26 تامىز كۇنگى اقپارات بويىنشا, ءبىر تاۋلىكتە قالادا 1 561 ادام كوروناۆيرۋس جۇقتىرعان. مۇنىڭ ىشىندە سيمپتومدى, جەڭىل جانە ورتاشا دەڭگەيدەگى بەلگىلەرمەن – 1467, سيمپتومسىز – 94 ناۋقاس تىركەلدى. بارلىق ەمدەلىپ شىققاندار – 633, كەلىپ تۇسكەنى – 578. «ينفەكتسيالىق ستاتسيونارلاردا 5765 ادام بار (توسەك-ورىننىڭ جالپى سانى – 8 910 ), ونىڭ ىشىندە 166 بالا ەمدەلۋدە», دەپ ناقتىلادى قوعامدىق دەنساۋلىق باسقارماسىنىڭ ءباسپاسوز قىزمەتىنەن.
سونداي-اق, رەانيماتسيا جانە قارقىندى تەراپيا بولىمىندە 469 ادام جاتىر. ال 26 ناۋقاس جاساندى تىنىس الۋ اپپاراتىنا قوسىلعان. ءينۆازيۆتى ەمەس جاساندى تىنىس الۋ اپپاراتىندا 196 ادام ەم قابىلداۋدى جالعاستىرۋدا. High flow-دا 216 اپپارات جۇمىس ىستەيدى.
مەديتسينالىق-سانيتاريالىق العاشقى كومەك ءموبيلدى بريگادالارىنىڭ جانە تەلەمەديتسينا ورتالىعىنىڭ امبۋلاتوريالىق باقىلاۋىندا 12 868 پاتسيەنت تۇر. ونىڭ ىشىندە ىندەت بەلگىلەرى بار, ورتاشا اۋىر جاعدايدا – 12 369 ناۋقاس. 499 ادامدا كوروناۆيرۋس بەلگىلەرى جوق.
