بۇگىندە ءبىلىم بەرەتىن 83 897 پەداگوگتىڭ 71 809-ىنا (85,6%), تەحنيكالىق پەرسونالداردىڭ 27 560-ىنا (96,6%) ۆاكتسينا ەگىلگەن. بۇل كورسەتكىش 100%-دى قۇرايدى. بيىل اتا-انالاردىڭ وتىنىشتەرىمەن 47 266 بالا ءبىرىنشى سىنىپقا قابىلداندى. جاڭا وقۋ جىلىنا جالپى سانى 2 ملن 250 مىڭ دانا وقۋلىق ساتىپ الۋعا 4,8 ملرد تەڭگە قارجى بولىنگەن.
سونىمەن قاتار تامىز ايىنىڭ باسىندا وقۋلىقتاردىڭ تاسىمالىنان ۇنەمدەلگەن قارجىعا, وقۋشىلار سانىنىڭ وسىمىنە بايلانىستى بارلىق سىنىپقا جەتىسپەيتىن جانە ەسكى وقۋلىقتاردى جاڭارتۋ ءۇشىن 826,1 مىڭ دانا وقۋلىق الىنۋدا. بۇل ورايدا 17 باسپامەن وقۋلىقتاردى ساتىپ الۋ جانە تاسىمال بويىنشا كەلىسىمشارت جاسالعان. وقۋلىقتاردىڭ تاسىمالى 25 تامىزدا تولىعىمەن اياقتالادى.
تابيعي ءوسىمى جوعارى وڭىردە مەكتەپ قۇرىلىسى دا قارقىندى جۇرگىزىلۋدە. ناقتىراق ايتساق, بيىل وبلىس بويىنشا جالپى 78 مەكتەپ, ونىڭ 70-ءى وبلىستىق بيۋدجەتتەن, 8-ءى «اۋىل – ەل بەسىگى» جوباسى اياسىندا سالىنىپ جاتىر. بۇدان بولەك تۇركىستان قالاسىندا 720 ورىندىق نازارباەۆ زياتكەرلىك مەكتەبى سالىنۋدا. وبلىستىق ادامي الەۋەتتى دامىتۋ باسقارماسىنىڭ باسشىسى راقىمبەك جولاەۆتىڭ مالىمدەۋىنشە, قۇرىلىسى جۇرگىزىلىپ جاتقان 78 مەكتەپتىڭ 15-ءىن ءبىرىنشى قىركۇيەكتە, 44-ءىن جىل سوڭىنا دەيىن پايدالانۋعا بەرۋ جوسپارلانعان. وڭىردە 6 اپاتتى جانە 4 ءۇش اۋىسىمدى مەكتەپ بار. بيىل 2 اپاتتى جانە 1 ءۇش اۋىسىمدى مەكتەپتىڭ ماسەلەسى شەشىلەدى. ايتا كەتەلىك, Nur Otan پارتياسىنىڭ «وزگەرىستەر جولى: ءار ازاماتقا لايىقتى ءومىر!» اتتى سايلاۋالدى باعدارلاماسىنا سايكەس 2025 جىلعا قاراي وڭىردە 130 مەكتەپ سالۋ جوسپارلانعان. بيىل باعدارلاما اياسىندا جالپى 47 مەكتەپ قۇرىلىسى جوسپارلانعان. ونىڭ 17-ءسى 1 قىركۇيەككە پايدالانۋعا بەرىلىپ, قالعانى جىل سوڭىنا دەيىن اشىلادى دەپ جوسپارلانۋدا. سونداي-اق وبلىس بويىنشا 12 مەكتەپتىڭ كۇردەلى جوندەۋ جۇمىستارىنا 2,8 ملرد تەڭگە قارجى قاراستىرىلعان. بەس مەكتەپتە جوندەۋ جۇمىستارى تامىز ايىنىڭ سوڭىندا اياقتالسا, قالعان التاۋى جىل سوڭىنا دەيىن پايدالانۋعا بەرىلەدى. ءبىر مەكتەپتىڭ جۇمىسى كەلەسى جىلى بىتەدى. سونىمەن قاتار جەرگىلىكتى بيۋدجەت ەسەبىنەن 18 مەكتەپكە 86 ملن تەڭگەگە اعىمداعى جوندەۋ جۇمىستارى جۇرگىزىلدى. ال 100-گە جۋىق مەكتەپتىڭ اسحانالارىن جوندەۋ, 108 مەكتەپتىڭ كىتاپحانالارىن جاڭعىرتۋ جۇمىستارى قولعا الىنعان.
