كورمەگە كورەيانىڭ چوللا-نامدو پروۆينتسياسى مەن باسقا دا وڭىرلەرىنىڭ تالانتتى قىلقالام شەبەرلەرىنىڭ تۋىندىلارى ۇسىنىلدى. وندا تابيعاتتىڭ ادەمى كورىنىستەرى مەن الەمنىڭ پايدا بولۋ جاراتىلىسىن وزەك ەتكەن فيلوسوفيالىق تاقىرىپتار قوزعالعان.
مادەني ءىس-شارانىڭ اشىلۋىندا ۇلتتىق مۋزەي ديرەكتورىنىڭ ورىنباسارى اباي ساتۋبالدين كورمەنىڭ ماڭىزىنا توقتالىپ: «قازىرگى كۇنى ەكى ەل اراسىنداعى بايلانىس نىعايىپ, جىل سايىن ەكى جاقتى كوپتەگەن ءىس-شارالار وتەدى. اسىرەسە ۇلتتىق مۋزەي اتالعان ەلدىڭ عىلىمي ۇيىمدارىمەن بىرلەسكەن جوبانى قولعا الىپ, ارحەولوگيا مەن مادەني مۇرا سالاسىندا زەرتتەۋ جۇمىستارىن جۇزەگە اسىرۋدا. بۇگىنگى كورمەنىڭ اشىلۋى دا سول مادەني قارىم-قاتىناستىڭ ءبىر كورىنىسى», دەدى ول.
ءوز كەزەگىندە كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى كۋ حونگ-سوك كورمەنى ۇيىمداستىرۋعا ۇيىتقى بولعان ۇلتتىق مۋزەي ۇجىمىنا العىسىن ايتىپ, حالقىمىزدى تاۋەلسىزدىكتىڭ ايتۋلى مەرەكەسىمەن قۇتتىقتادى.
– ەل تاۋەلسىزدىگىنىڭ 30 جىلدىعى مەن ەل پرەزيدەنتى قاسىم-جومارت توقاەۆتىڭ كورەيا رەسپۋبليكاسىنا مەملەكەتتىك ساپارى قارساڭىندا, سونداي-اق كورەيانى ازات ەتۋ كۇنىنە وراي ءوتىپ وتىرعان كورمە سىزدەرگە جىلىلىق سىيلايدى دەپ ويلايمىن. كورەيا ەلشىلىگى مەن ءبىزدىڭ مادەني ورتالىق الداعى تاڭدا دا وسىنداي قىزىقتى ءارى تانىمدىق ءىس-شارالار وتكىزۋدى جوسپارلاپ وتىر,– دەپ كەلۋشىلەرگە ريزاشىلىعىن ءبىلدىردى.
جالپى «سۋمۋكحۆا» كەسكىندەمەسى دەپ باسقا ءتۇس قوسپاعان قارا سيامەن بويالعان تۋىندىلاردى ايتادى. ول قاعاز بەتىندەگى سىزىقتار مەن بوس كەڭىستىكتەرگە نازار اۋدارتىپ, جارىق رەڭكتەرى مەن قارا سيا گراداتسياسى ارقىلى ىشكى رۋحاني الەمدى كوركەم كەستەلەيدى. ايتا كەتەيىك, كورمە 17 قازانعا دەيىن جالعاسادى.
