«مەن تاعى ءبىر ماڭىزدى ماسەلەگە ارنايى توقتالعىم كەلەدى. دۇنيەجۇزى ونەركاسىپ پەن ەكونوميكانى ەكولوگيالىق تازارتۋعا بەت بۇردى. قازىر بۇل – انشەيىن ءسوز ەمەس, سالىق, باج جانە تەحنيكالىق رەتتەۋ شارالارى سياقتى ناقتى شەشىمدەر. ءبىز ودان تىس قالا المايمىز. مۇنداي شەشىمدەر ەكسپورت, ينۆەستيتسيا جانە تەحنولوگيا ترانسفەرتى ارقىلى ەلىمىزگە تىكەلەي اسەر ەتەدى. شىن مانىندە, بۇل – قازاقستاننىڭ ورنىقتى دامۋى ماسەلەسى. سوندىقتان مەن 2060 جىلعا قاراي كومىرتەگىنەن ارىلۋ مىندەتىن جۇكتەپ وتىرمىن», دەدى پرەزيدەنت.
مەملەكەت باسشىسىنىڭ ايتۋىنشا, ءوسىم ساپالى بولۋ ءۇشىن قۋات كوزدەرى قاجەت.
«قازاقستاندا 2030 جىلعا قاراي ەلەكتر قۋاتىنىڭ تاپشىلىعى پايدا بولادى. الەمدىك تاجىريبەگە قاراساق, مۇنىڭ ەڭ وڭتايلى شەشىمى – بەيبىت اتوم. بۇل – كۇردەلى ماسەلە. سوندىقتان قاۋەسەتكە سەنىپ, ەموتسياعا بەرىلمەي, ونى بارىنشا ءتيىمدى شەشۋىمىز كەرەك. ۇكىمەت پەن «سامۇرىق-قازىنا» ءبىر جىلدىڭ ىشىندە قازاقستاندا قاۋىپسىز ءارى ەكولوگيالىق تازا اتوم ەنەرگەتيكاسىن دامىتۋ مۇمكىندىگىن زەرتتەۋگە ءتيىس», دەدى مەملەكەت باسشىسى.
سونىمەن قاتار ينجەنەرلىك سالانى دامىتۋ جانە اتوم سالاسىنداعى بىلىكتى ينجەنەر مامانداردىڭ جاڭا بۋىنىن قالىپتاستىرۋ تۋرالى دا ءسوز بولدى. پرەزيدەنت «جاسىل» سۋتەگى ءوندىرىسى, جالپى سۋتەگى ەنەرگەتيكاسىنىڭ بولاشاعى زور ەكەنىن اتاپ ءوتتى. ۇكىمەتكە وسى ماسەلە بويىنشا دا ۇسىنىس ازىرلەۋدى تاپسىردى.
