ءوڭىردىڭ باس دارىگەرى جاعدايدىڭ بۇلايشا قالىپتاسۋىنىڭ بىرقاتار سەبەبىن اتاپ كورسەتتى.
– وكىنىشكە قاراي, سوڭعى ۋاقىتتا بىزدە اۋىر ناۋقاستاردىڭ جۇقپالى اۋرۋلار اۋرۋحانالارىنا ءتۇسۋى جيىلەپ كەتتى. ىقتيمال بايلانىستاردى تالداۋ كەزىندە ناۋقاستاردىڭ بۋراباي, باياناۋىل, بالقاش سياقتى جەرلەردەگى دەمالىس ورىندارىنان كەلگەنى نەمەسە ءتۇرلى مەرەكەلىك وتىرىستاردا بولعانى انىقتالدى. بۇدان بولەك ناۋقاستاردىڭ كوبى اۋىرعانىن سەزىنگەنمەن, ۇزاق ۋاقىت بويى مەديتسينالىق كومەككە جۇگىنبەي ءجۇرىپ الادى. اۋرۋحاناعا تىنىس الۋ جەتكىلىكسىزدىگى, السىزدىك, ايقىن ينتوكسيكاتسيا ورشىگەن كەزدە عانا كەلەدى, – دەدى ول.
قازىرگى ۋاقىتتا وبلىستاعى ينفەكتسيالىق توسەك-ورىنداردىڭ 52,7%-ى بوس ەمەس ەكەن. ستاتسيونارلاردا جامان تۇماۋمەن اۋىراتىن 3 مىڭعا جۋىق ناۋقاس ەمدەلۋدە. جانساقتاۋ بولىمشەلەرىندەگى 163 اۋىر ناۋقاستىڭ 45-ءى وكپەنى جاساندى جەلدەتۋ اپپاراتىنا قوسىلعان.
ىندەتتىڭ ورشۋىنە بايلانىستى, كەنشىلەر استاناسىندا مەديتسينالىق كومەك كورسەتۋ ءۇشىن قوسىمشا 380 توسەك-ورىن اشىلدى. قالا بويىنشا جالپى قۋاتتىلىق 2 971 توسەك-ورىنعا دەيىن ۇلعايتىلعان, ونىڭ 58%-ى قازىر جۇمىس ىستەپ تۇر.
گ.توقسامباەۆ جەدەل مەديتسينالىق جاردەم بريگادالارىنىڭ سانىن ارتتىرۋعا ءماجبۇر بولىپ وتىرعاندارىن اتاپ ءوتتى. نەگە دەسەڭىز, سوڭعى كەزدەرى تۇرعىندار تاراپىنان شاقىرۋلار تىم جيىلەپ كەتكەن. قازىر جەدەل مەديتسينالىق كومەكتىڭ 105 بريگاداسى حالىققا قىزمەت كورسەتىپ ءجۇر. «قاجەتتىلىك بولسا, تاعى 20 بريگادانى جەلىگە شىعارا الامىز», دەدى ۆەدومستۆو باسشىسى.
وكىنىشتىسى سول, قازىر كەيبىر تۇرعىندار كوروناۆيرۋس ينفەكتسياسىنىڭ العاشقى بەلگىلەرى پايدا بولا باستاعاندا بىردەن مەديتسينالىق كومەككە جۇگىنبەي, وزدەرى ۇيدە ءوز بەتتەرىمەن ەمدەلىپ, اۋرۋدى اسقىندىرىپ الادى ەكەن. بۇعان قوسا تۇرعىنداردىڭ ۆاكتسينا سالدىرۋعا سالدىر-سالاق قاراۋى دا جاعدايدىڭ كۇردەلەنە تۇسۋىنە زاردابىن تيگىزىپ جاتىر.
بريفينگ بارىسىندا وبلىستىق دەنساۋلىق ساقتاۋ باسقارماسىنىڭ باسشىسى پاندەميامەن كۇرەسۋدىڭ ەڭ ءتيىمدى امالى ۆاكتسينا الۋ ەكەنىن جۇرتتىڭ ەسىنە تاعى ءبىر مارتە سالدى. الداعى ۋاقىتتا وبلىستىڭ 42 مىڭ تۇرعىنى قىتايدا شىعارىلعان Vero Cell ۆاكتسيناسىن سالدىراتىنىن ايتتى. اتالعان پرەپارات جاقىن ارادا جەتكىزىلەتىن كورىنەدى.
– Sinopharm كومپانياسى وندىرگەن Vero Cell ۆاكتسيناسىنىڭ 84 مىڭ دوزاسىن كۇتىپ وتىرمىز. بۇل – ەكى فازالى پرەپارات. ۆاكتسينانى وبلىسىمىزدىڭ 42 مىڭ تۇرعىنى الادى دەگەن جوسپارىمىز بار, – دەدى گ.توقسامباەۆ.
قىتايلىق Vero Cell ۆاكتسيناسىن وسى جىلدىڭ 7 مامىرىندا دۇنيەجۇزىلىك دەنساۋلىق ساقتاۋ ۇيىمى ماقۇلداعانىن ايتا كەتكەن ءجون. شىلدە ايىندا بۇل COVAX ۆاكتسينالار بانكىنە كىردى.
سونىمەن قاتار وبلىستا رەسەيلىك سپۋتنيك V ۆاكتسيناسى مەن وتاندىق QazVac پرەپاراتى دا بار. سونداي-اق باسقارما باسشىسى Hayat-Vax جانە CoronaVac ۆاكتسينالارىنىڭ ەكىنشى كومپونەنتى تەك العاشقى دوزاسىن العان جانە يممۋنداۋدى اياقتاعان ادامدارعا قولجەتىمدى ەكەنىن ايتتى.
سوڭعى مالىمەتتەرگە ساي, قاراعاندى وبلىسىندا كوروناۆيرۋس ينفەكتسياسىنا قارسى ۆاكتسينانىڭ ءبىرىنشى كومپونەنتىن 432 331 ادام, ەكىنشىسىن 322 175 ادام العان.
ەسكە سالار بولساق, قاراعاندى وبلىسىندا پاندەميا باستالعاننان بەرى 70 مىڭعا جۋىق ادامنىڭ جامان تۇماۋمەن اۋىرعانى رەسمي تىركەلگەن. ونىڭ ىشىندە ناۋقاستاردىڭ 79%-ى جازىلىپ شىقتى. ال وتكەن تاۋلىكتە وبلىستىڭ 1 127 تۇرعىنىنىڭ كوروناۆيرۋس ينفەكتسياسىن جۇقتىرعانى بەلگىلى بولدى. اتالعان سىرقاتتان 835 ادام ساۋىعىپ شىققان.
قاراعاندى وبلىسى
