ءبىلىم • 15 تامىز، 2021

وقۋشىلار حالىقارالىق وليمپيادادا ءۇش مەدال جەڭىپ الدى

137 رەت كورسەتىلدى

قازاقستاندىق وقۋشىلار گەوگرافيا پانىنەن وتكەن حالىقارالىق وليمپيادادا ءۇش مەدال جەڭىپ الدى. بۇل تۋرالى قر ءبىلىم جانە عىلىم مينيسترلىگى حابارلادى، دەپ جازادى Egemen.kz.

قازاقستاندىق وقۋشىلار گەوگرافيا پانىنەن وتكەن حالىقارالىق وليمپيادادا (IGEO-2021) 3 مەدال جەڭىپ الدى. ۇلتتىق قۇرامانىڭ قورجىنىندا ءبىر التىن، ءبىر كۇمىس جانە ءبىر قولا بار. وليمپيادا 10-16 تامىز ارالىعىندا تۇركيانىڭ ستامبۋل قالاسىندا ونلاين فورماتتا ءوتتى. زياتكەرلىك جارىسقا الەمنىڭ 46 ەلىنەن 200 وقۋشى قاتىستى.

وليمپياداعا اقتوبە، شىمكەنت جانە قىزىلوردا قالاسىنان ءتورت وقۋشى، ياعني رەسپۋبليكالىق پاندىك وليمپيادانىڭ جەڭىمپازدارى قاتىستى.

ۇلتتىق قۇرامانى جارىسقا تاجىريبەلى پەداگوگتەر مەن جاتتىقتىرۋشىلار دايىندادى. زياتكەرلىك سايىستىڭ تاپسىرمالارىن جوعارى دەڭگەيدە ورىنداعان قازاقستاندىق ءتورت قاتىسۋشىنىڭ ۇشەۋى جۇلدەگەر اتاندى. ۆالەەۆ رۋستام التىن مەدالعا، تازابەك ەركەبۇلان كۇمىس مەدالعا، ساپاربەكوۆ ەراسىل قولا مەدالعا يە بولدى.

ۇلتتىق قۇراما مۇشەلەرى وقۋ-جاتتىعۋ كەزىندە جۇمىستى جوعارى دەڭگەيدە جۇرگىزگەن مۇعالىمدەر مەن جاتتىقتىرۋشىلارىنا العىس ءبىلدىردى.

قر ءبىلىم جانە عىلىم ءمينيسترى اسحات ايماعامبەتوۆ ءوزىنىڭ Facebook پاراقشاسىندا وليمپيادا جۇلدەگەرلەرىن لايىقتى جەڭىسپەن قۇتتىقتادى. 

«وليمپيادا جۇلدەگەرلەرىن جوعارى ناتيجەسىمەن قۇتتىقتايمىن! بۇل سىزدەردىڭ قاجىرلى ەڭبەگىڭىز بەن ءبىلىمىڭىزدىڭ جانە وزىڭىزگە دەگەن سەنىمدىلىكتىڭ ناتيجەسى. سىزدەرگە قولداۋ كورسەتكەن مۇعالىمدەر مەن جاتتىقتىرۋشىلارعا جانە اتا-انالارعا العىس ايتامىن. سىزدەر ەلىمىزدىڭ نامىسىن حالىقارالىق دەڭگەيدە لايىقتى قورعادىڭىزدار. ءبىز ءوز تاراپىمىزدان مەدالداردىڭ سانى جىل سايىن ۇلعايۋى ءۇشىن جاعداي جاساۋدى جالعاستىرامىز»، دەپ جازدى اسحات ايماعامبەتوۆ.

قر ءبىلىم جانە عىلىم ءمينيسترى مەملەكەت باسشىسى قاسىم-جومارت كەمەل ۇلى توقاەۆ حالىقارالىق وليمپيادا جەڭىمپازدارىن قولداۋ بويىنشا كەشەندى شارالار قابىلداۋدى تاپسىرعانىن اتاپ ءوتتى. وسى تاپسىرمانى ورىنداۋ اياسىندا مينيسترلىك زاڭنامالىق وزگەرىستەر دايىندادى.

سوڭعى جاڭالىقتار

بۇعىبۇلاۋ

قازاقستان • كەشە

جۇزە ءبىلۋ – ءومىر

قوعام • كەشە

ولكەتانۋشى

قازاقستان • كەشە

كەبەنەك

تاريح • كەشە

ساۋكەلە

ونەر • كەشە

ۇقساس جاڭالىقتار