ەكولوگيا • 24 تامىز، 2021

قازاقستاندا العاش رەت قولدان جاڭبىر جاۋعىزۋ ءادىسى قولدانىلۋى مۇمكىن

ماڭعىستاۋ وڭىرلىك كاسىپكەرلەر پالاتاسىنىڭ الاڭىندا قۋاڭشىلىقپەن كۇرەس ماسەلەسى تالقىلانىپ، جاساندى جولمەن جاڭبىر جاۋدىرۋ تەحنولوگياسى ۇسىنىلدى، دەپ حابارلايدى Egemen.kz.

گاۋھار قاپاش

تەحنولوگيا اپروباتسيادان وتسە، وڭىردە بەس قۇرىلعى قوندىرىپ، بارلىق جەرگە جاڭبىر جاۋدىرۋعا بولادى. ناتيجەسىندە، قۋاڭشىلىقتان زارداپ شەككەن شارۋالاردىڭ ماسەلەسى شەشىلىپ، مالدىڭ قىرىلۋى توقتاماق.

وتىرىسقا قاتىسقان فەرمەرلەر، عالىمدار، كاسىپكەرلەر مەن وبلىستىق اكىمدىك وكىلدەرى جاڭا تەحنولوگياعا قاتىستى جان-جاقتى ماسەلەنى كوتەردى.

«قازىر ماڭعىستاۋ، قىزىلوردا، تۇركىستان وبلىستارىندا قۇرعاقشىلىق بولىپ جاتقانى وزدەرىڭىزگە بەلگىلى. (...) مالدىڭ كولەمى، جەرگە ەكوتسيد، وسىمدىكتىڭ وسپەۋى، مال جايىلىمىنىڭ تارىلۋى سياقتى كوپتەگەن ماسەلە تۋىنداپ جاتىر. ءبىز پروبلەمادان شىعۋ ءۇشىن ەلگە قاجەت ادىستەردى ىزدەپ، كليماتتىق تەحنولوگيانىڭ بار ەكەنىن ءبىلىپ، مامانداردى ماڭعىستاۋعا شاقىردىق. قازىر قولدان جاڭبىر جاۋدىرۋدان باسقا جولىن كورىپ وتىرعان جوقپىز»، دەدى ماڭعىستاۋ وبلىسى كاسىپكەرلەر پالاتاسى وڭىرلىك كەڭەسىنىڭ توراعاسى ەدىل جاڭبىرشين.

بىرنەشە مەملەكەتتە سىنالعان جاھاندىق International Center of Climate Change Technologies جوباسىن ەلىمىزگە اكەپ وتىرعان Central Asian Center of Climate Change Technologies كومپانياسىنىڭ باسشىسى التاي اينابەكتىڭ ايتۋىنشا، بۇل تەحنولوگيانىڭ نەگىزىندە الەمدە بىرنەشە عانا كومپانيا جۇمىس ىستەيدى. ازاماتتىق ماقساتتا قولدانۋعا بولادى. قورشاعان ورتاعا، ادامدارعا، جان-جانۋارعا، ۇشاقتارعا اسەر ەتپەيدى – ەشقانداي زيانى جوق. ول تۋرالى ەۋروپالىق De Nayer زەرتحاناسىنىڭ وڭ قورىتىندىسى بار – Clear Sky Manager تەحنولوگياسى.

«تەرىس يونداردى اتموسفەراعا جىبەرۋ ارقىلى اتموسفەراداعى ءارتۇرلى دەڭگەيدەگى ىلعالداردى شوعىرلاندىرىپ جانە كاسپي تەڭىزىنىڭ اكۆاتورياسىنداعى بۋلانعان ىلعالداردى ماڭعىستاۋدىڭ تەرەڭ اۋداندارىن تاسىمالداۋ ارقىلى بۇلتتار تۇزىلەدى جانە كەرەك جەردە جاۋدىرىلادى. ءبىز ۇسىنىپ وتىرعان Clear Sky Manager 5 جانە Clear Sky Manager 7 تەحنولوگيالارى رەسەي، اقش، جاپونيا، ەۋرووداقتا پاتەنتتەلگەن. كليماتتى باسقارۋ سالاسىنىڭ الەمدىك دەڭگەيدە مويىندالعان دوكتورلارى، مەتەريالولوگ، اەرولوگ جانە باسقا ماماندار جۇمىس ىستەيدى»، دەدى التاي اينابەك.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز