جارقىراعان جازدا 10 اۋداندا ەكى اپتادا بىردە-ءبىر تويدىڭ وتپەۋى مۇمكىن ەمەس ەكەنى بەلگىلى. تەك مونيتورينگتىك توپتار ولاردى كورمەگەن نەمەسە «كورمەگەن بولعان». ارينە, قالىپتاسىپ قالعان ءداستۇردى قورقىتۋمەن, ايىپپۇل سالۋمەن ءبىر مەزگىلدە توقتاتۋ قيىن. ادامدار تويعا اسىعادى, ونى جاساعانشا, قىزىق كورگەنشە جان تاپپايدى. بىراق قازىرگى احۋال قىسىپ, ىندەت كۇننەن-كۇنگە ۇلعايىپ جاتقاندا سابىر ساقتاپ, ءوزىنىڭ دە, وزگەنىڭ دە دەنساۋلىعى ءۇشىن تويدى كەيىنگە قالدىرۋعا بولادى عوي. وسىنى تۇسىنبەگەن ادامداردى اياۋعا دا بولمايدى.
وسىنداي ادامدارعا ايىپپۇل سالۋ ءۇشىن عانا ەمەس, دەنساۋلىقتارىن ساقتاۋ ءۇشىن قۇرىلعان قىزىلجار وڭىرىندەگى مونيتورينگتىك توپتاردىڭ سانى – 24. ولاردىڭ قاتارىنا اكىمدىكتىڭ, پوليتسيانىڭ, ۆولونتەرلەردىڭ قاتارىنان 160 ادام ەنگەن. تەكسەرۋلەر ءار اپتانىڭ اياعىنا قاراي جيىلەنەدى.
وزدەرىنىڭ اتىنا ايتىلعان سىننان سوڭ مونيتورينگتىك توپتار جۇمىستارىن بەلسەندىرەك جۇرگىزۋگە اينالدى. سوڭعى 7 كۇندە ولار 28 بۇزۋشىلىقتى انىقتادى. اسىرەسە, پەتروپاۆل قالاسىنىڭ ساۋىقجايلارى, ءدامحانالارى, جالعا بەرىلەتىن كوتتەدجدەرى ءجىتى تەكسەرىلدى. سونىمەن بىرگە سانيتارلىق نورماتيۆتەردىڭ ساقتالۋىن باقىلاۋ بارلىق ساۋدا ورىندارىندا دا ۇيىمداستىرىلعان.
وتكەن اپتاداعى ءبىر «ولجا» قالانىڭ «بەرەكە» شاعىن اۋدانىندا بولدى. وسىنداعى جەكەمەنشىك ۇيلەردىڭ اراسىنداعى ءبىر ءدامحانادا تۋعان كۇن تويلانىپ جاتقانىنىڭ ۇستىنەن تۇسكەن مونيتورينگتىك توپ جيىندى ۇيىمداستىرۋشىلار مەن قوناقتاردىڭ ۇستىنەن حاتتاما تولتىردى. ول شارا قولدانىلۋى ءۇشىن ءتيىستى ورگانعا جىبەرىلدى. مۇندا ءۇي يەسى مەن قوناقتاردىڭ ءبارى دە مونيتورينگتىك توپتىڭ جۇمىسىنا كەدەرگى جاساماي, ولاردىڭ تالابىن ورىنداعان. دەمەك ءبارى دە ساقتاندىرۋ شارالارىنىڭ بولعانىن قالايدى, بىراق بىلە تۇرا وزدەرى ونى بۇزعان.
جالپى, وبلىس بويىنشا جىل باسىنان بەرى 1 059 كارانتين تالاپتارىن بۇزعان جاعداي انىقتالعان. ونىڭ ىشىندە 941-ءى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنە جىبەرىلگەن. ال قالعان 118 ماتەريال بويىنشا تولىقتىرۋ جۇمىستارى جۇرگىزىلۋدە. سانيتارلىق-ەپيدەميولوگيالىق باقىلاۋ دەپارتامەنتىنىڭ ءوز قىزمەتكەرلەرى 627 اكىمشىلىك حاتتاما تولتىرعان. زامانا تالابىمەن امالسىز ۇيىمداستىرىلعان مونيتورينگتىك توپتىڭ جۇمىسى ودان ءارى جالعاسۋدا.
سولتۇستىك قازاقستان وبلىسى
