ەسىمى ۇلت جادىنان ۇمىتىلمايتىن تۇلعالار بولادى. سونداي تۇعىرلى تۇلعانىڭ ءبىرى ءھام بىرەگەيى جۇمابەك تاشەنوۆ ەدى. الاش بالاسى ءۇشىن نەسىمەن ەرەك, نەسىمەن بولەك بۇل ەسىم؟ ونى دا ايتايىق. ج.تاشەنوۆ ۇكىمەت توراعاسى رەتىندە رەسپۋبليكانىڭ ساياسي, ەكونوميكالىق, مادەني دامۋىنا باسشىلىق جاساعان جىلدارى قازاق مەملەكەتىنىڭ اۋماق تۇتاستىعىنىڭ ساقتالۋىنا كوپ ەڭبەك ءسىڭىردى. ماڭعىستاۋدى تۇرىكمەنستانعا قوسۋ جونىندەگى ۇسىنىستارعا تويتارىس بەردى. تىڭ ولكەسىنە بىرىكتىرىلگەن ەلىمىزدىڭ بەس بىردەي سولتۇستىك وبلىسىن رەسەيگە, وڭتۇستىك قازاقستاننىڭ ماقتا ەگەتىن اۋداندارىن وزبەكستانعا بەرۋگە قارسى شىقتى. قازاقستان جەرىندە يادرولىق جارىلىستار جاساۋعا قارسىلىق ءبىلدىردى. اقىر سوڭىندا ارىستان جۇرەك ازاماتقا «ۇلتشىل» دەگەن ايىپ تاڭىلىپ, ن.حرۋششەۆتىڭ نۇسقاۋىمەن قىزمەتىنەن بوساتىلعان.
ءيا, بۇگىنگى تاۋەلسىز قازاقستان 2 724 902 شارشى شاقىرىم جەر كولەمىمەن دۇنيەجۇزىندە 9-ورىنعا تابان تىرەپ تۇرعان بولسا, ول ءۇشىن كەڭ-بايتاق جەرىمىزدى اق نايزانىڭ ۇشىمەن, اق بىلەكتىڭ كۇشىمەن قورعاپ, ۇرپاعىنا اماناتتاعان جاۋجۇرەك اتا-بابالارىمىزبەن قاتار, ج.تاشەنوۆ سىندى قايراتكەرگە دە قارىزدارمىز. ونى حالىق ۇمىتقان ەمەس. ۇمىتپايدى دا. وسىنداي ەرەن ەرلىكتەرى ءۇشىن بولار, ءبىر كەزدەرى ء«ار ۋاقىتتا مەنىڭ جۇرەگىمنىڭ تورىنەن ورىن الاتىن مەنىڭ ەر ءىنىم – جۇمابەك», دەپ تەبىرەندى جازۋشى عابيت مۇسىرەپوۆ. «ج.تاشەنوۆ قانداي قىزمەتتە بولسا دا – ەڭ الدىمەن ءوز ەلىنىڭ ماقسات-مۇددەسىنەن شىعاتىن, حالىقتىڭ جاعدايىن ويلايتىن, ۇلتتىق ماسەلەلەردى كسرو باسشىلارىنىڭ الدىندا تايسالماي قوياتىن, جۇرەگى قازاق دەپ سوعاتىن ءبىرتۋار ازامات ەدى», دەپ تولعاندى حالىق قاھارمانى ساعادات نۇرماعانبەتوۆ.
