كومپانيا باسشىلىعى اتالعان كاسىپورىن ەل نارىعىندا 1998 جىلدان بەرى جۇمىس ىستەپ كەلە جاتقانىن ايتتى.
بۇگىنگى تاڭدا 372 ادام ەڭبەك ەتىپ جاتقان كاسىپورىن 160-تان استام ءونىم شىعارادى. ولاردىڭ اراسىندا قازىرگى ۋاقىتتا اسا قاجەت مەديتسينالىق قولعاپتار, ءۇش جانە ءتورت قاباتتى بەتپەردەلەر, حالاتتار, ءدارى-دارمەكتەر بار. كومپانيانىڭ جىلدىق قارجى اينالىمى 8,4 ميلليارد تەڭگەنى قۇرايدى.
سونداي-اق, قاسىم-جومارت توقاەۆ وبلىستاعى دەنساۋلىق ساقتاۋ سالاسىنىڭ جاعدايى تۋرالى بايانداما تىڭدادى.
الماتى وبلىسىندا كوروناۆيرۋسپەن كۇرەسۋگە ارنالعان ءىس-شارالار اياسىندا قىسقا مەرزىمدە 200 توسەكتىك جۇقپالى اۋرۋلار اۋرۋحاناسى سالىنىپ, 180 جەدەل جاردەم كولىگى مەن 12 جىلجىمالى مەديتسينالىق كەشەن ساتىپ الىنعان. وبلىستىڭ 17 اۋرۋحاناسى وتتەگى ستانتسيالارىمەن قامتاماسىز ەتىلىپ, توسەك-ورىنداردىڭ 45 پايىزى وكسيگەنوتەراپيامەن قامتىلعان. ەم مەكەمەسىندە 17 كومپيۋتەرلىك توموگراف, 53 رەنتگەن, 75 حاي فلۋ, 606 جەلدەتۋ اپپاراتى قوسىلىپ, جۇمىس ىستەپ تۇر.
بۇگىندە وبلىس حالقىنىڭ 649 مىڭ تۇرعىنى ەكپەنىڭ ءى كومپونەنتىن, 510 مىڭى II كومپونەنتىن سالدىرعان. بۇل وبلىس حالقىنىڭ 60 پايىزى ۆاكتسينامەن قامتىلعانىن كورسەتەدى.
قاسىم-جومارت توقاەۆ وبلىس باسشىلىعىنا وڭىردەگى ەپيدەميولوگيالىق جاعدايدى تۇراقتى باقىلاۋدا ۇستاپ, ۆاكتسيناتسيا قارقىنىن نازاردا ۇستاۋدى تاپسىردى.
