جاڭا وقۋ جىلىنان باستاپ وقىتۋشى جالاقىسى – 38%, اعا وقىتۋشىنىكى – 75%, دوتسەنتتىكى – 88%, پروفەسسوردىڭ جالاقىسى 163%-عا ارتتى.
مەملەكەت باسشىسى قاسىم-جومارت توقاەۆتىڭ جوو وقىتۋشىلارىنىڭ جالاقىسىن ارتتىرۋ تۋرالى تاپسىرماسى اياسىندا, ءبىلىم ورداسىنىڭ باسقارما توراعاسى – رەكتور جانسەيىت تۇيمەباەۆتىڭ شەشىمىمەن وقىتۋشى – 200 000 تەڭگە, اعا وقىتۋشى – 280 000 تەڭگە, دوتسەنت – 330 000 تەڭگە, پروفەسسور 500 000 تەڭگە جالاقى الاتىن بولادى.
سونداي-اق عالىم-وقىتۋشىلاردىڭ جارىق كورگەن وقۋ قۇرالدارى, مونوگرافيالارى مەن كىتاپتارى ءۇشىن دە سىياقى تاعايىنداۋ شەشىمى قاراستىرىلىپ وتىر.
جوو باسشىلىعى ەڭبەكاقىنى ءوسىرۋ باسەكەلەستىكتى ارتتىرىپ, ۋنيۆەرسيتەتكە مىقتى مامانداردىڭ تارتىلۋىنا جول اشادى دەگەن سەنىمدە.
«قازۇۋ-دا جالاقىنىڭ ارتۋىمەن قاتار, وقىتۋشى-پروفەسسورلىق قۇرامنىڭ كاسىبي بىلىكتىلىگىن كوتەرۋ, تالانتتى جاستارعا قولداۋ كورسەتۋ جۇمىستارى جۇيەلى جولعا قويىلۋدا. وقىتۋشىلىق قىزمەتكە كونكۋرستىق نەگىزدە ەڭ بىلىكتى ءارى ءبىلىمدى ماماندار ىرىكتەلىنىپ الىنادى. بۇل شارالار ءبىلىم بەرۋ ساپاسىن ارتتىرۋعا, وقىتۋشىلاردى الەۋمەتتىك قولداۋعا جانە وقىتۋشى بەدەلىن ارتتىرۋعا باعىتتالعان. عالىم-وقىتۋشىلاردىڭ ارتىق جۇكتەمەدەن ارىلىپ, وقۋ ۇدەرىسىنە, زەرتتەۋ جۇمىستارىنا جانە ساباقتىڭ ساپاسىنا كوڭىل قويۋى ءۇشىن بارلىق جاعداي جاسالۋدا», دەپ جازادى جوو ءباسپاسوز ورتالىعى.
