تۇركىستان حالىقارالىق اۋەجايىندا سپورتشىلاردى جەرلەستەرى, اعايىن-تۋىستارى, زيالى قاۋىم وكىلدەرى ءسان-سالتاناتپەن قارسى الدى. اتالعان شارادا ءسوز العان وبلىس اكىمىنىڭ ورىنباسارى ساكەن قالقامانوۆ ەل مەرەيىن اسىرعان سپورتشىلارعا جىلى لەبىزىن ءبىلدىردى. سونىمەن قاتار الەم چەمپيونى نيلۋفار رايموۆاعا
1 000 000 تەڭگەلىك سەرتيفيكات, قولا جۇلدەنى قانجىعاسىنا بايلاعان ءمادينا امانعا 500 000 تەڭگەلىك سەرتيفيكاتتى قالا اكىمى نۇربول تۇراشبەكوۆپەن بىرگە سالتاناتتى تۇردە تاپسىردى.
الەم چەمپيونى نيلۋفار رايموۆا – ق.ا.ياساۋي اتىنداعى حقتۋ-ءدىڭ 3-كۋرس ستۋدەنتى. مەملەكەتتىك جانە جەرگىلىكتى باسقارۋ ماماندىعى بويىنشا ءبىلىم الۋدا. ەكى قىز دا – ءابدىسالان نۇرماحانوۆ اتىنداعى وليمپيادا رەزەرۆىنىڭ مامانداندىرىلعان بالالار مەن جاسوسپىرىمدەر سپورت مەكتەبىنىڭ شاكىرتى. بالۋانداردىڭ ناتيجەلى ونەر كورسەتۋىنە ەڭ ءبىرىنشى كەزەكتە بىلىكتى باپكەر نۇرجىگىت ەرىمبەتوۆتىڭ سىڭىرگەن ەڭبەگى ەرەن. باپكەر شاكىرتتەرىنىڭ جۇلدە الاتىنىنا سەنىمدى بولعانىن ايتادى. «الەم چەمپيونى اتانعان نيلۋفار رايموۆا دا, قولا جۇلدە العان ءمادينا امان دا – ءتول شاكىرتتەرىم. ەكەۋى 12-13 جاسىنان باستاپ كۇرەسپەن اينالىستى. نيلۋفار ەل بىرىنشىلىكتەرىندە 6 رەت توپ جارعان. ودان بولەك «ازيا بالالارى» ويىندارىنىڭ كۇمىس جۇلدەگەرى اتانعانى بار. «قر سپورت شەبەرى» اتاعىن يەمدەنگەن. كەشەگى جەڭىسىنەن كەيىن «قر حالىقارالىق دارەجەدەگى سپورت شەبەرى» ءنورماتيۆىن ورىندادى. ءمادينا قازاقستان چەمپيوناتىندا جۇلدەگەر اتانسا, جاستار اراسىنداعى ەل بىرىنشىلىگىندە توپ جارعان. ەندى, مىنە, الەم بىرىنشىلىگىندە قولا جۇلدەگە ءىلىنىپ وتىر», دەيدى نۇرجىگىت ەرىمبەتوۆ. الەم بىرىنشىلىگىندە العاشقى اينالىمدا رەسەيلىك بالۋانمەن بولعان كەزدەسۋ قيىنداۋ بولعانىن ايتقان نيلۋفاردىڭ العا قويعان ماقساتى دا بيىك. «كۇرەسكە العاش تاتەم الىپ كەلدى, جاتتىقتىرۋشى زالدا بايقادى. شامامەن ءبىر اپتالىق جاتتىعۋدان كەيىن تۋرنيرگە قاتىسىپ, جەڭىسكە جەتتىم. سودان كەيىن سپورتپەن اينالىسىپ, كۇرەستى جالعاستىرۋعا قىزىعۋشىلىق پايدا بولدى. اللا قالاسا, الداعى ۋاقىتتا وليمپياداعا قاتىسۋ ءۇشىن بارىمدى سالامىن, دايىندالامىن», دەيدى الەم چەمپيونى.
ەسكە سالا كەتەيىك, التىننان القا تاعىنعان نيلۋفار رايموۆا 57 كگ سالماقتا ءوزىنىڭ مىقتى ەكەنىن دالەلدەدى. العاشقى كەزدەسۋىندە رەسەيلىك اناستاسيا كوزلوۆانى 6:5, بەلورۋسسيالىق ماريا حۋليدانى 12:0 ەسەبىمەن جەڭدى. جارتىلاي فينالدا تۇركيالىق ەلۆيرا كامالوگلۋدان 4:2 ەسەبىمەن باسىم ءتۇستى. ال فينالدىق كەزدەسۋدە يتاليالىق اۆرورا رۋسسومەن كەزدەسىپ, 8:6 ەسەبىمەن جەڭىسكە جەتتى.
تۇركىستان وبلىسى
