شىمكەنت قالاسى اكىمدىگى ءباسپاسوز قىزمەتىنىڭ جازۋىنشا, قالالىق تسيفرلاندىرۋ باسقارماسى قاراتاۋ اۋدانىنا قاراستى 4 مىڭنان استام ءۇيى بار اقجايىق شاعىناۋدانىن وپتيكالىق جەلى ارقىلى ساپالى ينتەرنەتپەن قامتۋ ءۇشىن بىرقاتار جۇمىس اتقارىپ, جەكە ينۆەستورلارمەن كەلىسىم جۇرگىزگەن.
بۇگىنگى كۇنى, «i-LinkNet» جشس مەكەمەسى شاعىناۋدانعا تالشىقتى وپتيكا جەلىسىن تولىق جۇرگىزدى. ءتورت مىڭعا جۋىق ۇيگە 400 شاقىرىمدىق ابونەنتتىك كابەل تارتتى. ءوتىنىش قالدىرعان 400-دەن استام وتباسى جوعارعى جىلدامدىقتى ساپالى ينتەرنەتكە قول جەتكىزدى.
سونىمەن قاتار, مەردىگەر كومپانيا دوستىق شاعىناۋدانىنا دا تالشىقتى وپتيكا جەلىسىن تارتتى. 2500-گە جۋىق ۇيگە تالشىقتى وپتيكا جەلىسى جانە 200 شاقىرىمدى قامتيتىن ابونەنتتىك كابەل جۇرگىزىلدى.
اتالعان شاعىناۋداننىڭ ءوتىنىش بىلدىرگەن العاشقى 10 ۇيگە ينتەرنەت جەلىسى قوسىلىپ, تۇرعىنداردان قوسىمشا ءوتىنىش قابىلداۋ ءجۇرىپ جاتىر. ناقتى وتىنىمدەر بەرىلگەن جاعدايدا, مەردىگەر كومپانيا شاعىناۋداندى تولىققاندى تالشىقتى وپتيكا جەلىسىمەن قامتاماسىز ەتەدى.
بۇدان وزگە, الداعى ۋاقىتتا اسار, سامال-3 جانە نۇرتاس شاعىناۋداندارىنا دا تالشىقتى وپتيكا جەلىسى تارتىلادى.
