وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى قامزا ۇمبەتقاليەۆتىڭ ايتۋىنشا, پوليتسيا قىزمەتكەرلەرىنە جۇكتەلگەن باستى مىندەتتىڭ قاتارىندا ءبىلىم بەرۋ ورىندارىندا قولايلى ءارى قاۋىپسىز ورتا قالىپتاستىرۋ دا بار.
«وقۋشىلاردىڭ قاۋىپسىزدىگىن قامتاماسىز ەتۋ ماقساتىندا مەكتەپتەردە دابىل تۇيمەسىن ورناتۋ قولعا الىنىپ وتىر. قازىر دابىل تۇيمەسى اتىراۋ قالاسىنداعى 17, جىلىوي اۋدانىنىڭ ورتالىعى – قۇلسارى قالاسىندا ورنالاسقان 10 مەكتەپكە قوندىرىلدى. سونداي-اق, مەكتەپتەر مەن باسقا دا ءبىلىم بەرۋ ورىندارى بەينەباقىلاۋ كامەرالارىمەن 100 پايىزعا قامتىلدى. ونىڭ ىشىندە 37 ءبىلىم وشاعى «سەرگەك» جۇيەسى ارقىلى جەدەل باسقارۋ ورتالىعىنا قوسىلدى. ال, 148 مەكتەپكە تۋرنيكەت ورناتىلدى. جىل سوڭىنا دەيىن تاعى 49 مەكتەپكە تۋرنيكەت ورناتۋ جوسپارلانىپ وتىر», دەيدى قامزا ۇمبەتقاليەۆ.
ونىڭ مالىمەتىنشە, پوليتسيا دەپارتامەنتىنىڭ ۇسىنىسىمەن مەكتەپ وقۋشىسى بەينەلەنگەن ماكەتتەر دايىندالعان. وعان جەرگىلىكتى مەردىگەر مەكەمەنىڭ دەمەۋشىلىك تانىتقان.
«ماقسات – كولىك جۇرگىزۋشىلەرىنىڭ نازارىن جاياۋ جۇرگىنشىلەر جولىنا اۋدارىپ, جىلدامدىق اسىرماۋىنا ىقپال ەتۋ. قازىر 4 وقۋشى ماكەتى مەكتەپتەرگە جاقىن ورنالاسقان جاياۋ جۇرگىنشىلەر وتەتىن جولعا قويىلادى», دەيدى قامزا ۇمبەتقاليەۆ.
