حوككەي • 17 تامىز، 2021

«بارىس» – التى دۇركىن جەڭىمپاز

13 رەت كورسەتىلدى

ەلوردادا شايبالى حوككەيدەن ۇيىمداستىرىلعان قازاقستان رەسپۋبليكاسى پرەزيدەنتى كۋبوگى حالىقارالىق جارىسى ءوز مارەسىنە جەتتى. فينالدا قاراعاندىنىڭ «سارىارقا» كلۋبىنان باسىم تۇسكەن «بارىس» جارىستىڭ التىن دۇركىن جەڭىمپازى اتاندى.

شايبالى حوككەيدەن قازاقستان رەسپۋب­ليكاسى پرەزيدەنتى كۋبوگى 2010 جىلدان بەرى وتكىزىلىپ كەلەدى. ءداستۇرلى تۋرنير جىل سايىن تامىز ايىندا ەلوردادا ۇيىمداستىرىلىپ، وعان قۇرلىقتىق حوككەي ليگاسىندا (قحل) ونەر كورسەتەتىن بىرقاتار كوماندا قاتىسادى. ياعني بۇل جارىس قحل-دا باق سىنايتىن كلۋبتار ءۇشىن جاڭا ماۋسىم الدىنداعى سوڭعى دايىندىق جۇمىستارىنىڭ ءبىرى سانالادى. وكىنىشكە قاراي، بىلتىرعى تۋرنير كوروناۆيرۋس پاندەمياسىنا بايلانىستى ۇيىمداستىرىلعان جوق. بىلتىرعى تامىز ايىندا قازاقستاندىق سپورتشىلارعا سپورتتىق جارىس وتكىزۋ بىلاي تۇرسىن، جاتتىعۋ جيىندارىن وتكىزۋگە دە شەكتەۋ قويىلعان بولاتىن.

ال بيىلدان باستاپ قازاقستاندا سپورتتىق جارىستار وتكىزۋگە رۇقسات بەرىلگەنىمەن، كوپ تۋرنير جانكۇيەرلەردىڭ قاتىسۋىنسىز ءوتىپ جاتىر. سوندىقتان «بارىس ارەناداعى» پرەزيدەنت كۋبوگى جارىسىنا دا كورەرمەندەر كىرگىزىلگەن جوق. تۋرنيرگە العاشىندا حەل­سينكيدىڭ «يوكەريت»، بەيجىڭنىڭ «كۋنلۋن رەد ستار» جانە ريگانىڭ «دينامو» كومان­دا­لارى شاقىرىلعان ەدى. الايدا حەل­سين­كيلىكتەر مەن ريگالىقتاردىڭ قازاق­ستان­عا كەل­مەيتىنى بەلگىلى بولدى. بۇعان دا كورونا­ۆيرۋستىڭ كەسىرى تيگەنى انىق.

ءسويتىپ 11 تامىزدا 11-ءشى رەت ۇيىمداس­تى­رىلعان تۋرنيرگە «بارىس» پەن «كۋن­لۋنىنان» بولەك، قازاقستاننىڭ ەڭ مىق­تى ەكى ۇجىمى – قاراعاندىنىڭ «سارىارقاسى» مەن وسكەمەننىڭ «تورپەدوسىنا» قاتىسۋعا مۇمكىندىك بەرىلدى. كوماندالار ءبىر-بىرىمەن ويىن وتكىزىپ، كەيىن جارتىلاي فينال جانە فينالعا شىققان كوماندالار انىقتالدى.

توپتىق كەزەڭدە ءۇش ويىن وتكىزىپ، ەكەۋىندە جەڭىسكە جەتكەن «بارىس» پەن «سارىارقا» كلۋب­تارى فينالعا شىقتى. ءبىر قىزىعى، ەكى كلۋب ءتۋرنيردىڭ ءبىرىنشى تۋرىندا ءبىر-بىرىمەن كەزدەسىپ، قاراعاندىلىق كوماندانىڭ مەرەيى ۇستەم بولعان ەدى. فينالدا «بارىس» سول ەسەسىن قايتارىپ، كەزەكتى رەت پرەزيدەنت كۋبوگىن جەڭىپ الدى.

«بارىس ارەنادا» وتكەن فينالدىق كەزدەسۋ 7:3 ەسەبىمەن «بارىستىڭ» پايداسىنا اياقتالدى. ءبىرىنشى كەزەڭنىڭ العاشقى 10 مينۋتىندا مۇزايدىن يەلەرى قارسىلاس كوماندانىڭ قاقپاسىنا جاۋاپسىز ءۇش شايبا سوعىپ، ەسەپتە العا شىعىپ الدى. گول اۆتورلارى – كەرتيس ۆولك (4-مينۋت)، ەگور شالاپوۆ (7) جانە مەتت فرەتتين (9). الايدا «سارىارقا» ۇزىلىسكە دەيىن-اق ەسەپ ايىرماشىلىعىن قىس­قارتىپ، ويىننىڭ كورىگىن قىزدىرا ءتۇستى. قارا­عاندىلىقتار ساپىنان 11 جانە 19-مينۋتتاردا ستەپان گرىمزين مەن سەرگەي گولودنيۋك مەرگەندىگىمەن كوزگە ءتۇستى.

