ولجاس بەكتەنوۆ مالىمدەگەندەي, 2021 جىلدىڭ ماۋسىم ايىنان باستاپ پرەزيدەنتتىڭ تاپسىرماسىنا سايكەس سىبايلاس جەمقورلىققا قارسى قىزمەت اگروونەركاسىپتىك كەشەندەگى سۋبسيديالاۋ سالاسىنا اۋقىمدى تالداۋ جۇرگىزۋدە.
ونىڭ ماقساتى - سۋبسيديالار بەرۋدىڭ اشىق, ءادىل جۇيەسىن قامتاماسىز ەتۋ, سىبايلاس جەمقورلىق پەن بيۋروكراتيا دەڭگەيىن تومەندەتۋ, بيزنەس جۇرگىزۋگە كەدەرگى كەلتىرەتىن اكىمشىلىك كەدەرگىلەردى جويۋ.
«تالداۋ اياسىندا اشم ۆەتەرينارلىق باقىلاۋ جانە قاداعالاۋ كوميتەتى مەن ونىڭ اۋماقتىق ينسپەكتسيالارىنىڭ لاۋازىمدى تۇلعالارىنان تۇراتىن تۇراقتى قىلمىستىق توپ قىزمەتىنىڭ بەلگىلەرى انىقتالدى. اتالعان توپ كاسىپكەرلەردەن مالدى شەكارادان كەدەرگىسىز اكەتكەنى ءۇشىن جۇيەلى تۇردە پارا الۋدىڭ سىبايلاس جەمقورلىق سحەماسىن ۇيىمداستىردى. بۇل رەتتە مەملەكەت سۋبسيديالاعان اسىل تۇقىمدى مالدى اكەتۋ, جانۋارلاردى ەپيزووتيالىق باقىلاۋسىز تاسىمالداۋ فاكتىلەرى انىقتالدى, بۇل ەپيدەميولوگيالىق جاعدايعا تەرىس اسەر ەتۋى مۇمكىن», دەپ حابارلادى سىبايلاس جەمقورلىققا قارسى قىزمەت وكىلى.
انتيكوردىڭ ايتۋىنشا, انىقتالعان قىلمىستىق توپتا قاتىسۋشىلار اراسىنداعى رولدەر ناقتى بولىنگەن.
«قولدانىستاعى ەرەجەلەرگە سايكەس ەكسپورتقا نەمەسە يمپورتقا رۇقسات بەرۋدى بەيىندى كوميتەتتىڭ باسشىلىعى جۇزەگە اسىرادى. ۇيىمداستىرىلعان سىبايلاس جەمقورلىق سحەماسى شەڭبەرىندە كوميتەتتىڭ ەكى باس ساراپشىسى وسى قۇزىرەتكە زاڭسىز يە بولدى. قىلمىستىق سحەماعا تۇركىستان, جامبىل, اقتوبە جانە قوستاناي وبلىستارى, الماتى جانە شىمكەنت قالالارى بويىنشا وڭىرلىك ينسپەكتسيالاردىڭ ينسپەكتورلارى دا تارتىلدى. ءاربىر رۇقسات ءۇشىن 10-نان 50 مىڭ تەڭگەگە دەيىن توپ قاتىسۋشىلارىنىڭ نەمەسە ولاردىڭ تۋىستارىنىڭ جەكە كارت-شوتتارىنا اقشا قاراجاتى اۋدارىلدى. ماسەلەن, تەك تۇركىستان وبلىسى بويىنشا كوميتەتتىڭ اۋماقتىق ينسپەكتسياسىنىڭ باس مامانىنىڭ شوتىنا 2020 جىلدان باستاپ 45 ملن تەڭگەدەن استام قارجى تۇسكەن. كوميتەتتىڭ باس ساراپشىسى ايەلىنىڭ كارت-شوتىنا 13,5 ملن تەڭگەدەن استام قارجى ءتۇستى», دەپ تولىقتىردى و.بەكتەنوۆ.
25 تامىزدا باستالعان اۋقىمدى ارنايى وپەراتسيانىڭ ناتيجەسىندە سىبايلاس جەمقورلىققا قارسى قىزمەت 10-نان استام كىنالى لاۋازىمدى تۇلعانى انىقتادى. ءۇش ايىپتالۋشىعا, ونىڭ ىشىندە كوميتەتتىڭ ورتالىق اپپاراتىنىڭ قىزمەتكەرلەرىنە قاتىستى قاماۋعا الۋ تۇرىندەگى بۇلتارتپاۋ شاراسى تاڭدالدى.
«مۇنداي قىلمىستىق ارەكەتتەر مال شارۋاشىلىعىنىڭ دامۋىنا ايتارلىقتاي زيان كەلتىرىپ قانا قويماي, ەلدىڭ ازىق-ت ۇلىك قاۋىپسىزدىگىنە قاۋىپ توندىرەدى. تەرگەۋ جالعاسۋدا», دەپ تۇيىندەدى سىبايلاس جەمقورلىققا قارسى قىزمەت توراعاسىنىڭ ءبىرىنشى ورىنباسارى.
