سقو ادىلەت دەپارتامەنتىنىڭ ءبولىم باسشىسى اقليما بەكەنوۆانىڭ ايتۋىنشا, وڭىردە بىلتىر اليمەنت تولەۋدەن قاشىپ جۇرگەن بورىشكەرلەردىڭ سانى 771 بولسا, بيىل 243 ادامعا دەيىن ازايعان. سايكەسىنشە ازاماتتاردىڭ بەرەشەگى 1 ملرد تەڭگەدەن 400 ملن تەڭگەگە دەيىن كەمىگەن.
زاڭ اياسىندا 73 بورىشكەر ۋاقىتشا جۇرگىزۋشى كۋالىگىنەن ايىرىلىپ, 68 بورىشكەر اكىمشىلىك جاۋاپكەرشىلىككە تارتىلعان. ونىڭ 29-ى قاماۋعا الىنسا, 39-ىنا ايىپپۇل سالىندى.
149 ادامنىڭ ءىسى قىلمىستىق ءىس قوزعاۋ ءۇشىن ىشكى ىستەر ورگاندارىنا جىبەرىلدى. الايدا ونىڭ 45-ءى عانا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە ەنگىزىلدى. 16 قىلمىستىق ءىس تاراپتاردىڭ مامىلەگە كەلۋىنە بايلانىستى توقتاتىلسا, 3 بورىشكەر سوتتالدى.
ال جۇمىسسىز جۇرگەندەردىڭ بالالارىنا اليمەنت تولەۋگە مۇمكىندىگى بولۋى ءۇشىن سوت ورىنداۋشىلارىنىڭ وڭىرلىك پالاتاسى قالالىق جانە اۋداندىق جۇمىسپەن قامتۋ بولىمدەرىمەن بىرگە «بوس ورىندار جارمەڭكەسىن» توقسان سايىن وتكىزىپ تۇرادى. وعان 23 بورىشكەر قاتىسىپ, 6-ۋى جۇمىسقا ورنالاستى.
