گۆاتەمالانىڭ سولتۇستىگىندە ورنالاسقان ەل-پەتەن دەپارتامەنتىنە قاراستى سان-بەنيتو قالاسىنىڭ تۋماسى العاشىندا اۋەسقويلار اراسىندا ەلەۋلى تابىستارعا قول جەتكىزدى. ەلىشىلىك جارىستاردا قارسىلاس شاق كەلتىرمەگەن لەستەر 2012 جىلى جاسوسپىرىمدەر اراسىنداعى الەم بىرىنشىلىگىنىڭ كۇمىس جۇلدەگەرى اتاندى. اقتىق سىندا ول كۋبالىق كەۆين براۋننان ۇتىلدى. وسىلايشا, مارتينەستىڭ ەسىمى الەم بىرىنشىلىكتەرىندە جۇلدە العان تۇڭعىش گۆاتەمالالىق بوكسشى رەتىندە تاريحتا قالدى.
جاستار بۋىنى اراسىنداعى جارىستا جاسىنداي جارقىلداعاننان كەيىن لەستەر ۇلتتىق قۇراما ساپىنا ىلىگىپ, ورتالىق امەريكا ويىندارىندا وزا شاپتى. ەكى رەت الەمدىك دودادا باق سىنادى. الايدا بۇل جارىستاردا جولى بولمادى. ەكى رەت پانامەريكا بىرىنشىلىكتەرىندە ونەر كورسەتتى. 2015 جىلى شيرەك فينالدا وليمپيادا جانە الەم چەمپيونى كۋبالىق رونيەل يگلەسياسقا جول بەرسە, 2017 جىلى قولا مەدالدى موينىنا ءىلدى. 75 كيلو سالماقتا كۇش سىناسقان ول باستاپقى باسەكەلەردە بارلىق قارسىلاسىن سىپىرا ۇتىپ, شيرەك فينالدا برازيليالىق ەبەرت كونسەيسان سوۋزانى سان سوقتىردى. ال ءدال وسى بوكسشى بيىل توكيودا الاۋى تۇتانعان وليمپيا ويىندارىندا ايدى اسپانعا ءبىر-اق شىعارىپ, التىن تۇعىرعا كوتەرىلگەنى بارشامىزدىڭ ەسىمىزدە. ايتۋلى جارىستا كونسەيسان ءبىزدىڭ ءابىلحان امانقۇل مەن رەسەيلىك گلەب باكشيدەن باسىم تۇسسە, شەشۋشى باسەكەدە ۋكراينالىق الەكساندر حيجنياكتى نوكاۋتقا جىبەردى. ءدال سول سوۋزادان ۇتىلعان بوكسشىلاردىڭ بارلىعى دا ءار جىلدارى الەم چەمپيوناتتارىندا جەڭىس تۇعىرىنا كوتەرىلگەنىن جانكۇيەرلەر جاقسى بىلەدى.
دەسەك تە لەستەرگە پانامەريكا بىرىنشىلىگىندە باس جۇلدەنى ولجالاۋ باقىتى بۇيىرمادى. تەگۋسيگالپادا وتكەن جارىستىڭ فينالدىندا ول الەم جانە قۇرلىق بىرىنشىلىكتەرىنىڭ جەڭىمپازى, وليمپيادا چەمپيونى ارلەن لوپەستەن ۇتىلدى. كۋبا قابىلانىنا جىبەرگەن ەسەسىن ول 2018 جىلى ورتالىق امەريكا جانە كاريب باسسەينى ويىندارىندا قايتاردى. فينالدىق سايىستا ەكى مىقتىنىڭ جولى قايتا قيىسىپ, بۇل باسەكەدە مارتينەستىڭ مىسى باسىم بولدى.
