وبلىستىق جاستار ساياساتى ماسەلەلەرى جونىندەگى باسقارمانىڭ مالىمەتىنە قاراعاندا, بۇگىندە «جاسىل ەل» جاساقتارىنىڭ قۇرامىندا جوعارى وقۋ ورنىنىڭ 217 ستۋدەنتى, كاسىپتىك تەحنيكالىق ءبىلىم بەرۋ ورتالىقتارىنىڭ 304 ستۋدەنتى, 245 مەكتەپ وقۋشىسى, 178 جۇمىسسىز جاس بار ەكەن. ال بيىل شتاب جۇمىسىن ۇيلەستىرۋگە جەرگىلىكتى بيۋدجەتتەن 151,6 ملن تەڭگەگە جۋىق قارجى بولىنگەن بولاتىن.
سونىمەن وتكەن ءبىر اي ىشىندە وبلىس بويىنشا جاستار «جاسىل باق – تازا قالا», «تازا وزەن – تازا جاعالاۋ», «جايقالسىن جاس تەرەك», «ەكودەسانت» اكتسيالارىن وتكىزىپ, ەكولوگيالىق تازارتۋ شارالارىن اتقارسا, «ارمىسىڭ, ارداگەر», «ۇلكەنگە قۇرمەت – كىشىگە مىندەت» اتتى قامقورلىق اكتسيالارى كەزىندە قارتتارعا جادەم كورسەتتى. جالپى, شىلدە ايىندا جاستاردىڭ قاتىسۋىمەن وبلىس بويىنشا 156 كم ارىق تازارتىلىپ, 301 گا جەردىڭ ءشوبى شابىلعان, 176 گا جەر قالدىقتان تازارتىلىپ, قوقىسى شىعارىلعان.
قوقىس دەمەكشى, جاقىندا تالدىقورعان قالاسىنداعى «اۆانگارد» باستاۋىش پارتيا ۇيىم توراعاسى عازيز امانجول ۇلى قالدىقتى سۇرىپتاپ, قايتا وڭدەۋگە قاتىستى باستاما كوتەردى. «نۇروتاندىق» جاس بەلسەندى ءوزى تۇراتىن كوپقاباتتى ءۇي تۇرعىندارىن باستاماعا قوسىلۋعا شاقىرىپ, تسەللوفان, قاعاز, مەتالل, تۇرمىستىق قالدىقتار جانە پلاستيك بۇيىمدارىن اۋلاداعى قوقىس بوشكەسىنە بولەك سۇرىپتاپ, سالۋدى باستادى. جانە بۇكىل قالا تۇرعىندارىن ءوزىنىڭ ىسىنەن ۇلگى الۋعا شاقىرادى. ەسەسىنە, سۇرىپتالعان قوقىس-شيكىزاتتى قابىلداپ الۋشى كومپانيالارعا وتكىزىپ, تۇسكەن قارجىنى قايىرىمدىلىق قورلارىنا وتكىزۋگە بولادى ەكەن.
«وكىنىشكە قاراي, ادامداردىڭ قوقىستى سۇرىپتاۋ مادەنيەتى ءالى دە شىندىقتان الشاقتاۋ بولىپ تۇر, كەرىسىنشە قوقىستى تسەللوفانعا سالىپ تاستاي سالۋ نەمەسە جولدا كەتىپ بارىپ, كەز كەلگەن جەرگە لاقتىرا سالۋ سىندى جاعدايلار كوپ كەزدەسەدى. ال ءبىز «تازا بولسا تابيعات – امان بولار ادامزات» دەگەن ۇراندى ۇستاي كەلە, ادامزات بالاسىن تابيعاتتى تازا ۇستاۋ ارقايسىمىزدىڭ مىندەتىمىز دەپ ەسەپتەيمىز, سول ءۇشىن ءوزىمىز ءبىرىنشى بولىپ ۇلگى كورسەتۋىمىز كەرەك», دەيدى Nur Otan پارتياسى تالدىقورعان قالالىق فيليالى «اۆانگارد» باستاۋىش ۇيىمىنىڭ باسشىسى عازيز امانجول ۇلى.
ايتپاقشى, ايماقتا ستۋدەنتتىك قۇرىلىس جاساقتارىنىڭ قىزمەتى قايتا جاندانا باستادى. بۇگىندە وبلىس كولەمىندەگى قۇرىلىس جۇمىستارىندا وسىنداي وترياد قۇرامىنداعى 211 جاس جۇمىس ىستەپ جۇرگەن كورىنەدى. سونداي-اق وبلىس اۋماعىنداعى قۇرىلىستىڭ جاندانۋى قاجەتتى ماتەريالداردى وندىرۋگە دەگەن قۇلشىنىستى وياتىپ وتىر.
مىسالعا, بيىل جەتىسۋلىق 28 جاستاعى جاس كاسىپكەر ءۇي سالۋعا قاجەتتى گازدى بلوكتار شىعاراتىن ەكىنشى شاعىن زاۋىتىن اشتى. ىسكەر ازامات ەرمەك سۇڭقاربەك ۇلى العاشقى زاۋىتتى وتكەن جىلى تالعار اۋدانىندا ىسكە قوسقان ەكەن. 3 گەكتار اۋماقتا وندىرىستىك تسەح, قويما جايلارى, ۇڭعىما, ونىمدەر ساتىلاتىن شاعىن دۇكەن ورنالاسقان. ونىمگە سۇرانىس ارتىپ, كورشىلەس اۋدانداردان تاپسىرىس تۇسە باستاعان. سوندىقتان كاسىپكەر ەكىنشى تسەحتى ىسكە قوسىپتى. ول وسى جىلدىڭ مامىر ايىندا بورالداي اۋىلىندا اشىلدى. جالپى اۋدانى 1 گەكتار بولاتىن جەرگە قاجەتتى قوندىرعىلارىن ورنالالاستىردى. بۇگىندە كۇن سايىن زاۋىتتاردا 50 شارشى مەتردەن استام تاس توسەنىشتەر, 240 دانا گازدى بلوك جانە 1200 پريتورلىق بلوك شىعارىلۋدا. ەرمەكتىڭ ەكى كاسىپورىندا بارلىعى 17 ادام جۇمىس ىستەيدى ەكەن.
