«قازاقستان رەسپۋبليكاسى ۇلتتىق قاۋىپسىزدىك كوميتەتى مەن «قر ۇقك ورگاندارىنىڭ ارداگەرلەرى رەسپۋبليكالىق قوعامدىق بىرلەستىگى» قر پرەزيدەنتى كۇزەت قىزمەتى باستىعىنىڭ بۇرىنعى ورىنباسارى - ۇكىمەتتىك بايلانىس اگەنتتىگىنىڭ ديرەكتورى, قر ۇقك ارداگەرلەر كەڭەسىنىڭ توراعاسى, وتستاۆكاداعى گەنەرال-مايور جاقىپبەكوۆ سابەت مالعاجدار ۇلىنىڭ قايتىس بولۋىنا بايلانىستى تۋىستارى مەن جاقىندارىنا قايعىرىپ كوڭىل ايتادى», دەلىنگەن ۆەدومستۆو حابارلاماسىندا.
گەنەرال-مايور سابەت جاقىپبەكوۆ 20 جىلدان اسا قازاقستاننىڭ ۇكىمەتتىك بايلانىسىن تابىستى باسقاردى جانە رەسپۋبليكامىز بەن تمد ەلدەرىندەگى وسى قىزمەتتىڭ ەڭ تانىمال باسشىلارىنىڭ ءبىرى بولدى. ول ءوز ءىسىن قازىرگى ۋاقىتتا دا جالعاستىرىپ كەلە جاتقان جوعارى كاسىبي ماماندار توبىن تاربيەلەگەن.
جەتىستىكتەرى ءۇشىن گەنەرال سابەت جاقىپبەكوۆ "قۇرمەت بەلگىسى" وردەنىمەن, قازاق كسر جوعارعى كەڭەسى پرەزيديۋمىنىڭ قۇرمەت گراموتالارىمەن جانە مەدالدارمەن ماراپاتتالعان. "كسرو مقك قۇرمەتتى قىزمەتكەرى", "قر ۇقك قۇرمەتتى قىزمەتكەرى", "رەسەي فەدەراتسياسى پرەزيدەنتى جانىنداعى ۇكىمەتتىك بايلانىس فەدەرالدى اگەنتتىگىنىڭ قۇرمەتتى قىزمەتكەرى", "قۇرمەتتى بايلانىسشى" بەلگىلەرىمەن ماراپاتتالعان.
وتستاۆكاعا شىققاننان كەيىن ول «نۇرسات» تەلەكوممۋنيكاتسيالىق كومپانياسىنىڭ پرەزيدەنتى رەتىندە جۇمىسىن جالعاستىرىپ, قازاقستان رەسپۋبليكاسىنىڭ تاۋەلسىز ۇلتتىق سپۋتنيكتىك بايلانىس جەلىسىن قۇرۋعا قاتىسقان.
