بۇۇ-نىڭ مامانداندىرىلعان مەكەمەسى بولىپ تابىلاتىن دۇنيەجۇزىلىك مەتەورولوگيالىق ۇيىمنىڭ (دمۇ) ەسەبىندە 1970 جىلدان 2019 جىلعا دەيىن الەمدە قاۋىپتى كليماتتىق, مەتەورولوگيالىق جانە گيدرولوگيالىق وزگەرىستەرگە بايلانىستى ەكى ميلليوننان استام ادام قايتىس بولعانى ايتىلدى.
دمۇ مالىمەتتەرى بويىنشا, 50 جىلعا جۋىق ۋاقىت ىشىندە 11 مىڭنان استام تابيعي اپات ورىن الدى, بۇل 3,64 تريلليون دوللاردان استام شىعىنعا اكەلدى. ماماندار كليماتتىڭ وزگەرۋى بارلىق تىركەلگەن ءولىمنىڭ 45%-ىن جانە بارلىق ەكونوميكالىق شىعىنداردىڭ 74%-ىن قۇرايتىن توتەنشە اۋا-رايى قۇبىلىستارىنىڭ كوبەيۋىنە اكەلەتىنىن اتاپ ءوتتى.
ساراپشىلاردىڭ پىكىرىنشە, بۇل كورسەتكىشتىڭ ءوسۋى سۋ تاسقىنىمەن - 44%, ال 17% تروپيكالىق تسيكلوندارمەن بايلانىستى. بارلىق ءولىمنىڭ 91%-ى دامۋشى ەلدەرگە تيەسىلى.
وسىلايشا, قۇرعاقشىلىقتان 650 مىڭعا جۋىق, داۋىلداردان 577,2 مىڭنان استام, سۋ تاسقىندارىنان شامامەن 58,7 مىڭ, جوعارى تەمپەراتۋرا سالدارىنان 55,7 مىڭنان استام ءولىم تىركەلدى.
وسىعان قاراماستان, ەسەپ اۆتورلارى تابيعي اپاتتاردان بولاتىن ءولىم-ءجىتىم ازايىپ كەلە جاتقانىن ايتتى. ەگەر 1970-1980 جىلدارى كۇن سايىن اۋا-رايىنا بايلانىستى ورتاشا ەسەپپەن 170 ءولىم تىركەلسە, 2010 جىلدارى بۇل كورسەتكىش 40-قا دەيىن تومەندەدى.
الايدا, ەكونوميكالىق شىعىندار كەرىسىنشە وسۋدە. 2010-2019 جىلدارى كۇندەلىكتى ماتەريالدىق شىعىندار ورتاشا ەسەپپەن 383 دوللاردى قۇرادى, بۇل 1970-1979 جىلدارداعى ۇقساس كورسەتكىشتەن جەتى ەسە كوپ.
جۋىردا اقش-تاعى تەننەسسي شتاتىندا سۋ تاسقىنى سالدارىنان كەم دەگەندە 22 ادام قايتىس بولسا, 50-گە جۋىق ادام حابار-وشارسىز كەتكەن.
