تەك وتكەن تاۋلىكتە كوروناۆيرۋسقا قاتىستى 416 جاعداي تىركەلدى. بۇل بيىلعى ەڭ جوعارى رەكوردتىق كورسەتكىش. مۇنىڭ سەبەبىن ماماندار دەلتا شتامىنىڭ تەز تاراۋىمەن بايلانىستىرادى.
تۇرعىندار دا قاۋىپسىزدىك ەرەجەلەرىن ەلەمەي, ۆيرۋستىڭ كۇش الۋىنا اسەر ەتكەن. بۇگىندە ءوڭىردىڭ ينفەكتسيالىق اۋرۋحانالارىندا مىڭنان استام ادام, ال جانساقتاۋ بولىمشەلەرىندە 105 ناۋقاس جاتىر. سونىمەن قاتار ىندەتتىڭ ىلمەگىنە ىلىككەن 463 بالا مەن 134 جۇكتى ايەلدىڭ دەنساۋلىعى دارىگەرلەردىڭ ءجىتى باقىلاۋىنا الىنعان.
«ينفەكتسيالىق كەرەۋەتتەردىڭ جۇكتەمەسى قازىرگى تاڭدا وبلىس بويىنشا 55 پايىزدى قۇراپ وتىر. رەانيماتسيالىق كەرەۋەتتەر جۇكتەمەسى – 49,5 پايىز. 1 تامىزدان باستاپ 63 ءولىم جاعدايى تىركەلگەن بولاتىن. ونىڭ ىشىندە, كوروناۆيرۋس ينفەكتسياسىنان 51 ناۋقاس جانە دە كوۆيدتىك پنەۆمونيادان 12 ناۋقاس كوز جۇمدى», دەيدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ءىزباساروۆ.
ەسكە سالايىق, «قىزىل ايماقتاعى» وڭىرلەردە كوپشىلىككە ارنالعان ءىس-شارالار وتكىزۋگە رۇقسات جوق.
