وتكەن جىلدان بەرى قىزىلوردا وبلىسىندا 13 826 ادام كوروناۆيرۋس جۇقتىردى. بۇگىنگى تاڭدا ولاردىڭ 80 پايىزى ەمدەلىپ شىقتى. ال پنەۆمونيامەن سىرقاتتانعان 1 950 ناۋقاستىڭ 1 670-ءى (85,6%) ەمدەلدى. بيىلعى جىلدىڭ ماۋسىم-شىلدە ايلارىندا ينفەكتسيالىق ورىن 585-تەن 2 340-قا, رەانيماتسيالىق توسەك ورىن 90-نان 172-گە دەيىن كوبەيتىلدى.
قازىرگى تاڭدا 1 860 ينفەكتسيالىق ورىن ناۋقاستاردىڭ پايدالانۋىندا. ونىڭ ىشىندە رەانيماتسيالىق توسەك ورىن - 157. قازىرگى جۇكتەمە 65 پايىزعا جەتكەن. رەزەرۆ ورىندارىنىڭ سانىن قوسقاندا 3 200 ورىن ازىرلەندى. ونىڭ 518-ءى ورتالىقتاندىرىلعان وتتەگىمەن جابدىقتالعان.
«جاقىندا مودۋلدىك ستاتسيونار ىسكە قوسىلىپ, 10 تامىزدان باستاپ ناۋقاستاردى قابىلداۋدا. ستاتسيوناردا قاجەتتى ءدارى-دارمەكتەردىڭ قورى قالىپتاسقان. كوروناۆيرۋس ينفەكتسياسىنا قارسى كۇرەس جۇمىستارىنا قاجەتتى مەديتسينالىق كادرلار مەن قۇرال جابدىقتار جەتكىلىكتى», دەدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى جانگەلدى شايىمبەتوۆ.
وڭىردە 11 پتر اپپاراتى ىسكە قوسىلعان. تاۋلىگىنە 1 300-1 500 ارالىعىندا سىناما الىنادى. قاجەتتىلىك تۋىنداعان جاعدايدا زەرتتەۋ سانىن 3 500-گە دەيىن جەتكىزۋگە مۇمكىندىك بار.
