ايماقتار • 14 تامىز، 2021

اتىراۋدا 14 مىڭنان استام بالا سپورتپەن شۇعىلدانادى

200 رەت كورسەتىلدى

اتىراۋ وبلىسىندا سپورتتىڭ 26 تۇرىمەن شۇعىلداناتىن بالالاردىڭ سانى 14 مىڭنان استى، دەپ جازادى Egemen.kz.

وبلىس اكىمى ماحامبەت دوسمۇحامبەتوۆتىڭ ايتۋىنشا، ەندى 500 ورىنعا ارنالعان سپورت كوللەدجىن اشۋ جوسپارلانىپ وتىر.    

«مەملەكەت باسشىسى قاسىم-جومارت توقاەۆ «جاڭا جاعدايداعى قازاقستان: ءىس-قيمىل كەزەڭى» اتتى حالىققا جولداۋىندا «بۇقارالىق سپورتقا، دەنە تاربيەسىنە جانە بالالار سپورتىنا باسىمدىق بەرۋ كەرەك. ءار وبلىستا، ءىرى اۋدان ورتالىقتارىندا سپورت ۇيىرمەلەرىن اشۋ قاجەت» دەگەن ەدى. وسىعان وراي وبلىستا سپورتتى، سونىڭ ىشىندە، بالالار سپورتىن جاقسارتۋعا ەرەكشە باسىمدىق بەرىلىپ وتىر. اتىراۋ وبلىسىنىڭ 2021-2025 جىلدارعا ارنالعان كەشەندى دامۋ جوسپارى ارقىلى دارىندى بالالارعا ارنالعان 500 ورىنعا ەسەپتەلگەن سپورتتىق مەكتەپ-ينتەرنات-كوللەدجىن اشۋ جوسپارلانىپ وتىر. «نۇرسايا» شاعىن اۋدانىنان سالىناتىن جاڭا كەشەنگە 4،6 گەكتار جەر تەلىمى ءبولىندى. 2022 جىلى قۇرىلىسى باستالاتىن بۇل نىسان 2024 جىلى پايدالانۋعا بەرىلمەك. مۇندا اۋدانداردان كەلەتىن بالالار ءۇشىن 200 جاتىن ورىن بولادى» دەيدى ماحامبەت دوسمۇحامبەتوۆ.

قازىر وبلىستا 17 سپورت مەكتەبى، 7 دەنە شىنىقتىرۋ دايارلىق كلۋبى جۇمىس ىستەيدى. سونداي-اق، كاسىبي كلۋبتار جانىنان اشىلعان 3 اكادەميا جانە 2 بالالار ورتالىعى بار. مۇندا سپورتتىڭ 26 تۇرىنە باسىمدىق بەرىلگەن. سپورتتىق سەكتسيالاردىڭ بارلىعى تەگىن قىزمەت كورسەتەدى. بۇل نىسانداردا 14 مىڭنان استام بالا سپورتپەن شۇعىلدانادى.

«بولاشاقتا قوسىمشا سەكتسيالار اشۋىمىز قاجەت. جان باسىنا شاققاندا نورماتيۆتىك قارجىلاندىرۋدى مەملەكەتتىك تاپسىرىس ارقىلى جۇزەگە اسىرۋ ماقساتىندا بالالار مەن جاسوسپىرىمدەرگە ارنالعان سپورتتىق سەكتسيالارعا 2000-عا جۋىق بالانى تارتۋ كوزدەلىپ وتىر. مۇنداي مۇمكىندىگى مول سپورت كەشەندەرىن بارشا تۇرعىنعا قولجەتىمدى ەتىپ لايىقتاعان ءجون» دەيدى وبلىس اكىمى.

بيىلعى جىل باسىنان بەرى اتىراۋ وبلىسىنىڭ سپورت سالاسىندا اۋقىمدى جۇمىس اتقارىلعان. بۇقارالىق سپورتتى دامىتۋ ماقساتىندا 1 139 نىسان جۇمىس ىستەيدى. ناۋرىزدا يندەر اۋدانىنىڭ ورلىك اۋىلىندا جاڭا سپورتتىق كەشەن پايدالانۋعا بەرىلدى. ەندى جىل سوڭىنا دەيىن يساتاي اۋدانىنىڭ جانباي، ماحامبەت اۋدانىنىڭ ماحامبەت، ماقات اۋدانىنىڭ ماقات، يندەر اۋدانىنىڭ جارسۋات، قىزىلقوعا اۋدانىنىڭ ميالى، ساعىز اۋىلدارىنان سپورت كەشەندەرى پايدالانۋعا بەرىلەدى. قازىر قۇلسارى قالاسىنداعى ورتالىق ستاديونعا جاڭعىرتۋ جۇمىسى جۇرگىزىلۋدە.

