ماسەلەن, باسشى كادرلار رەزەرۆىنىڭ قالىپتاسۋى تومەنگى باسپالداقتان وتكەن مەملەكەتتىك قىزمەتشىلەردىڭ ۇزدىكتەرىن ىرىكتەۋدەن, ياعني ولاردىڭ تومەنگى دەڭگەيدەگى لاۋازىمداردى قالاي اتقارعانىنا باعا بەرۋدەن باستالعانى ءجون. ويتكەنى جاس ازاماتتاردىڭ قارىم-قابىلەتى ولاردىڭ تەوريالىق بىلىمدەرىن تەستىلەۋدەن عانا ەمەس, ايماقتاردا اتقارعان پراكتيكالىق قىزمەتتەرىنىڭ ناتيجەسىنەن ايقىنىراق كورىنەرى كامىل. بۇعان قوسا, بولاشاعىنان ءۇمىت كۇتتىرەتىن جاس مامانداردى ءبىر جاۋاپتى لاۋازىمنان ەكىنشىسىنە شەگىرتكەدەي سەكىرتە بەرمەي, مانساپ باسپالداقتارىمەن بىرتىندەپ, جۇيەلى نەگىزدە وسىرۋگە جەتە ءمان بەرۋ كەرەك سياقتى.
وسى رەتتە ءبىز مەملەكەتتىك قىزمەتكە جاستاردى قابىلداۋ قالاي جۇرگىزىلىپ جاتقانى تۋرالى سولتۇستىك قازاقستان وبلىستىق مەملەكەتتىك قىزمەت ىستەرى دەپارتامەنتىنىڭ باس مامانى گۇلنار سارسەمباەۆادان اقپارات العان ەدىك. الىنعان دەرەكتەرگە قاراعاندا, وبلىستا 2021 جىلدىڭ العاشقى جارتىسىندا «ب» كورپۋسىنىڭ اكىمشىلىك مەملەكەتتىك لاۋازىمدارىنىڭ 108 ورنىنا تۇرۋعا كونكۋرس جاريالانعان ەكەن. سونىڭ 80-ءى – تومەنگى دەڭگەيدەگى مەملەكەتتىك قىزمەتتەر. كونكۋرستا جەڭىپ, لاۋازىمعا تۇرعانداردىڭ 38 پايىزى 29 جاسقا دەيىنگى جاستار بولعان.
وسى كونكۋرستىڭ ناتيجەسىندە جەرگىلىكتى مەملەكەتتىك اتقارۋ ورگاندارىنا 37 قىزمەتكەر ۇسىنىلىپ, تاعايىندالعان. بۇل اتالعان مەرزىمدە مەملەكەتتىك قىزمەتكە تۇرعانداردىڭ 74 پايىزى.
بۇعان دەيىن وبلىستا كونكۋرستان ءوتىپ, مەملەكەتتىك قىزمەتكە تاعايىندالعان جاس ازاماتتاردىڭ 10-ى قازىر وبلىستىق اكىمدىكتە باس ينسپەكتور مەن باس مامان سياقتى لاۋازىمداردى اتقارىپ ءجۇر. بىرەۋى ءباسپاسوز حاتشىسى قىزمەتىنە تۇرعان. ال ۇشەۋى وبلىستىق باسقارمالار باسشىلارىنىڭ ورىنباسارى قىزمەتىن اتقارۋدا. وسىلاردىڭ ىشىندە بىرەۋى – ىشكى ساياسات باسقارماسى باسشىسىنىڭ ورىنباسارلىعىنا 2019 جىلى بولعان پرەزيدەنتتىك جاستار كادرلىق رەزەرۆىنەن كەلگەن.
كونكۋرستان وتكەن جاستاردىڭ ءبىرازى اۋداندىق جانە پەتروپاۆل قالالىق اكىمدىكتەرىندە جاۋاپتى قىزمەتتەر اتقارۋ ۇستىندە. مىسالى, شال اقىن اۋدانى اكىمىنىڭ ورىنباسارى – كونكۋرستان بيىل عانا وتكەن جاس ازامات. ال وعان دەيىن وسى قىزمەتتە بولعان 29-عا تولماعان ازامات ع.مۇسىرەپوۆ اۋدانى اكىمىنىڭ اپپاراتىن باسقارۋعا اۋىسقان. سونداي-اق م.جۇماباەۆ, اقجار, جامبىل, قىزىلجار اۋداندارى اكىمدىكتەرىنىڭ بولىمدەرىن كونكۋرستان وتكەن جاستار باسقارۋدا.
