بۇل تۋرالى كتك تەلەارناسى مالىمدەدى.
ايەل مەديتسينالىق ورتالىق قىزمەتكەرلەرى قوڭىراۋ شالىپ قويماعاسىن سول جاققا بارعانىن ايتادى. ونداعىلار كەيبىر قىزمەت تۇرلەرى تەگىن دەپ قىزىقتىرعان.
وڭ جامباسى وڭباي كۇيىپ قالعان ماعزۋما قازبەكوۆا سول كۇندى قورقىنىشپەن ەسكە الادى. ورتا جاستاعى ايەل مەديتسينالىق ورتالىق قىزمەتكەرلەرى قوڭىراۋ شالىپ قويماعاسىن سول جاققا بارعانىن ايتادى. ونداعىلار كەيبىر قىزمەت تۇرلەرى تەگىن دەپ قىزىقتىرىپتى. سوڭىندا اقشاسى جوقتىعىن ايتقان كليەنتتى 300 مىڭ تەڭگەگە جۋىق كرەديت راسىمدەۋگە كوندىرگەن. زارداپ شەككەن ايەل ءبىرىنشى كۇنى ەمدىك شارالار ويداعىداي ءوتتى دەيدى. الايدا ەرتەسىنە ارقاسىنا بانكى قويىپ, وتتى ماسساج جاساعاندا ورتەنىپ كەتە جازدادىم دەپ مۇڭ شاعادى.
ء«بارى ەكى-ءۇش سەكۋند ىشىندە بولدى. ىسىپ كەتتى مە دەپ ەدىم, انا بالا استىمداعى توسەك جايمانى باسىپ جىبەردى. مەن "ويباي!" دەپ, جۇلمالاي باستادىم. ارتىمداعى بانكىلەردى يتەرىپ-يتەرىپ تاستادى. ماسساج الۋعا كەلگەنمىن. ەندى, مىنە, دەنەم كۇيىپ قالدى», دەيدى قازبەكوۆا.
وعان العاشقى كومەك دۇرىس كورسەتىلمەدى. جالما-جان تانىس زاڭگەرىن شاقىرعان ول ۇيىنە ءوز كۇشىمەن ارەڭ جەتىپتى. كەيىن انىقتالعانداي, ماسساج جاسايتىن مامان سپيرت توگىپ الىپ, سونىڭ كەسىرىنەن وت تۇتانعان. ال مەديتسينالىق ورتالىق ماماندارى كەشىرىم سۇراعان دا جوق.
«باسىندا مامان بۇكىل شىعىنىڭىزدا موينىما الامىن دەپ ايتتى. ەندى ءبارى بىتكەننەن كەيىن شامام كەلمەيدى دەيدى», دەپ اتاپ كورسەتتى زارداپ شەككەن ايەل.
مەديتسينالىق ورتالىق باسشىلىعى قىزمەتكەرلەردىڭ قاتەلىگىن كەش ەستىدىك دەپ اقتالعاننان باسقا ماردىمدى جاۋاپ قاتپاعان كورىنەدى. ال سول كۇنگى سوراقىلىققا كۋا بولعان زاڭگەر ادامگەرشىلىكتەن اتتاعان كلينيكانىڭ كەمشىلىگىن كەلىسىمشارتتان كورىپ وتىر.
«كەلىسىمشارتتا مەديتسينالىق ورتالىق ءوزىنىڭ عانا پايداسىن ويلاپ جازعان», دەيدى زاڭگەر الماس كۇنگەيباەۆ.
ال ورتالىق وكىلدەرى ىسىنە سالعىرت قاراعان قىزمەتكەردىڭ جۇمىستان ۋاقىتشا شەتتەتىلگەنىن ايتادى. شىعىندى وتەۋگە ءازىرمىز دەپ اقتالعاندار كەلىسپەۋشىلىك كليەنتتىڭ وزىنە بايلانىستى دەيدى.
«كليەنتىمىز كۇيىك العان. ونى مويىندايمىز. كەشىرىم سۇرايمىز. مورالدىق-ماتەريالدىق شىعىنىن وتەۋگە تولىعىمەن دايىنبىز. ءبىزدىڭ كليەنت رەسمي تۇردە بىزگە حابارلاسقان جوق», دەدى «Venus medikal kz» جشس رەسمي وكىلى رۋسلان مۇقانوۆ.
مەديتسينالىق ورتالىقتان كوڭىلى قالعان ماعزۋما قازبەكوۆا پوليتسياعا ارىزدانىپتى. مورالدىق جانە ماتەريالدىق شىعىندى وتەپ بەرۋدى تالاپ ەتكەن ايەل بارلىعىن سوت ارقىلى شەشپەك.
