بۇگىن ۆيتسە-مينيستر ەرالى توعجانوۆتىڭ قاتىسۋىمەن وتكەن ۇكىمەت كەڭەسىندە بۇقارالىق جانە بالالار سپورتىنىڭ ماسەلەسى قارالدى. قازاقستاندىقتاردىڭ 31% عانا بۇقارالىق سپورتپەن اينالىسادى. پرەزيدەنت تاپسىرماسىنا سايكەس بۇل كورسەتكىشتى جىل سوڭىنا دەيىن 35% جەتكىزۋ قاجەت.
وسى ماقساتتا سپورت نىساندارىن كەرەك-جاراقپەن تولىق جابدىقتاپ, سپورت زالداردىڭ جۇكتەمەسىن ارتتىرۋ مىندەتى تۇر. ماماندىرىلعان سپورت مەكتەپتەرى وقىتۋشىلارىنىڭ جالاقىسىن الداعى ەكى جىلدىڭ ىشىندە ەكى ەسە كوتەرۋ كەرەك. سونداي-اق كاسىبي سپورتشىلاردى, ونىڭ ىشىندە ۇلتتىق قۇراما كوماندالارىن دايارلاۋ تاسىلدەرى قايتا قارالادى.
سپورت پسيحولوگتارى, بيومەحانيكتەر, بيوحيميكتەر, ديەتولوگتار سىندى ماماندار تاپشىلىعى تاعى بار. بۇل ماسەلەنى شەشۋ بويىنشا مادەنيەت جانە سپورت مينيسترلىگىنە ارنايى باعدارلاما ازىرلەۋ تاپسىرىلدى. سونىمەن بىرگە ۆەدومستۆوعا 2025 جىلعا دەيىن قابىلدانعان دەنە شىنىقتىرۋ مەن بۇقارالىق سپورتتى دامىتۋ جونىندەگى كەشەندى جوسپاردى قايتا قاراۋعا مىندەتتەلدى.
