ايماقتار • 29 تامىز، 2021

كۇنىنە 1،5 مىڭ الماتىلىقتان ىندەت انىقتالادى

71 رەت كورسەتىلدى

الماتى بيلىگى ىندەتتى توقتاتۋ ءۇشىن ءتۇرلى قادامعا بارىپ، وراسان شىعىنعا باتىپ جاتقانىمەن، ەپيدەميالىق احۋال تۇراقتالا قويعان جوق. قالانىڭ باس سانيتارلىق دارىگەرى جانداربەك بەكشيننىڭ مالىمەتىنشە، ىندەت جۇقتىرعاندار سانى جاڭا وقۋ جىلى باستالعانشا وسپەسە، كەمىمەيدى. ويتكەنى دەمالۋشىلاردىڭ نەگىزگى بولىگى جۇمىسقا شىعار الدىندا پتر تاپسىرادى.

ىندەت وشاقتارى

«25 ماۋسىمنان بەرى ەپيدەميالىق احۋال «دەلتا» شتامىنا بايلانىستى شيەلەنىسىپ تۇر. ءتورتىنشى تولقىننىڭ شارىقتاۋ شەگى 12 تامىزعا تۋرا كەلدى، ال ەپيدەميانىڭ ءورشۋى 29 شىلدەدەن قازىرگى دەيىن جالعاسىپ كەلەدى جانە كۇنىنە شامامەن 1،5-1،6 مىڭ جاعداي تىركەلەدى»، دەدى ول.

الماتىدا شىلدە ايىنىڭ ءبىرىنشى اپتاسىندا – 2 843، ەكىنشى اپتادا – 5 324، ءۇشىنشى اپتادا – 6 397، ءتورتىنشى اپتادا 9 852 جاعداي تىركەلدى. تامىزدىڭ ءبىرىنشى اپتاسىندا الماتىدا 10 728 ادام ينفەكتسيا جۇقتىرسا، ەكىنشى اپتادا كۆي جۇقتىرعاندار سانى 10 529-عا جەتىپ، ءۇشىنشى اپتادا 10 786 ادامنان ىندەت تابىلدى. ج.بەكشين 18-19 تامىزدا پتر ناتيجەلەرى نەلىكتەن بىردەن شارىقتاعانىن ءتۇسىندىردى. ونىڭ پىكىرىنشە، بۇل جۇرتتىڭ دەمالىستان كەيىن جۇمىسقا شىعۋىنا وراي پروفيلاكتيكالىق شارالاردى قاتاڭداتۋعا بايلانىستى بولعان. سيمپتومسىز كۆي تۇرلەرى تامىزدىڭ 13-17 كۇندەرى 5،5%-دان 18 تامىزدا 6%-عا جانە 19 تامىزدا 7،5%-عا دەيىن وسكەن. سونىمەن قاتار R سانى (ينفەكتسيالاردىڭ بەرىلۋ يندەكسى) ايدىڭ باسىنداعى 1،2-دەن 25 تامىزدا 1،03-كە دەيىن تومەندەدى، بۇل ەپيدەميالىق تولقىننىڭ رەتسەسسياسىنىڭ باستالۋىن بىلدىرەدى.

«وسى كورسەتكىشتەردى ەسكەرە وتىرىپ، ەپيدەميانىڭ ءورشۋى تامىز ايىنىڭ سوڭىنا دەيىن تىركەلگەن 11 مىڭ جاعدايعا سايكەس، ياعني پەسسيميستىك بولجام بويىنشا ءجۇرىپ جاتىر. ىندەتتىڭ باسەڭسۋى قىركۇيەك ايىنىڭ ەكىنشى جارتىسىنا، ءبىر اي ىشىندە 10 مىڭ جاعدايعا دەيىن اۋىسادى» دەگەن بولجامىن العا تارتىپ وتىر باس سانيتار.

جىل باسىنان بەرى قالادا 118 082 ادام ىندەتكە شالدىعىپ ۇلگەردى. سوندىقتان قالا­لىق دەنساۋلىق ساقتاۋ جۇيەسى كۇشەي­تىل­گەن رەجىمدە جۇمىس ىستەۋدە. كورو­ناۆي­رۋس جۇق­تىرۋ بۇرىنعىداي، 20-39 جاس ارا­لىعىن­داعى ازاماتتاردا جوعارى – 33،5%، 40-59 جاس­تاعىلار اراسىندا – 25،2% جانە 60 جاس­تان اسقاندار اراسىندا – 23،1%، قالعان 18%-ى – بالالار جانە جاسوسپىرىمدەردىڭ ۇلەسىندە.