گۆاتەمالا بوكسشىسىنىڭ باستى ارمانى توكيو وليمپياداسىنا قاتىسۋ ەدى. بىراق جاپونياداعى جارىس ءبىر جىلعا كەيىن شەگەرىلگەننەن كەيىن لەستەر كاسىپقويلار اراسىندا كۇش سىناسۋدى قۇپ كوردى. وسى ورايدا ول ءوزىن ناعىز پانچەر رەتىندە مويىنداتتى. 2019 جىلدىڭ كوكتەم ايلارىنان بەرى توعىز رەت شارشى الاڭعا كوتەرىلگەن مارتينەس بارلىق باسەكەدە ايقىن باسىمدىق تانىتتى. ءبىر كەرەمەتى, ول قارسىلاستارىنىڭ دەنىن بەلگىلەنگەن راۋندتاردىڭ بەل ورتاسىنا جەتكىزبەي سۇلاتىپ سالدى. ونىمەن ەڭ ۇزاق ايقاسقان گابريەل لوپەس ەكەن. بيىل 3 ساۋىردە مەكسيكانىڭ لوس-موچيس قالاسىندا وتكەن جەكپە-جەكتە لەستەر جەرگىلىكتى بوكسشىنى ءتورتىنشى راۋندتا ەسىنەن تاندىردى.
ال 26 جاستاعى ءالي احمەدوۆتىڭ ءجۇرىپ وتكەن جولى كوز الدىمىزدا. الماتى وبلىسىنداعى ىلە اۋدانىنىڭ تۋماسى اۋەسقوي رينگتە دە ءوزىن جاقسى قىرىنان كورسەتتى. بىلىكتى باپكەر ساعاتبەك مۇساحانوۆتىڭ قول استىندا جاتتىققان ول قازاقستان چەمپيوناتىنىڭ قولا جۇلدەگەرى, ستۋدەنتتەر اراسىندا الەم چەمپيونى جانە بىرقاتار حالىقارالىق ءتۋرنيردىڭ جەڭىمپازى اتاندى. ءاليدىڭ كاسىپقوي رينگتە ونەر كورسەتىپ جۇرگەنىنە التى جىلعا جۋىقتادى. سول ارالىقتا 17 كەزدەسۋ وتكىزىپ, 16 رەت جەڭىسكە جەتتى. 12 قارسىلاسىن نوكاۋتپەن ۇتتى.
بىلتىر جەلتوقسان ايىندا احمەدوۆتىڭ IBF نۇسقاسى بويىنشا الەم چەمپيونى اتانۋعا تاماشا مۇمكىندىگى بولدى. اقش-تىڭ فلوريدا شتاتىندا وتكەن جەكپە-جەكتە ول اسا تاجىريبەلى ەكۆادورلىق كارلوس گونگورامەن جۇدىرىقتاستى. بۇل جەكپە-جەكتە احمەدوۆ الدەقايدا الىمدى كورىندى. باسەكە تىزگىنى ءبىزدىڭ بوكسشىنىڭ قولىندا بولدى. ول ۇپاي سانىمەن الدا كەلە جاتتى. الايدا 12 راۋندتا جەرلەسىمىز گونگورانىڭ اۋىر سوققىسىن جىبەرىپ الدى. ساقا سپورتشى قارسىلاسىنىڭ ءسال بوساڭسىعان ءساتىن قالت جىبەرمەدى. وسى سوققىدان كەيىن ءالي ەسىن جيا المادى. نوكاۋت!
سوڭعى جەكپە-جەگىندەگى ساتسىزدىگىنە قاراماستان, وسى سالادا جۇرگەن مايتالمان مامانداردىڭ دەنى ءالي احمەدوۆتىڭ الەۋەتى زور دەپ ەسەپتەيدى. بوكسشىنىڭ ءوزى دە جوعارىداعى جاعدايدى كەزدەيسوقتىق دەيدى. سول سەبەپتى دە ول الداعى كەزدەسۋلەرگە تىڭعىلىقتى دايارلانىپ, قايتسەم دە كوزدەگەن ماقساتىما قول جەتكىزەمىن دەپ قۇلشىنىپ وتىر. ال ءاليدىڭ كوزدەگەنى – الەمدىك ءتاج!