– بۇگىن كورنەكتى مەملەكەت قايراتكەرى, ەلىمىزدىڭ گۇلدەنۋىنە ۇلكەن ۇلەس قوسقان جۇمابەك تاشەنوۆكە ەسكەرتكىش اشىپ وتىرمىز. وسىعان دەيىن نۇر-سۇلتاندا ۇلى تۇلعامىزعا كوشە اتى بەرىلگەن بولسا, جۋىردا مەكتەپكە ەسىمى قويىلدى. ەندى مىنە, كەزەك ەسكەرتكىشكە كەلىپ وتىر. اعامىزدىڭ ءمۇسىنى كوميسسيا مۇشەلەرىنىڭ, زيالى قاۋىم وكىلدەرىنىڭ, ۇرپاقتارىنىڭ كەلىسىمىمەن قۇيىلدى. بۇگىنگە دەيىن نۇر-سۇلتاندا ەلمىزدىڭ تانىمال تۇلعالارىنا ارنالعان بىرقاتار ەسكەرتكىش اشىلدى. تاۋەلسىزدىگىمىزدىڭ 30 جىلدىعى قارساڭىندا پاندەمياعا قاراماستان, ەلىمىزدىڭ رۋحانياتىن كوتەرەتىن باستامالار ءارى قاراي دا جالعاسا بەرەدى, – دەدى ەسكەرتكىشتىڭ اشىلۋ سالتاناتىنا قاتىسقان نۇر-سۇلتان قالاسى اكىمىنىڭ ورىنباسارى اسحات ورالوۆ.
مەملەكەت جانە قوعام قايراتكەرى مىرزاتاي جولداسبەكوۆ ەلىمىزدىڭ وركەندەۋى جولىندا ەڭبەك ەتكەن اسىل ازاماتتارىمىز از بولماعانىن, سولاردىڭ اراسىندا جۇمابەك تاشەنوۆتىڭ شوقتىعى بيىك ەكەنىن ايرىقشا اتاپ ءوتتى. سول سياقتى حالقىمىزدىڭ اردا تۇلعاسىنا ارنالعان ەسكەرتكىش قالامىزدىڭ كورىكتى ورىندارىنىڭ بىرىنەن اشىلىپ وتىرعانىن ايتا كەلە, ەل رۋحانياتىنىڭ دامۋى جولىندا ەڭبەك ەتىپ جاتقان قالا اكىمدىگىنە العىسىن ءبىلدىردى.
– بۇگىنگى مەملەكەتتىك تۇلعاعا اشىلىپ وتىرعان ەسكەرتكىش – تاۋەلسىزدىكتىڭ جارقىن جەمىسى. تاريحي تۇلعامىزدىڭ ءمۇسىنى ەلوردامىزدىڭ تورىنە ورناتىلىپ وتىر. قۋانىشىمىز قۇتتى بولسىن! جۇمابەك تاشەنوۆ ءوز ەلىنىڭ پەرزەنتى رەتىندە ەل الدىنداعى پارىزىن وتەگەن تۇلعا دەپ ەسەپتەيمىز, – دەدى مەملەكەت جانە قوعام قايراتكەرى ورالباي ابدىكارىموۆ.
ۇرپاقتارىنىڭ اتىنان ۇلى سايان جۇمابەك ۇلى مەن كەلىنى فاتيما سادىققىزى ءسوز سويلەپ, ەلباسىنا, مەملەكەت باسشىسىنا العىسىن ءبىلدىردى. «جۇرت مەنەن اكەڭنىڭ اتىن نەلىكتەن ناسيحاتتامايسىڭ, ەلگە سىڭىرگەن ەڭبەگىن نە ءۇشىن ايتپايسىڭ؟» دەپ سۇراپ جاتادى. مەنىڭ ويىمشا ەلگە سىيلى ازاماتتىڭ ەڭبەگىن حالقى ءوزى باعالاۋعا ءتيىس. بۇگىنگى اشىلىپ وتىرعان ەسكەرتكىش حالىقتىڭ اكەمە دەگەن سىي-قۇرمەتى دەپ بىلەمىن», دەدى سايان جۇمابەك ۇلى.
ەسكەرتكىشتىڭ ساۋلەتشىسى – ق.قورعانوۆ, ءمۇسىنشى – ە.ەرجانوۆ. ءمۇسىن قولادان قۇيىلىپ, تۇعىرى گرانيتتەن قالاندى. ەسكەرتكىشتىڭ جالپى بيىكتىگى – 8,2 مەتر.
