ۇيلەنۋ تويىنا كەلگەن 300-گە جۋىق قوناق قاراڭعىدا قالىپ, ءاپ-ساتتە ابىگەرگە ءتۇستى. ەسكەرتۋسىز وشكەن جارىق جانە ۇرەيلى داۋىستار, ورىندارىنان اسىعىس تۇرىپ قاراڭعىدا سۇرىنە-قابىنا شىعار ەسىكتى ىزدەگەن قوناقتار... ءالىپتىڭ ارتىن باعىپ, اۋلاداعى سارايعا تىعىلعاندار... ءبىرى بالاسىن, ءبىرى شالىن ىزدەگەن ايەلدەردىڭ داۋىسى... ءيا, تويدىڭ شىرقى ءۇيدىڭ ۇستىنەن درونمەن بەينەجازبا تۇسىرىلە باستاعانىن كورگەن توي يەسىنىڭ «درون ۇشتى, تەز جارىقتى وشىرىڭدەر, جينالعان كوپشىلىك كورىنبەسىن!» دەگەن سوزىنەن كەيىن بۇزىلعان ەدى. قوناقتار تەز تارقاپ, توي جايىنا قالدى. وسىلايشا, قاقپادان ەمەس, ءۇيدىڭ ۇستىنەن تۇسىرىلگەن بەينەجازبا ارقىلى وتباسىلىق جيىن اشكەرە بولدى. بۇل – تۇركىستان وبلىسى سايرام اۋدانىندا بولعان وقيعا. اۋداندىق ءموبيلدى توپ جانە ءتارتىپ ساقشىلارى توي يەلەرىنە ءتيىستى شارا قولداندى.
بۇگىندە ەپيدەميالىق احۋال ماتريتساسى بويىنشا تۇركىستان وبلىسى «جاسىل ايماقتا» بولعانىمەن, ينفەكتسيانىڭ تارالۋىن بولدىرماۋ ءۇشىن بىرقاتار شەكتەۋ شارالارى قابىلدانعان. سالتاناتتى, وتباسىلىق جانە باسقا دا بۇقارالىق ءىس-شارالاردى وتكىزۋگە قاتاڭ تىيىم سالىنعان. دەگەنمەن توي تىيىلار ەمەس. سايرام اۋدانى اكىمدىگىنىڭ ءموبيلدى توپ مۇشەلەرى مەن اۋداندىق پوليتسيا باسقارماسىنىڭ قىزمەتكەرلەرى قارابۇلاق اۋىلدىق وكرۋگىندە جۇرگىزىلگەن رەيدتىك ءىس-شارا بارىسىندا سايرام قاقپا كوشەسىنىڭ تۇرعىنى سالتاناتتى جيىن وتكىزىپ جاتقانىن انىقتاعان. ناتيجەسىندە, توي توقتاتىلىپ, كارانتين تالاپتارىن بۇزعان ازاماتقا قاتىستى اقبتك-ءنىڭ 425-بابىنا سايكەس ءتيىستى شارا قولدانۋ ءۇشىن جيناقتالعان ءىس-قۇجاتتار تولتىرىلدى. بۇل – قارابۇلاق ەلدى مەكەنىندە كارانتيندىك شەكتەۋلەرگە قاراماستان وتكەن ءبىر كۇندەگى ەكىنشى مەرەكە. ەكەۋى دە – ۇيلەنۋ تويى. توي يەسىنىڭ ءموبيلدى توپ مۇشەلەرىنە «نە پروبلەما, 83 340 تەڭگە تولەي سالامىن, نيكاكوي پروبلەم نەت, تولەي سالامىز» دەگەنى دە كوپشىلىكتى تاڭعالدىرىپ وتىر.