اتىراۋ قالاسىنداعى ورتالىق ءجۇزۋ باسسەينىنە كۇردەلى جوندەۋ جۇرگىزىلگەن.  سەنىمگەرلىكپەن باسقارۋعا بەرىلگەن باسسەين ديرەكتورى جالعاس وتەباليەۆتىڭ دەرەگىنە سۇيەنسەك، بۇرىن باسسەينگە 400 بالا كەلگەن. قازىر 600-دەن استام بالا سپورتتىڭ 4 ءتۇرى بويىنشا تەگىن جاتتىعۋعا قاتىسادى. جىل سوڭىنا دەيىن مۇندا كەلۋشىلەردىڭ سانى 1 مىڭعا جۋىقتايدى.

«مەملەكەت باسشىسى بۇقارالىق جانە بالالار سپورتىنىڭ دامۋىنا باسا نازار اۋدارىپ وتىر. ونى جۇزەگە اسىرۋ ءۇشىن وبلىستاعى بۇقارالىق سپورتپەن شۇعىلدانۋشىلار سانىن 2025 جىلى 45 پايىزعا جەتكىزۋ تاپسىرىلدى. جىل باسىنان بەرى تۇرعىنداردى سالاماتتى ءومىر سالتىنا تارتۋ، بۇقارالىق سپورتتى دامىتۋ ماقساتىندا 82 500-دەن استام ادامدى قامتىعان 550 سپورتتىق شارا ۇيىمداستىرىلدى. سپورتپەن تۇراقتى شۇعىلدانۋشىلار سانى جالپى وبلىس تۇرعىندارىنىڭ 34،2 پايىزىن قۇرايدى. بۇل – 226 589 ادام. ەندى  مۇنىمەن شەكتەلىپ قالماي، بارلىق سپورتتىق نىسانداردا تۇرعىندارعا بۇدان دا قولايلى جاعداي تۋعىزۋ قاجەت. بۇقارالىق سپورتتى حالىققا بارىنشا قولجەتىمدى بولۋى كەرەك» دەپ ەسەپتەيدى ماحامبەت دوسمۇحامبەتوۆ.

باسسەين ديرەكتورى جالعاس وتەباليەۆتىڭ پىكىرىنشە، جۋىردا مۇندا كەلەتىن بالالاردىڭ سانىن سپورتتىق سەكتسيالاردى جان باسىنا قارجىلاندىرۋ بويىنشا ارتتىرۋ كوزدەلگەن. وسىلايشا، 370 بالا سۋ ايدىنىنا تەگىن ءتۇسۋ مۇمكىندىگىنە يە بولادى. بالالارعا ساپالى ءدارىس بەرۋ ماقساتىندا باسقا قالالاردان بىلىكتى جاتتىقتىرۋشىلار شاقىرتىلعان.

«كەشەندە ءجۇزۋ، سۋ دوبى، ترياتلون، سۋعا سەكىرۋ سەكىلدى سپورت تۇرلەرىنە نازار اۋدارىلىپ وتىر. ءجۇزۋ سپورتى بويىنشا جاسوسپىرىمدەر كومانداسى ماۋسىم ايىندا شىمكەنت قالاسىندا وتكەن قازاقستان چەمپيوناتىندا 11 التىن، 3 كۇمىس مەدالمەن جالپى كوماندالىق ەسەپتە ءبىرىنشى ورىندى يەلەندى. ترياتلونشى نارتاي قازيەۆ اقمولا وبلىسىندا وتكەن ازيا چەمپيوناتىندا 1 كۇمىس، 1 قولا جۇلدەگە يە بولدى. ال، سۋ دوبىنان وبلىس قۇراماسى رەسپۋبليكا چەمپيوناتىنىڭ بىرنەشە دۇركىن جەڭىمپازى مەن جۇلدەگەرى اتاندى» دەپ سۋ سپورتىنا قاتىسۋشىلاردىڭ جەتىستىگىمەن ءبولىستى جالعاس وتەباليەۆ. 

سوڭعى جاڭالىقتار

جەردى سۇيگەندى ەلى دە سۇيەدى

ايماقتار • بۇگىن، 23:16

ەلوردا كۇنىنە تارتۋ

تەاتر • بۇگىن، 23:15

جالعىز قولدى شەبەر

ونەر • بۇگىن، 23:13

ۇقساس جاڭالىقتار