سونداي-اق ج.بەكشين بۇقارالىق ءىس-شارالاردى وتكىزۋگە تىيىم سالىنعانىنا قاراماستان، كارانتين ءتارتىبىن بەلدەن باسۋ ازايماعانىن ايتادى. الماتىنىڭ كەيبىر تۇرعىندارى باس مەملەكەتتىك سانيتارلىق دارىگەردىڭ قاۋلىسى تالاپتارىن ەلەمەي، توي، قۇدالىق، مەرەيتويلىق مەرەكەلەر ۇيىمداستىرۋدى توقتاتار ەمەس.

بۇگىندە جۇقتىرۋدىڭ نەگىزگى بەس ورنى بار، ولار: ساۋدا ورىندارى – 32%، وتباسىلىق بايلانىس – 16%، قوعامدىق كولىكتەر – 17،1%، بازارلار – 13%. جۇرتشىلىق ازىق-ت ۇلىك بازارلارىندا ءجيى جۇقتىرادى – 9%. سونىمەن قاتار قازىرگى شەكتەۋلى شارالار مەن ۇجىمدىق يممۋنيتەتىنىڭ ارتۋىنا وراي دەرتتىڭ 2-3%-عا تومەندەگەنى بايقالادى.

سەبد باسشىسى قالا تۇرعىندارى ۆيرۋس­تىڭ تارالۋ تىزبەگىن قۇرۋدى جالعاستىرا وتىرىپ، قالا ماڭىنداعى اۋدانداردا جانە جالعا الىنعان كوتتەدجدەردە وتباسىلىق مەرەكەلەر وتكىزەتىنىن ناقتى مىسالدارمەن مالىمدەدى. سوڭعى دەرەكتەرگە سايكەس ىندەت جۇقتىرۋ 20-39 جاسقا دەيىنگىلەر ارا­سىندا 34% پايىزعا دەيىن جەتتى. قىسقاسى، ەپيدەميالىق جاعدايدى تۇراقتاندىرىپ، ءبىلىم بەرۋ ۇيىمدارىندا جاڭا وقۋ جىلىن قالىپتى رەجىمدە ۇيىمداستىرۋ ءۇشىن قولدانىستاعى شەكتەۋ شارالارى 31 تامىزعا دەيىن ۇزارتىلدى.

 «دەلتا» شتامى سالعان اۋىرتپالىقتار

بۇل كۇندەرى قالا اۋرۋحانالارىندا ­6 مىڭنان استام ناۋقاس جاتسا، ونىڭ ىشىندە 169 بالا بار. تەك 25 تامىزدا الماتىدا 1 590 جاعداي تىركەلسە، ونىڭ 1 515-ءى سيمپ­تومدى تاسىمالداۋشىلار. 6 021 ادام اۋرۋحانادا، 476 ادام جانساقتاۋ بولىمىندە ەمدەلىپ جاتىر. ءدال وسىنداي جاعدايدا الماتىنىڭ دارىگەرلەرىنىڭ يىعىنا تۇسكەن اۋىرتپالىق ەكى ەسەگە ارتقانىن قاپەردەن شىعارماۋ كەرەك.

«جەدەل جاردەم كولىگىنىڭ جۇكتەمەسى شارىقتاپ تۇر، تاۋلىگىنە 1600-گە جۋىق جاعداي تىركەلىپ، اۋرۋحاناعا كۇن سايىن 700-750 ناۋقاس قابىلدانادى. تاۋلىگىنە 3000-3500 دەيىن قوڭىراۋ شالىنادى»، دەيدى قوعامدىق دەنساۋلىق باسقارماسى باس­شىسىنىڭ ورىنباسارى سۆەتلانا سۇلتانعازيەۆا.

ول 12 868 ناۋقاستىڭ ماسك پەن تەلە­­مەديتسينا ورتالىعىنىڭ ءموبيلدى توپ­تارىنىڭ باقىلاۋىندا ەكەنىن ايتتى.

بۇگىندە مەگاپوليستە جۇزدەگەن دارىگەر كوروناۆيرۋسپەن كۇرەسىپ جاتسا، ولاردىڭ بىرقاتارى ۆاكتسينالاۋ ورتالىقتارىندا جۇمىس ىستەيدى. مىڭنان استام دارىگەر ەكپە سالۋ ىسىمەن اينالىسىپ جاتىر.

 

الماتى

سوڭعى جاڭالىقتار

اقتاۋدا شارشى الاڭعا كىمدەر شىعادى؟

كاسىپقوي بوكس • بۇگىن، 14:52

اتىراۋدا ەپيدجاعداي ءالى دە كۇردەلى

كوروناۆيرۋس • بۇگىن، 13:50

تۇركىستاندا ۇشەم دۇنيەگە كەلدى

ايماقتار • بۇگىن، 12:50

ەرتەڭ ۇكىمەت وتىرىسى وتەدى

ۇكىمەت • بۇگىن، 11:31

ۇقساس جاڭالىقتار