بۇل تۋرالى اقتوبە قالاسىنىڭ №2 قىلمىستىق سوتى مالىمدەدى.
ءىس ماتەريالدارىنان بەلگىلى بولعانداي, اقتوبەلىك كومپانيالاردىڭ ءبىرى قۇرىلىس باسقارماسىمەن تەمىر اۋدانىنىڭ شۇبارشى اۋىلىندا سپورت كەشەنىن سالۋ تۋرالى شارت جاساسقان. ۆەدومستۆو باسشىسىنىڭ ورىنباسارى جامبىل نۇرباەۆ ورىندالعان جۇمىستاردىڭ اكتىلەرىنە قول قويعان. سول مەرزىمدە ناقتى ورىندالماعان جۇمىستار دا كورسەتىلگەن. سودان كەيىن شەنەۋنىك سپورت كەشەنىن سالعان قۇرىلىس فيرماسىنىڭ ديرەكتورىنان اكتىلەرگە كەدەرگىسىز قول قويعانى جانە جالپى قامقورلىعى ءۇشىن 6 ميلليون تەڭگە پارا العان. مەملەكەتتىك قىزمەتشى مەن مەردىگەر اراسىنداعى پارا تۋرالى كەلىسسوزدەردە دەلدال بولعان – قۇرىلىس فيرماسى ديرەكتورىنىڭ دوسى ەكەنى دە ايتىلعان. وسى زاڭسىز كەلىسىم سالدارىنان اتالعان 3 ازامات تا سوت الدىندا جاۋاپ بەردى.
«باسقارما باسشىسىنىڭ ورىنباسارى جامبىل نۇرباەۆ پارا العانى ءۇشىن (قك-ءنىڭ 366-بابىنىڭ 2-بولىگى), مەردىگەر كومپانيانىڭ ديرەكتورى ب.ا.ۋتەپوۆ پارا بەرگەنى ءۇشىن (قك-ءنىڭ 367-بابىنىڭ 2-بولىگى بويىنشا), ونىڭ تانىسى م.ت.سانكيباەۆ دەلدالدىق ءۇشىن (قك-ءنىڭ 368-بابىنىڭ 1-بولىگى بويىنشا) سوتتالدى. العاشقى ەكەۋى وزدەرىن كىنالى دەپ تانىمادى, ءۇشىنشىسى قىلمىستىڭ ەگجەي-تەگجەيىن مويىندادى جانە ايتىپ بەردى. سوت نۇرباەۆتىڭ اۋىر جەمقورلىق قىلمىسىن جاساعانىن ەسكەرە وتىرىپ, قىلمىستىق ارەكەتىمەن مەملەكەتتىك ورگان جۇمىسىنا نۇقسان كەلتىردى دەپ, وعان 4 جىل 6 اي مەرزىمگە باس بوستاندىعىنان ايىرۋ جازاسىن تاعايىندادى. ۋتەپوۆكە 2 جىل 6 اي مەرزىمگە باس بوستاندىعىنان ايىرۋ تۇرىندەگى جازا تاعايىندادى. شىن جۇرەكتەن وكىنگەنىن ەسكەرە وتىرىپ, سانكيباەۆقا 6 اي مەرزىمگە باس بوستاندىعىنان ايىرۋ تۇرىندەگى جازا تاعايىندادى. سوتتالعانداردىڭ بارلىعى ءومىر بويىنا مەملەكەتتىك قىزمەتتە ەڭبەك ەتۋ قۇقىعىنان ايىرىلدى», دەلىنگەن سوت حابارلاماسىندا.
ەستەرىڭىزگە سالا كەتەيىك, بىلتىر اقتوبە وبلىسىنىڭ قۇرىلىس باسقارماسىنىڭ ەكس-باسشىسى مەملەكەتكە 60 ميلليون تەڭگە زالال كەلتىرگەن الاياقتىق ارەكەتى ءۇشىن 7 جىلعا تۇرمەگە قامالدى.
