاردىڭ ومىرىنە نەمەسە قوزعالىس قاۋىپسىزدىگىنە قاۋىپ توندىرەتىن اقاۋ شىققان كەزدە، پويىز كوپىردە نەمەسە كوپىردىڭ استىندا جانە جولاۋشىلاردى ەۆاكۋاتسيالاۋعا جول بەرمەيتىن باسقا دا جەرلەردە تۇرىپ قالعان جاعدايدى ەسەپتەمەگەندە، ءورت شىققان جاعدايدا عانا پايدالانۋعا رۇقسات ەتىلەدى.

«كولىك ساقشىلارى قۇقىق بۇزۋشىنى پويىزدان ءتۇسىرىپ، قر اقبتك-ءنىڭ 440-بابىنىڭ 1-بولىگى، ياعني الكوگولدىك ىشىمدىك ءىشۋ نەمەسە قوعامدىق ورىندارعا ماساڭ كۇيدە كەلۋ جانە 560-بابىنىڭ 1-بولىگى، ياعني قاجەتسiز رەتتە پوەزدى زاڭسىز توقتاتۋ بويىنشا اكىمشىلىك حاتتامالار تولتىردى»، دەپ تۇيىندەدى ءسوزىن و.بەكەەۆ.

«اعىمداعى جىل باسىنان بەرى ءارتۇرلى اكىمشىلىك قۇقىق بۇزۋشىلىق جاساعانى ءۇشىن كولىك پوليتسەيلەرى - 30 667 قۇقىق بۇزۋشىنى، ونىڭ ىشىندە الكوگولدى ىشىمدىكتەردى ىشكەنى نەمەسە قوعامدىق ورىندارعا ماس كۇيىندە كەلگەنى ءۇشىن 3 186 ازاماتتى اكىمشىلىك جاۋاپكەرشىلىككە تارتتى. سونداي-اق، توقتاتۋ كرانىن ج ۇلىپ الۋدىڭ 27 جاعدايى تىركەلدى»، دەپ تولىقتىردى ءسوزىن پوليتسيا گەنەرال-مايور.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز