مۇندايدا قازاق «جازمىشتان وزمىش جوق» دەپ جۇباتىسادى. بىراق ساقتانعاندى ساقتايدى ەمەس پە قۇداي؟! قالاي بولعاندا دا, رۇقسات بەرىلگەن اۋماقتارعا عانا شومىلۋ كەرەك. مامانداردىڭ ءتۇسىندىرىپ جۇرگەن ەرەجەلەرى قاراپايىم. كەيدە سونى ەسكەرمەي جاتادى ەل.
تجد ماماندارىنىڭ مالىمەتىنشە, شومىلۋ ماۋسىمىندا قۇتقارۋشىلار 22 ادامنىڭ ومىرىنە اراشا تۇسكەن. ولاردىڭ التاۋى بالالار. قۇتقارۋشىلار ساقاداي ساي دايىن جۇرگەنىمەن, سۋ ايدىندارىن تۇگەلدەي قاداعالاۋ مۇمكىن ەمەس. قايعىلى جاعداي ورىن الماۋى ءۇشىن جاۋاپكەرشىلىكتى ءار ادام ءوزى سەزىنۋى كەرەك. 2020 جىلى 33 ادام
(9 بالا) سۋعا باتىپ, كوز جۇمسا, بيىل 34 ادام سۋعا كەتكەن.
– 13 وقيعا بالالار قاراۋسىز قالعان كەزدە ورىن العان. بەس ادام ماس كۇيىندە شومىلىپ, قازا تاپتى. قايعىلى جاعدايلاردىڭ كوبى ارنايى جابدىقتالماعان جاعاجايلاردا ورىن الدى. دەمالىس بازاسىنىڭ جانىندا بالىق اۋلاپ وتىرعان ازامات تا سۋعا باتىپ كەتتى, – دەدى تجد ءباسپاسوز حاتشىسى مارينا ليسكوۆا.
جازدىڭ العاشقى كۇندەرىنەن باستاپ قۇتقارۋشىلار پروفيلاك-
تيكالىق جۇمىستار جۇرگىزىپ, ءتۇسىندىرۋ اكتسيالارىن وتكىزىپ كەلەدى. ەسەپ-قيساپقا سۇيەنسەك, 5 مىڭنان استام پروفيلاكتيكالىق رەيد ۇيىمداستىرىلىپ, دەمالۋشىلارعا 86 مىڭ جادىناما تاراتىلعان ەكەن. بازالاردىڭ يەلەرىمەن جانە جەرگىلىكتى اتقارۋشى ورگاندارمەن بىرلەسىپ, ازاماتتاردىڭ قاۋىپسىز دەمالىسىن قامتاماسىز ەتۋ ماقساتىندا 33 مەموراندۋم جاسالعان.
– ايماقتاعى بارلىعى وزەن-كولدەردىڭ جاعالاۋىندا دەمالىس جانە سپورت ءۇشىن 16 ورىن بەكىتىلگەن. ال شومىلۋعا تىيىم سالىنعان 64 ۋچاسكە بەلگىلەندى. جەرگىلىكتى اتقارۋشى ورگاندارمەن بىرلەسىپ, شومىلۋعا قاۋىپتى ورىندارعا 384 تىيىم سالۋ جانە ەسكەرتۋ بەلگىلەرىن ورناتتىق. سەبەبى بۇل ۋچاسكەلەردەگى سۋدىڭ ءتۇبى تەكسەرىلمەگەن, قاۋىپتى اعىن مەن يىرىمدەر بايقالدى. جاقىن جەردە قۇتقارۋشىلار مەن دارىگەرلەردىڭ بەكەتتەرى دە جوق, – دەپ ءتۇسىندىردى تجد ءباسپاسوز حاتشىسى.
بازالاردىڭ يەلەرىنە كومەكتەسۋ ءۇشىن تج دەپارتامەنتىندە قوعامدىق قۇتقارۋشىلاردى دايارلاۋ كۋرستارى دا ۇيىمداستىرىلدى. قازىردىڭ وزىندە 110-نان استام ازامات ءبىلىم الىپ ۇلگەرگەن. شومىلۋ ماۋسىمى كەزەڭىندە الاكولدە جانە كوكپەكتى اۋدانىندا دەمالۋشىلاردىڭ قاۋىپسىزدىگىن قامتاماسىز ەتۋ ءۇشىن ورتتەن قۇتقارۋ بەكەتتەرى قۇرىلدى.
ايتقانداي, سۋعا ءتۇسۋ كەزىندە ءتارتىپ پەن ەرەجە بۇزعان دەمالۋشىلار جاۋاپقا تارتىلعان.
– جالپى جاعالاۋدا دەمالۋ ءتارتىبىن 155 ادام بۇزسا, 476 ادام ماس كۇيدە ەرەجە بۇزعانى انىقتالدى, – دەپ اتاپ ءوتتى شىعىس قازاقستان وبلىستىق پوليتسيا دەپارتامەنتىنىڭ جەرگىلىكتى پوليتسيا قىزمەتى باستىعىنىڭ ورىنباسارى اندرەي لاريونوۆ.
وسى تۇستا ايتا كەتەرلىگى, سۋعا ماس كۇيدە شومىلۋعا, قايىقتاردان, كاتەرلەردەن, ايلاقتاردان, سونداي-اق قۇرىلىستاردان سۋعا سەكىرۋگە قاتاڭ تىيىم سالىنادى. تەكسەرىلمەگەن جانە جابدىقتالماعان جەرلەردە سۇڭگۋگە دە بولمايدى. بالالاردى جاعالاۋدا قاراۋسىز قالدىرۋعا بولمايتىنىن دا ەستەن شىعارماۋ قاجەت.
شىعىس قازاقستان وبلىسى