اۋىلدىق وكرۋگتار اكىمدەرى اپپاراتتارىنداعى مەملەكەتتىك قىزمەت لاۋازىمدارىنىڭ كوبىن دە جاستار اتقارۋدا. سونىڭ ىشىندە تايىنشا اۋدانىنداعى ياسنوپوليان, تيميريازەۆ اۋدانىنداعى ەسىل اۋىلدىق وكرۋگتەرىندە ەرمۇقان تەمىرباەۆ پەن سۇندەتوللا پارينوۆ تابىستى ەڭبەك ەتۋدە.
سۇندەتوللا – تۇركىستان وبلىسى, سارىعاش اۋدانىنىڭ تۋماسى. 2014-2017 جىلدارى شىمكەنت قالاسىنىڭ اكىمدىگىندە قىزمەت ىستەگەن. سولتۇستىك قازاقستانعا قونىس اۋدارىپ كەلگەندە الدىمەن تيميريازەۆ اۋدانى اكىمىنىڭ كەڭەسشىسى بولىپ تاعايىندالعان, قازىر ەسىل اۋىلدىق وكرۋگىن باسقارۋدا.
وسى ورايدا قازىرگى حالىق تىعىز قونىستانعان وڭتۇستىك وڭىرلەردىڭ تۇرعىندارىن جۇمىس كۇشى جەتىسپەيتىن سولتۇستىك وڭىرلەرگە ەرىكتى تۇردە قونىس اۋدارۋ باعدارلاماسى ىسكە اسىرىلىپ جاتقان كەزدە سۇندەتوللا سىندى جاس مەملەكەتتىك قىزمەتشىلەردىڭ دە كوبىرەك كوشىپ كەلۋ مۇمكىندىگىن قاراستىرعان دا ءجون-اۋ دەگەن وي كەلەدى. مۇنىڭ ءوزى قونىس اۋدارۋشىلاردىڭ مۇقتاجدىقتارىن ۋاقتىلى ءبىلىپ, دەر كەزىندە شەشۋگە, ولاردىڭ جاڭا ورتاعا تەزىرەك بەيىمدەلۋىنە وڭ اسەرىن تيگىزەرى انىق.
مامليۋت اۋدانىنىڭ ستانوۆوي اۋىلدىق وكرۋگىنىڭ اكىمى بولىپ انجەليكا وسيكوۆا تاعايىندالعان. جەرگىلىكتى ۋنيۆەرسيتەتتى بىتىرگەننەن كەيىن ول مامليۋت اۋداندىق اكىمدىگىنە تومەنگى لاۋازىمدىق قىزمەتتەردە ىستەگەن. ءوزىنىڭ ورنى – حالىقپەن جۇمىس ىستەپ, ونىڭ مۇڭ-مۇقتاجىن شەشۋدە ەكەنىن سەزگەن قىز مەملەكەتتىك قىزمەتشىلەر كونكۋرسىنان ءوتىپ, سوڭعى ەكى جىلدا اۋىل اكىمى لاۋازىمىن تابىستى اتقارىپ كەلەدى. تۇرعىنداردىڭ كوڭىلىنەن شىعۋدى عانا كوزدەگەن ونى تۇرعىندار دا جاقسى كورەدى.
ع.مۇسىرەپوۆ اتىنداعى اۋدانداعى چيستوپول اۋىلدىق وكرۋگىنىڭ اكىمى قانات امانتاەۆ تا كونكۋرستان ءوتىپ تاعايىندالعان جاس جىگىت. ءوزىنىڭ قىزمەت جولىن وسى اكىمدىكتەگى تومەنگى لاۋازىمنان باستاعان ول جەرگىلىكتى تۇرعىنداردىڭ پروبلەمالارىن جاقسى ءبىلىپ, ولاردى شەشۋ جولىندا بەلسەندى ەڭبەك ەتۋدە.
«جاس كەلسە – ىسكە» دەمەكشى, قىزىلجار وڭىرىندە جاس مامانداردىڭ مانساپتىق جىلجۋى ءبىرشاما جاقسى جولعا قويىلعان دەپ ايتۋعا بولادى. وسىنداي, اسىرەسە اۋىلدىق جەرلەردە «جۇزدەن جۇيرىك شىعىپ» جۇرگەن ورەندەر الداعى ۋاقىتتا پرەزيدەنتتىك جاستار كادرلىق رەزەرۆىنە باسىمدىقپەن الىنىپ, اۋداندارداعى باسشىلىق قىزمەتتەرگە دەر كەزىندە جىبەرىلىپ وتىرسا, قۇبا-قۇپ. تۇبىندە ءوڭىردى دە, اۋىلدى دا وركەندەتەتىندەر دە استانادان اينالسوقتاپ شىقپايتىن «اسفالتتا وسكەندەردىڭ» ىشىنەن ەمەس, شالعايداعى ەلدى مەكەندە حالىققا قالتقىسىز قىزمەت ەتىپ جۇرگەن جاس مامانداردىڭ اراسىنان شىعارى كۇمانسىز.
