ەكولوگيا • 19 تامىز، 2021

الماتىعا كىرەتىن جولدارعا 19 ەكوپوست قويىلادى

الماتى قالاسىنىڭ جاسىل ەكونوميكا باسقارماسىنىڭ باسشىسى ناتاليا ليۆينسكايانىڭ ايتۋىنشا، ەكوپوستتار ارنايى قوندىرعىلارمەن – گاز اناليزاتورلارى مەن ءتۇتىن ولشەۋىشپەن جابدىقتالعان، دەپ حابارلايدى Egemen.kz.

گاۋھار قاپاش

ن.ليۆينسكايا اتاپ وتكەندەي، مەگاپوليستەگى اۋانى نەگىزگى لاستاۋشى – اۆتوكولىك، ستاتسيونارلىق كوزدەر جانە جەكە سەكتور.

ونىڭ ايتۋىنشا، زالالدى شىعىندار 128 مىڭنان 70 مىڭ تونناعا دەيىن تومەندەگەن. ال جەكە سەكتوردان 16 مىڭنان 1 مىڭ تونناعا دەيىن.

سونىمەن بىرگە ستاتسيونارلىق كوزدەردەن شىعاتىن قالدىقتاردىڭ ءوسۋى بايقالادى، بۇل كورسەتكىشتەر جەو-2 جۇمىسىمەن بايلانىستى.

«بارلىق قالالىق اۆتوبۋستاردى گاز بەن ەلەكتر ەنەرگياسىنا كوشىرۋ جۇمىستارى باستالدى. مىسالى، 2020 جىلى گازبەن جۇرەتىن 150 اۆتوبۋس ساتىپ الىندى. ال بيىل گاز بەن ەلەكتر ەنەرگياسىن پايدالاناتىن قوعامدىق كولىكتەردىڭ 500-گە جۋىق بىرلىگىن ساتىپ الۋ جوسپارلانىپ وتىر»، دەدى جاسىل ەكونوميكا باسقارماسىنىڭ باسشىسى.

ونىڭ ۇستىنە، ن. ليۆينسكايانىڭ ايتۋىنشا، الماتىدا تىركەلگەن كولىكتەردىڭ جالپى سانىنان اۆتوبۋستاردىڭ ۇلەسى 1 پايىزعا دا جەتپەيدى. سوندىقتان ونىڭ پىكىرىنشە، جەكە كولىكتەردى جۇيەلى تۇردە جاڭارتىپ، كولىكتەرى اقاۋلى جانە قورشاعان ورتاعا زياندى اۆتوكولىك يەلەرىنە شارا قولدانۋ قاجەت.

«الماتىدا قالانىڭ كىرەبەرىستەرىنە 19 ەكولوگيالىق پوست ورناتۋ بويىنشا جۇمىس جۇرگىزىلۋدە. بۇگىنگىدە 9 ەكولوگيالىق پوست قۇرىلدى، قالعان 10 پوست وسى جىلدىڭ كۇزىنە دەيىن بىرتىندەپ ورناتىلادى»، دەدى ن.ليۆينسكايا.

ايتا كەتەرلىگى، كوكتەمدە قالا بويىنشا قوزعالاتىن جۇك ۆاگوندارىنىڭ ولشەمدەرى الىندى. تەكسەرۋ ناتيجەلەرى كورسەتكەندەي، قالالىقتاردىڭ 11%-ى جانە قالاعا كىرەتىن كولىكتەردىڭ 12،6%-ى ەكولوگيالىق نورمالاردى ساقتامايدى.

سونىمەن قاتار جاسىل ەكونوميكا باسقارماسى لاستاۋشى اۆتوكولىكتەردى قالا بويىنشا قوزعالىس كەزىندە انىقتايتىن ءۇش ءموبيلدى پوستى جانە زەرتحانا ساتىپ الۋدى جوسپارلاپ وتىر. قازىرگى ۋاقىتتا كونكۋرستىق پروتسەدۋرالار ءجۇرىپ جاتىر، جەتكىزۋ وسى جىلدىڭ سوڭىنا جوسپارلانعان.

تەحنيكالىق رەتتەۋ جانە مەترولوگيا دەپارتامەنتى قالادا ساتىلاتىن وتىننىڭ ساپاسىن باقىلاۋ جۇمىستارىن باستادى. سونداي-اق اۆتوكولىكتەردى تەحنيكالىق بايقاۋدان ءوتۋ ءتارتىبىن قاتاڭداتۋ بويىنشا شارالار قابىلدانۋدا.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز