بۇل ماسەلە الۋان ءتۇرلى وتباسىلىق باسقوسۋ مەن توي وتكىزۋشىلەردەن گورى جەرگىلىكتى اكىمدىكتى الاڭداتىپ وتىر. سول سەبەپتەن وبلىس اكىمى ماحامبەت دوسمۇحامبەتوۆ كۇردەلەنگەن ەپيدەميالىق احۋال تۋرالى ءالسىن-ءالسىن كەڭەس وتكىزىپ, اسىرەسە ۆاكتسينا سالدىرۋ ماسەلەسىن ءوز باقىلاۋىنا الدى. اكىمنىڭ مالىمەتىنە سۇيەنسەك, سوڭعى كۇندەرى ۆاكتسينا سالدىرۋ ديناميكاسى جاقسارعانىنا قاراماستان, اۋداندارداعى كورسەتكىش ءالى دە تومەن. اتاپ ايتقاندا, جىلىوي اۋدانىندا – 19,5, ماقاتتا – 28,2, يساتايدا – 36,2, قىزىلقوعا اۋدانىندا تۇرعىنداردىڭ 36,5 پايىزى عانا ۆاكتسينا العان.
– كوروناۆيرۋس ينفەكتسياسىنا قارسى ۆاكتسينا الماعان ادامدار قاۋىپتىڭ ورتاسىندا جۇرەدى. ولار قاۋىپتى ۆيرۋستى وزىنە عانا ەمەس, اعايىن-تۋىسىنا, ارىپتەستەرىنە جۇقتىراتىنىن ەسكەرۋى كەرەك. جاقىنىنان, دوس-جارانى مەن ارىپتەستەرىنەن ايىرىلعىسى كەلمەگەن ءار تۇرعىننىڭ ۆاكتسينا سالدىرعانى ءجون. ۆاكتسينا سالدىرۋدى كەيىنگە قالدىرماساق قانا ادەتتەگى ءومىر ىرعاعىنا قايتا ورالا الامىز. دەمەك قاۋىپتى ىندەتتىڭ بەتىن قايتارۋدىڭ جالعىز جولى – ۆاكتسينا سالدىرۋ, – دەيدى م.دوسمۇحامبەتوۆ.
وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ ايتۋىنشا, بيىلعى 1 اقپان مەن 22 تامىز ارالىعىندا 178 462 اتىراۋلىق تۇرعىن كوروناۆيرۋس ينفەكتسياسىنا قارسى ۆاكتسينالاردىڭ ءبىرىنشى كومپونەنتىن سالدىرعانى بەلگىلى بولىپ وتىر. ال ۆاكتسينالاردىڭ ەكىنشى كومپونەنتىن سالدىرعانداردىڭ سانى – 128 644 ادام.
– قازىر وبلىستا ۆاكتسينا ەگەتىن 59 بەكەت جۇمىس ىستەيدى. وڭىردە ۆاكتسينالاردىڭ جەتكىلىكتى قورى بار. ماسەلەن, 16 تامىزدا وڭىرلىك فارماتسەۆتيكا قويماسىنا Vero Cell ۆاكتسيناسىنىڭ العاشقى 10 مىڭ, كەيىننەن تاعى دا 20 مىڭ دوزاسى جەتكىزىلدى. بۇل ۆاكتسينانى تۇرعىندار 17 تامىزدان ەككىزە باستادى. قازىر اتىراۋلىق تۇرعىندار تاراپىنان بۇل ۆاكتسينانى سالدىرۋشىلار قاتارى ارتا ءتۇستى. ءبىر اپتادا 1 700 ادام Sinopharm كومپانياسى شىعارعان قىتايلىق ۆاكتسينانىڭ ءبىرىنشى كومپونەنتىن سالدىردى, – دەيدى ا.بايدۋاليەۆ.
ۆاكتسينا دەمەكشى, شالعاي اۋداندارداعى اۋىلداردىڭ تۇرعىندارى دا ونى ەككىزگىسى كەلەدى. الايدا كەيبىرىنىڭ اۋدان ورتالىعىنا بارۋعا مۇمكىندىگى جوق. سول سەبەپتەن 20 تامىزدا «دەنى ساۋدىڭ – جانى ساۋ» دەپ اتالاتىن الەۋمەتتىك پويىز ىسكە قوسىلدى. الدىمەن «ساعىز – اتىراۋ» باعىتىندا قاتىناعان 60 ورىندىق ەكى ۆاگونى بار پويىزبەن قىزىلقوعا, ماقات اۋداندارىنىڭ 45 تۇرعىنى اتىراۋ قالاسىنا ۆاكتسينا سالدىرۋعا كەلدى.
