وپەرا جانە بالەت تەاترىنىڭ ديرەكتورى مايرا مۇحامەدقىزىنىڭ ايتۋىنشا, پاندەمياعا بايلانىستى ەكى جىلدان بەرگى العاشقى ساپارعا ۇجىم تىڭعىلىقتى دايىندالعان. نۇر-سۇلتان قالاسىنا تەاتردىڭ 170-كە جۋىق قىزمەتكەرى كەلسە, ەلوردادان 50-گە جۋىق مامان مەن ارنايى اسپاپتارمەن قوسىلىپ, «دومالاق انا» وپەراسى ساحنالانباق. يدەيا اۆتورى – قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى مايرا مۇحامەدقىزى, قويىلىمنىڭ كومپوزيتورى مادەنيەت سالاسىنىڭ ۇزدىگى تاسقىن جارمۇحامەت. ليبرەتتوسىن جازعان قازاقستاننىڭ ەڭبەك سىڭىرگەن قايراتكەرى اسحات ماەميروۆ, قويۋشى-رەجيسسەرى – ميحايل پاندجاۆيدزە, قويۋشى-ديريجەر – ءمادي ومىرزاقوۆ, قويۋشى-سۋرەتشى – باقىت كۇزەمباەۆ.
«دومالاق انا» وپەراسى تەك انالىق قايسار جۇرەك پەن قالىڭ ەلگە تاراعان كەڭ پەيىلدىلىكتى ايشىقتاپ قانا قويماي, قازاق حالقىنىڭ تاريحىنداعى ماڭىزدى وقيعالاردىڭ قوزعاۋشىسى بولعان بايدىبەك باتىردىڭ ءوز حالقىنا دەگەن سۇيىسپەنشىلىگىمەن ءبىر ارناعا توعىسىپ, قازاق ەلىنىڭ تاريحي تەرەڭدىگىن, مادەني كوركەمدىگىن كەڭىنەن قامتيدى.
