«سوڭعى ون كۇندە ۆاكتسينا سالدىرۋ ديناميكاسى جاقسارعانىنا قاراماستان, اۋداندارداعى كورسەتكىش ءالى دە تومەن. اتاپ ايتقاندا, جىلىوي اۋدانىندا – 19,5, ماقاتتا – 28,2, يساتايدا – 36,2, قىزىلقوعا اۋدانىندا تۇرعىنداردىڭ 36,5 پايىزى ۆاكتسينا الدى. سول سەبەپتەن, وسى ماسەلەگە قاتىستى احۋالدى تىكەلەي ءوز باقىلاۋىمدا ۇستايمىن», دەيدى ماحامبەت دوسمۇحامبەتوۆ.
وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ ايتۋىنشا, 16 تامىزدا ينفەكتسيالىق ستاتسيونارلاردىڭ جانساقتاۋ بولىمىندە 87 ناۋقاس جاتقان. ونىڭ ىشىندە 15 پاتسيەنت وكپەنى جاساندى جەلدەتۋ اپپاراتىنا قوسىلعان.
ماحامبەت دوسمۇحامبەتوۆ تۇرعىندار اراسىندا ءتۇسىندىرۋ جۇمىسىن جانداندىرىپ, ۆاكتسينادان باس تارتۋ سەبەپتەرىن انىقتاۋدى تاپسىردى.
«ۆاكتسينا الماعان ادامدار قاۋىپ ايماعىندا بولادى. ەگەر ءبىز ادامداردان ايىرىلعىمىز كەلمەسە, ادەتتەگى ءومىر ىرعاعىنا ورالۋدى قالاساق, مۇمكىندىگىنشە كوپ ادام ەكپە الۋى كەرەك. سوندىقتان ۆاكتسينا سالدىرۋدى كەيىنگە قالدىرماعان ءجون», دەدى وبلىس اكىمى.
