قىزىلوردا وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى 12 تامىزدا «قاراسورا-2021» جەدەل الدىن الۋ ءىس-شاراسىن وتكىزۋ بارىسىندا 53 جاستاعى قالا تۇرعىنىنىڭ اۋلاسىنان ەسىرتكى وسىمدىكتەرىن انىقتادى.
تەكسەرۋ بارىسىندا كۇدىكتىنىڭ جەكە ءۇي اۋماعىندا وزىنە ءتان ءيىسى بار جاسىل ءتۇستى وسىمدىكتەر وسىرگەنى جانە ساقتاعانى انىقتالدى. سونداي-اق وقيعا ورنىنان زاتتاي دالەل رەتىندە وسىمدىكتەردى سۋارۋعا ارنالعان 15 مەترلىك شلانگ تاركىلەندى.
سوت ساراپتاماسىنىڭ ناتيجەلەرى بويىنشا سالماعى 15 كگ-نان اساتىن 23 ءتۇپ وسىمدىك مولشەرىندە الىنعان قاراسورا, ال جاسىل ءتۇستى وسىمدىك تەكتەس 329 گراممدىق زات - «كەپتىرىلگەن ماريحۋانا» ەكەندىگى انىقتالدى.
قازىرگى ۋاقىتتا كۇدىكتى ۋاقىتشا ۇستاۋ يزولياتورىنا قامالىپ, اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 300-بابىنىڭ 2-بولىگى (قۇرامىندا ەسىرتكى زاتتارى بار, وسىرۋگە تىيىم سالىنعان وسىمدىكتەردى زاڭسىز ءوسىرۋ) بويىنشا سوتقا دەيىنگى تەرگەۋ جۇرگىزىلۋدە.
