سەناتور سونداي-اق مال ازىعىن دايىنداۋ جانە اۋىل شارۋاشىلىعى داقىلدارى ەگىنىنىڭ جاي-كۇيى ماسەلەلەرى جونىندەگى جەدەل شتابتىڭ وتىرىسىنا قاتىستى. دەپۋتات ءوز سوزىندە بيىلعى اۋا رايىنىڭ قولايسىزدىعىنا بايلانىستى الداعى قىسقا جەمشوپ دايىنداۋ ماسەلەسى وتە وزەكتى ەكەنىن اتاپ ءوتتى.
«قىسقا مال ازىعىن دايارلاۋ ءۇشىن اۋدان حالقىن قاجەتتى جەم-شوپپەن قامتاماسىز ەتۋ ماڭىزدى. اۋىل تۇرعىندارىنا ەگىن جيناۋ ناۋقانىندا ساتتىلىك تىلەيمىن!», دەدى نۇرلان بەكەنوۆ.
ول بىلتىر كۇردەلى جوندەۋ جۇمىستارى جۇرگىزىلگەن اۋداندىق اۋرۋحاناعا ارنايى باردى. دارىگەرلەرمەن كەزدەسۋدە حالىققا مەديتسينالىق كومەك كورسەتۋ, تەگىن دارىلىك پرەپاراتتارمەن قامتاماسىز ەتۋ جانە اۋداندا كوروناۆيرۋستىق ينفەكتسياعا قارسى ۆاكتسينالاۋ ماسەلەلەرى تالقىلاندى.
دەپۋتات استراحانكا اۋىلىندا جاقىندا سالىنعان دەنە شىنىقتىرۋ-ساۋىقتىرۋ كەشەنىنىڭ قىزمەتىمەن دە تانىستى. بۇل كوپبەيىندى نىساندا فۋتبول, باسكەتبول, ۆولەيبول الاڭدارى, جاتتىعۋ زالى مەن ءجۇزۋ باسسەينى بار. نۇرلان بەكەنوۆ اۋىلدا وسىنداي ورتالىقتاردىڭ اشىلۋى جانە ونىڭ جەرگىلىكتى حالىققا قولجەتىمدى بولۋى اسا ماڭىزدى ەكەنىن اتاپ ءوتتى.
«مەملەكەت باسشىسىنىڭ تاپسىرماسىنا سايكەس ەلىمىزدە بۇقارالىق سپورتتى دامىتۋعا باسا ءمان بەرىلىپ وتىر. وسى باعىتتا اۋدانداردا جاڭا سپورت نىساندارىن سالۋ, جۇمىس ىستەپ تۇرعان ورتالىقتاردىڭ ماتەريالدىق بازاسىن جاقسارتۋ, ونىڭ ىشىندە قازىرگى زامانعى سپورتتىق بۇيىمدار الۋدىڭ ماڭىزى زور», دەدى سەناتور.