– بۇعان دەيىن قان قىسىمىم كوتەرىلىپ, ەكى رەت ۆاكتسينا سالدىرا المادىم. كەيىن وتباسىمىزدىڭ ساۋلىعى ءۇشىن ۆاكتسينا ەككىزدىم. بالالارىمىزعا قاۋىپتى ۆيرۋستان ساقتانۋدىڭ جولى ۆاكتسينا سالدىرۋ ەكەنىن ۇنەمى ايتىپ وتىرامىن. ونىڭ ۇستىنە قازىر الەۋمەتتىك جەلىدە ۆاكتسيناعا قارسى تەرىس تۇسىنىك قالىپتاستىرىپ, حالىقتى ەكىۇداي پىكىرگە قالدىرىپ وتىرعاندار بار. ەلدىڭ اماندىعىن, جۇرتتىڭ تىنىشتىعىن ويلاساق, تەرىس اقپاراتتارعا شەكتەۋ قويىلۋى كەرەك, – دەپ ەسەپتەيدى قىزىلقوعا اۋدانىنىڭ قۇرمەتتى ازاماتى بايعالي دوسىمباەۆ.
اتىراۋعا ۆاكتسينا سالدىرۋعا پويىزبەن كەلگەن تۇرعىننىڭ ءبىرى – ەرىك جۇبانوۆ (سۋرەتتە). قىزىلقوعا اۋدانىنداعى جانتەرەك تەمىرجول بەكەتىندە ەلەكتريك بولىپ جۇمىس ىستەيدى. جاسى 60-تا.
– كوپتەن بەرى ۆاكتسينا سالدىرۋدىڭ قامىن ويلاپ ءجۇر ەدىم. بىراق جۇمىستان قول بوسامادى. ەندى مىنە, اتىراۋعا الەۋمەتتىك پويىزبەن تەگىن كەلۋگە بولاتىنىن ءبىلىپ, جولعا شىقتىم. بۇعان دەيىن وتباسىمنىڭ مۇشەلەرى رەسەيلىك سپۋتنيك V ۆاكتسيناسىن سالدىردى. مەن دە وسى ۆاكتسينانى ەكتىرۋگە شەشىم قابىلداپ وتىرمىن. ويتكەنى قانداي قاۋىپتى ىندەت بولسا دا ادامدى ۆاكتسينا عانا قورعاي الادى. تەگىندە ساقتانعان ادام عانا ساۋ جۇرەتىنىن ەستەن شىعارماعانىمىز ءجون, – دەيدى ە.جۇبانوۆ.
شالعايداعى اۋىلداردىڭ تۇرعىندارىن ۆاكتسينا الۋ ءۇشىن وبلىس ورتالىعىنا جەتكىزەتىن الەۋمەتتىك پويىز ەندى قۇرمانعازى اۋدانىنان قاتىنايدى. سەبەبى بۇل اۋدان دا اتىراۋ قالاسىنان تىم الىستا ورنالاسقان. قازىر اۆتوموبيل جولىنا كۇردەلى جوندەۋ جۇرگىزىلىپ جاتقاندىقتان, كولىكپەن قاتىناۋ مۇمكىن بولماي وتىر.
ال كارانتيندىك شەكتەۋ تالابىن بۇزىپ, جاسىرىن تۇردە ۇيلەنۋ, قىز ۇزاتۋ تويىن, مەرەيتوي مەن اس وتكىزەتىندەر ازايار ەمەس. مىڭ كۇندىك ساۋلىقتان گورى, ءبىر كۇندىك تابىستى كوزدەگەن مەيرامحانالار الەمدى قاۋىپتى ۆيرۋس جاۋلاپ تۇرعاندا توي-دۋمان وتكىزۋشىلەردەن تاپسىرىس قابىلداۋدى توقتاتپاي وتىر. ەندى وسىنداي مەيرامحانالار پوليتسيا قىزمەتكەرلەرىنىڭ باقىلاۋىنا الىندى. وبلىستىق پوليتسيا دەپارتامەنتىنىڭ ءباسپاسوز قىزمەتى تاراتقان اقپاراتقا قاراعاندا, مەيرامحانالاردا وتباسىلىق, مەرەيتويلىق جيىن-تويلاردى وتكىزۋدىڭ الدىن الۋ ءۇشىن تاۋلىك بويى پوليتسيانىڭ جاياۋ پاترۋلدەۋ جاساقتارى جۇمىلدىرىلىپ وتىر. مۇنداي شارا وبلىس اكىمدىگىنىڭ كوروناۆيرۋس ىندەتىنىڭ تارالۋىنا جول بەرمەۋ ماقساتىنداعى نۇسقاۋىنا سايكەس قابىلدانىپتى. قازىر پوليتسيا قىزمەتكەرلەرىنىڭ جاياۋ پاترۋلدەۋ جاساقتارى اتىراۋ قالاسىنداعى ءىرى 14 مەيرامحانانىڭ جانىندا تاۋلىك بويى كەزەكشىلىك اتقارۋعا كىرىستى.
اتىراۋ وبلىسى