ءتىپتى قاراعاندىلىق كلۋب ەكىنشى كەزەڭنىڭ باسىندا تارازى باسىن تەڭەستىرىپ، ويىن ودان ءارى شيەلەنىسە ءتۇستى. بۇل جولى ستەپان گرىمزين دۋبل اۆتورى اتاندى. بىراق «سارى­ارقانىڭ» ءارى قاراي تارازى باسىن تەڭ ۇستاپ تۇرۋعا كۇشتەرى جەتپەدى. 34-مينۋتتا ياكوب ليليانىڭ ارقاسىندا «بارىس» ەسەپتە العا شىعىپ السا، كەزەڭنىڭ اياقتالۋىنا 28 سەكۋند قالعاندا داررەن ديتس ەسەپتى ەسەلەدى. ال سوڭعى كەزەڭدە «بارىس» «سارىارقا» قاقپاسىنا تاعى ەكى شايبا سوقتى. 49-مينۋتتا ەگور پەتۋحوۆ مەرگەندىك تانىتسا، 59-مينۋتتا اركادي شەستاكوۆ ويىننىڭ نۇكتەسىن قويدى. وسىلايشا «بارىس» پرەزيدەنت كۋبوگىندا التىنشى رەت توپ جاردى.

بۇعان دەيىن ەلوردالىق كوماندا 2010، 2011، 2013 جانە 2015 جىلدارى كۋبوكتى باسى­­­­نان اسىرا كوتەرگەن ەدى. سونىمەن قاتار پرە­­­زي­دەنت كۋبوگىندا ءار جىلدارى سانكت-پەتەر­­­بۋرگتىڭ سكا، ومبىنىڭ «اۆانگارد»، نوۆو­­­كۋزنەتسكىنىڭ «مەتاللۋرگ»، نيج­نەكام­سكى­­نىڭ «نەفتەحيميك» جانە حاباروۆ­سكىنىڭ «امۋر» كوماندالارى جەڭىمپاز اتانعان بولاتىن.

ءۇشىنشى ورىن ءۇشىن وتكەن ماتچتا «تورپە­دودان» 2:1 ەسەبىمەن باسىم تۇسكەن بەيجىڭنىڭ «كۋنلۋن» كومانداسى ءتۋرنيردىڭ قولا جۇلدەگەرى اتاندى. فينالدىق كەزدەسۋدەن سوڭ پرەزيدەنت كۋبوگىن ۇيىمداستىرۋشىلار ۇزدىك ويىنشىلاردى ماراپاتتادى. نيكيتا بوياركين («بارىس») ءتۋرنيردىڭ ۇزدىك قاقپاشىسى دەپ تانىلسا، «سارىارقا» ساپىنان دميتري مولودتسوۆ ۇزدىك قورعاۋشى، سەرگەي گولودنيۋك ۇزدىك شابۋىلشى، «بارىس» ويىنشىسى كودي كۋنيك ءتۋرنيردىڭ ۇزدىك ءبومبارديرى اتاندى.

ايتا كەتەيىك، «بارىس» ەندى قۇرلىقتىق حوككەي ليگاسىنىڭ جاڭا ماۋسىمىنا دايىن­دىعىن جالعاستىرادى. قازاقستاندىق كوماندا قحل-داعى العاشقى ويىنىن 3 قىركۇيەكتە ءوفونىڭ «سالاۆات يۋلاەۆ» كومانداسىمەن وتكىزەدى.

سوڭعى جاڭالىقتار

ۇرلانعان 28 كولىك تابىلدى

وقيعا • بۇگىن، 15:11

اتىراۋدا 23 ادامدى شايان شاققان

ايماقتار • بۇگىن، 13:35

سپورت جاڭالىقتارىنا شولۋ

سپورت • بۇگىن، 09:11

سۋرەتشىلەر ءۇيى اشىلدى

ايماقتار • بۇگىن، 09:08

بال بۇلاق بولىپ اقتى

ايماقتار • بۇگىن، 09:07

وڭايلىقپەن ەم قونبايدى

مەديتسينا • بۇگىن، 09:05

بارەكەلدى، ۆيكتوريا!

سپورت • بۇگىن، 09:02

ۇقساس جاڭالىقتار