كەڭەس زامانىندا ماڭعىستاۋ اۋدانىنداعى كەڭشارلاردا اعا ەسەپشى, باس ەكونوميست, ماڭعىستاۋ وبلىستىق پارتيا كوميتەتىندە نۇسقاۋشى, ءبىرىنشى حاتشىنىڭ كومەكشىسى, اۋىلشارۋاشىلىق ءبولىمىنىڭ مەڭگەرۋشىسى, ماڭعىستاۋ اۋداندىق پارتيا كوميتەتىنىڭ ءبىرىنشى حاتشىسى جانە اۋداندىق كەڭەس توراعاسى, وبلىستىق حالىقتىق باقىلاۋ كوميتەتىنىڭ توراعاسى, «ماڭعىستاۋ» اگروكومبيناتىنىڭ باس ديرەكتورى, وبلىستىق اۋىلشارۋاشىلىق باسقارماسىنىڭ باستىعى, وبلىس اكىمىنىڭ ءبىرىنشى ورىنباسارى, «ادجيپ» ككو ديرەكتورىنىڭ كەڭەسشىسى, «وكك» جشس ديرەكتورىنىڭ كەڭەسشىسى قىزمەتتەرىن اتقارعان. «قۇرمەت» وردەنى مەن 7 مەدالدىڭ يەگەرى. قازاق كسر جوعارعى كەڭەسىنىڭ جانە ماڭعىستاۋ وبلىسىنىڭ «قۇرمەت گراموتالارىمەن» ماراپاتتالعان. ماڭعىستاۋ اۋدانىنىڭ قۇرمەتتى ازاماتى, زاپاستاعى پولكوۆنيك. قكپ XV, XVI, XVII سەزدەرىنىڭ دەلەگاتى, گۋرەۆ جانە ماڭعىستاۋ وبلىستىق كەڭەستەرىنىڭ دەپۋتاتى بولىپ سايلانعان.
قىزمەت ساتىسى وسىلاي ورىلگەن ساقىپ بۇركىتباي ۇلى قارىمدى قالامگەر دە ەدى. ول «بەكەت اتا اسى شەجىرەسى», «ماڭعىستاۋ», «سۇراساڭ رۋىمدى – داۋلەتالى», «مىڭ بوياۋلى ماڭعىستاۋ» كىتاپتارى اۆتورلارىنىڭ ءبىرى, «تۇبەكتىڭ تانىمال تۇلعالارى» اتتى كىتابى جارىق كورگەن. س.كەرەلباەۆ تۋرالى ءوڭىر ەنتسيكلوپەدياسىندا, وزگە دە كىتاپتاردا كەڭىنەن جازىلعان.
ماڭعىستاۋدا ومىردەن وتكەنىنە ونشاقتى كۇن بولعان س.كەرەلباەۆتى ەسكە الۋ ءىس-شاراسى ءوتتى. وعان كەرەلباەۆتار اۋلەتى مەن مارقۇمنىڭ وتباسى قاتىستى.
سالتاناتتى ءىس-شارانى اشىپ بەرگەن وبلىس باسشىسى س.ترۇموۆ ءومىرى ونەگەلى ىسكە, ءسوزى عيبراتقا تولى تۇلعا تۋرالى تىڭ ەستەلىكتەر ايتىپ, ابزال اعانىڭ ەسىمى ەشقاشان ۇمىتىلمايتىنىن جەتكىزدى.
– ساقىپ بۇركىتباي ۇلى ماڭعىستاۋ توپىراعىندا دۇنيەگە كەلىپ, ءومىرىنىڭ سوڭىنا دەيىن كىندىك قانى تامعان جەرىنىڭ دامۋىنا قوماقتى ۇلەس قوسقان اردا ازامات ەدى. تاۋەلسىز قازاقستاننىڭ قالىپتاسۋى مەن دامۋى جولىندا ايانباي تەر توكتى. ەلدىڭ تىزگىنىن ۇستاپ, قوعامعا ابىرويلى قىزمەت قىلدى. ءوزىنىڭ 45 جىل قىزمەتبايانىندا يگى ىستەرگە مۇرىندىق بولدى. ول كەشكەن عۇمىر, ول وتكەن ەڭبەك جولى – ولكە تاريحىنىڭ جارتى عاسىرلىق جىلناماسىنداي. ارتىنا وشپەس ءىز بەن ولمەس ءسوز قالدىرعان ساقىپ بۇركىتباي ۇلىنىڭ ەسىمى ۇمىتىلماق ەمەس. ونىڭ جارقىن بەينەسى ماڭگى جادىمىزدا قالادى, – دەدى ول.
اتالعان شارادا ساقىپ بۇركىتباي ۇلىنىڭ دۇنيەدەن قايتۋىنا بايلانىستى قازاقستان رەسپۋبليكاسىنىڭ مەملەكەتتىك حاتشى قىرىمبەك كوشەرباەۆتان كەلىپ تۇسكەن كوڭىل ايتۋ حاتى وقىلدى. سونداي-اق مەملەكەت جانە قوعام قايراتكەرى ءلاززات قيىنوۆتىڭ, قازاقستاننىڭ ەڭبەك سىڭىرگەن قايراتكەرى عاني كاريننىڭ, عالىم, مەملەكەت جانە قوعام قايراتكەرى ومىرزاق وزعانباەۆتىڭ, پارلامەنت ءماجىلىسىنىڭ بۇرىنعى دەپۋتاتى گۇلنار سەيتماعانبەتوۆانىڭ ارنايى جولداعان كوڭىل ايتۋ بەينەجازبالارى كورسەتىلدى.
ەر ەسىمى ەل ەسىندە ماڭگى ساقتالاتىنى انىق.
ماڭعىستاۋ وبلىسى