سايرامدا عانا ەمەس, تويدى «تىعىلىپ» جاسايتىندار وزگە اۋدانداردا دا بارشىلىق. جالپى, تۇركىستان وبلىسىنىڭ پوليتسەيلەرى جىل باسىنان بەرى 734 توي-جيىن تىركەدى. ماسەلەن, ورداباسى اۋداندىق پوليتسيا ءبولىمىنىڭ ءتارتىپ ساقشىلارى ءوز ءۇيىنىڭ اۋلاسىندا «بەتاشار» وتكىزىپ جاتقان تۇرعىندى انىقتادى. تەكسەرۋ كەزىندە تويعا 60-قا جۋىق ادام جينالعانى بەلگىلى بولدى. وسىعان ۇقساس تاعى ءبىر جايت وتىرار اۋدانىندا دا انىقتالدى. وندا جەرگىلىكتى تۇرعىن كارانتين رەجىمىنە قاراماستان ۇيىنە 50-دەن اسا ادامدى جيناپ, كەلىن ءتۇسىرىپ, «بەتاشار» وتكىزگەن. توي يەلەرىنە قاتىستى زاڭعا سايكەس اكىمشىلىك شارا بەلگىلەندى. تويدى الاڭسىز, ەشكىمنەن جاسىرىنىپ, تىعىلماي-اق اتقاراتىن كەز دە كەلەر. ول ءۇشىن ەڭ الدىمەن ىندەتكە قارسى ەكپە سالدىرۋدان باستاپ, بارلىق تالاپتى ورىنداۋ قاجەت. ايتا كەتەلىك, بۇل ورايدا وبلىس ەكپە سالدىرۋدان وڭىرلەر اراسىندا الدىڭعى قاتاردا كەلەدى.
وبلىستىق قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ كەلتىرگەن دەرەكتەرگە جۇگىنسەك, 724 406 ادام ۆاكتسينانىڭ ءبىرىنشى كومپونەنتىن سالدىرعان. ال ەكىنشى قۇرامدى 543 377 ادام قابىلدادى. ءبىر تاۋلىك ىشىندە وبلىستا 2 296 ادام ەكپە سالدىرۋعا نيەت بىلدىرگەن. جالپى, ەكپە باستالعالى وڭىرگە 736 460 دوزا ۆاكتسينا جەتكىزىلدى. جىل باسىنان بەرى ۆاكتسينا سالۋ بەكەتتەرىنىڭ سانى ارتىپ وتىرعان. تەك تامىز ايىنىڭ ىشىندە 128-دەن 141-گە دەيىن جەتكەن.
«وڭىرگە قىتايدا وندىرىلگەن Vero Cell ۆاكتسيناسىنىڭ 52 مىڭ دوزاسى جەتكىزىلدى. بۇگىندە ونىڭ 40 مىڭنان استامى سالىنعان. جاڭا ۆاكتسينانى ساقتاۋدىڭ تەمپەراتۋرالىق رەجىمى QazVac ەكپەسىنە سايكەس كەلەدى. ەندى وبلىس تۇرعىندارى رەسەيلىك سپۋتنيك V, وتاندىق QazVac, Sinopharm كومپانياسىنىڭ HayatVax ەكپەسى, قىتايدىڭ جاساپ شىعارعان CoronaVac جانە Sinopharm كومپانياسىنىڭ Vero Cell ۆاكتسيناسىن قابىلداي الادى», دەيدى م.پاشيموۆ.
وڭىردە سوڭعى تاۋلىكتە ىندەت جۇقتىرۋدىڭ 56 جاعدايى انىقتالدى. تاۋلىكتىك ءوسىم – 0,45%. مامانداندىرىلعان ينفەكتسيالىق ستاتسيونارلاردا بارلىعى 3 600 ورىن بار, 2 019 توسەكتىك ورىن بوس. ينفەكتسيالىق ستاتسيوناردا 1 581 ناۋقاس, ال كوروناۆيرۋس ينفەكتسياسىمەن 201 ناۋقاس ەم قابىلداۋدا. پاندەميا باستالعالى ىندەتتىڭ 12 328 جاعدايى تىركەلگەن. ونىڭ 653-ىندە سيمپتوم بايقالماعان. جالپى جۇقتىرعانداردىڭ دەنى – 20-49 جاستاعىلار.
ايتا كەتەيىك, پاندەميا باستالعالى 10 667 ناۋقاس ىندەتتەن تولىق ايىققان. جالپى, 960 017 پتر سىناماسى الىنعان. وبلىستاعى مەكەمەلەردە 8 وتتەگى ستانساسى, 400 ءوجت, مىڭنان اسا وتتەگى اپپاراتى بار. سونداي-اق ەكى ايعا جەتەتىن ءدارى-دارمەك قورى جاساقتالعان.
تۇركىستان وبلىسى