وقۋشىلاردىڭ قاۋىپسىزدىگىن قامتاماسىز ەتۋ ماقساتىندا وبلىستا 900 مەملەكەتتىك مەكتەپ تولىعىمەن بەينەباقىلاۋ جۇيەسىمەن قامتاماسىز ەتىلگەن. وبلىستاعى ءبىلىم وردالارىن مامانداندىرىلعان كۇزەت پەن «دابىل باتىرمالارىمەن» قامتۋدى كەزەڭ-كەزەڭىمەن شەشۋ جوسپارلانۋدا. بىلتىر 756 مەكتەپتى ىشكى اجەتحانالارمەن قامتاماسىز ەتۋ جوسپارلانعان. وتكەن جىلى – 679, بيىل 20 مەكتەپتىڭ ىشكى اجەتحانالارى رەتكە كەلتىرىلدى. قالعان 57 مەكتەپتىڭ ماسەلەسى 1 قىركۇيەككە دەيىن تولىعىمەن شەشىلمەك. جىلۋ ماۋسىمىنا دايىندىق تا بەلگىلەنگەن كەستە بويىنشا جۇرگىزىلۋدە. وڭىردەگى جىلۋ ماۋسىمىنا دايىندىق جۇمىستارىنا سايكەس 1 279 ءبىلىم نىسانىن گيدراۆليكالىق سىعىمداۋدان وتكىزۋ جۇمىستارى 88%-عا ورىندالعان. ءبىلىم بەرۋ مەكەمەلەرىن 107 مىڭ توننا كومىر جانە 3,5 مىڭ توننا سۇيىق وتىنمەن قامتاماسىز ەتۋ جوسپارلانعان. وبلىس اكىمدىگىنىڭ حابارلاۋىنشا, قازىرگى تاڭدا تاسىمالداۋ جۇمىستارى 40%-عا ورىندالعان.
ورتا ءبىلىم بەرۋ وردالارى دا جاڭا وقۋ جىلىنا دايىندىق جۇمىستارىن پىسىقتاۋدا. جاڭا 2021-2022 وقۋ جىلىنا ورتا ءبىلىمدى كادرلاردى دايارلاۋعا 52 ماماندىق بويىنشا 6 مىڭنان اسا ورىنعا مەملەكەتتىك گرانت بەرىلدى. ونىڭ جارتىسىنان استامى بىلىكتى جۇمىسشى كادرلاردى, قالعانى ورتا بۋىن ماماندارى مەن قولدانبالى باكالاۆريات ماماندارىن دايارلاۋعا باعىتتالعان.
مەملەكەت باسشىسى قاسىم-جومارت توقاەۆتىڭ كوللەدجدەردىڭ تەحنيكالىق جانە كاسىپتىك بىلىمگە كوشۋ ماسەلەلەرىندەگى ستراتەگيالىق باعدارلاردى ايقىنداي وتىرىپ, دامىتۋدى كەشەندى قاراۋ جونىندەگى تاپسىرماسىنا سايكەس وتكەن جىلدىڭ باسىنان باستاپ تۇركىستان وبلىسىندا 10 جىلعا ساتىپ الۋ قۇقىعىنسىز 3 مەملەكەتتىك كوللەدجدى سەنىمگەرلىك باسقارۋعا بەرۋ تۋرالى شەشىم قابىلدانعان بولاتىن. بايقاۋ ناتيجەسى بويىنشا 3 باسقارۋشى كومپانيا انىقتالدى. جاڭا باسقارۋشى كومپانيالار ستۋدەنتتەردى ساپالى بىلىممەن جانە جۇمىسقا ورنالاستىرۋمەن قامتاماسىز ەتۋ بويىنشا وزدەرىنە مىندەتتەمەلەر الدى. سەنىمگەرلىككە بەرگەن كوللەدجدەردە ناتيجە بايقالۋدا. بۇگىندە دۋالدى وقىتۋ فورماتى قولدانىلىپ, وقىتۋدىڭ 40%-ى تەوريا, 60%-ى تاجىريبە تۇرىندە جۇرگىزىلۋدە. ستۋدەنتتەر شاكىرتاقىدان باسقا, ناقتى وندىرىستە تاجىريبەدەن ءوتىپ, جالاقى الۋدا. سالا ماماندارى ستۋدەنتتەردىڭ ساباققا قاتىسۋى 95%-عا دەيىن ارتىپ, زاڭسىز تولەمدەر قىسقارعانىن, وقىتۋشىلارعا وندىرىستىك تاجىريبەگە قاتىسقانى ءۇشىن قوسىمشا تولەمدەر ۇلعايتىلعانىن ايتۋدا. جۇمىسقا ورنالاسقان تۇلەكتەردىڭ ۇلەسى 90%-عا دەيىن وسكەن. ءبىلىم جانە عىلىم مينيسترلىگى تاراپىنان كەلىسىم بەرىلگەن جاعدايدا, بيىل تاعى دا 10 مەملەكەتتىك كوللەدجدى سەنىمگەرلىك باسقارۋعا بەرۋ قاراستىرىلعان. سونداي-اق سەنىمگەرلىك باسقارۋعا ۇسىنىلعان تەحنيكالىق جانە كاسىپتىك ءبىلىم بەرۋ كوللەدجدەرى «جاس مامان» جوباسىنا ەنبەك.
تۇركىستان وبلىسى
