11 تامىزدا قر پرەمەر-ءمينيسترى اسقار ءماميننىڭ توراعالىعىمەن كەزەكتى ۇكىمەت وتىرىسى ءوتتى.
سانيتارلىق-ەپيدەميولوگيالىق احۋال, 2021 جىلعى قاڭتار-شىلدە ايلارىنداعى الەۋمەتتىك-ەكونوميكالىق دامۋ قورىتىندىسى جانە رەسپۋبليكالىق بيۋدجەتتىڭ اتقارىلۋى جانە وقۋ جىلىنىڭ باستالۋىنا دايىندىق بارىسى تۋرالى ماسەلەلەر قارالدى.
ءبىرىنشى ماسەلە بويىنشا ۇكىمەت باسشىسى بارلىق وڭىردەگى سانيتارلىق-ەپيدەميولوگيالىق جاعدايدى باقىلاۋدا ۇستاۋدى تاپسىردى. سونىمەن قاتار حالىقتىڭ شەكتەۋ شارالارىن, ەڭ الدىمەن ماسكا تاعۋ رەجيمىن ساقتاۋىن قامتاماسىز ەتۋ قاجەت ەكەنى اتاپ ءوتىلدى.
ەكىنشى ماسەلە بويىنشا ۇكىمەت باسشىسى اكىمدىكتەرگە الەۋمەتتىك ماڭىزى بار ازىق-ت ۇلىك ونىمدەرىنىڭ باعاسىن ۇستاپ تۇرۋ شارالارىن كۇشەيتۋدى جانە ەرەكشە باقىلاۋعا الۋدى, ۇلتتىق ەكونوميكا مينيسترلىگىنە جانە مۇددەلى مەملەكەتتىك ورگاندارعا بيىلعى تامىز ايىنىڭ سوڭىنا دەيىن ينفلياتسياعا قارسى دەن قويۋ, سونداي-اق الەۋمەتتىك ماڭىزى بار تاۋارلاردىڭ باعاسىن ۇستاپ تۇرۋ جونىندەگى شارالاردىڭ جاڭا توپتاماسىن قابىلداپ, ىسكە اسىرا باستاۋدى تاپسىردى.
ءۇشىنشى ماسەلە بويىنشا ۇكىمەت باسشىسى وسى جىلعى 25 تامىزعا دەيىن مەديتسينالىق قارسى كورسەتىلىمدەرى بار ادامداردان باسقا, پەداگوگتەر مەن تەحپەرسونالدى ۆاكتسينالاۋمەن 100% قامتاماسىز ەتۋدى, 20 تامىزعا دەيىن مەكتەپتەردى سانيتارلىق تالاپتارعا سايكەس قابىلداۋدى اياقتاۋدى, 25 تامىزعا دەيىن وقۋلىقتاردى مەكتەپتەرگە كەستەگە سايكەس تولىعىمەن جەتكىزۋدى, بارلىق ءبىلىم بەرۋ ۇيىمدارىنىڭ وقۋ جىلىن باستاۋعا 100% دايىن بولۋىن قامتاماسىز ەتۋدى, بالالاردىڭ قاۋىپسىزدىگى, تاماقتاندىرۋ جانە مەكتەپكە جەتكىزۋ بويىنشا بارلىق ماسەلەنىڭ شەشىمىن تابۋدى تاپسىردى.
