الماتى وبلىسى ءبىلىم باسقارماسىنىڭ «الماتى وبلىستىق №1 بالالار ءۇي» كمم ديرەكتورى مەن قىزمەتكەرىنە قاتىستى سوتقا دەيىنگى تەرگەۋ اياقتالدى.
تەرگەۋ بارىسىندا بالالار ءۇيىنىڭ الەۋمەتتىك پەداگوگى مۇستافينا قىزمەت بابىن پايدالانىپ, وزىنە سەنىپ تاپسىرىلعان 67 ميلليون تەڭگە سوماسىنداعى اقشالاي جاردەماقىنى ۇرلاعانى دالەلدەندى.
«سوتتالعان مۇستافينا بالالار ءۇيىنىڭ جەتەكشىسىنەن قامقورشىنىڭ مۇددەسىن بىلدىرۋگە سەنىمحاتى بولا وتىرىپ, تاربيەلەنۋشىلەرگە اسىراۋشىسىنان ايرىلۋى جانە مۇگەدەكتىگى بويىنشا جاردەماقى رەسىمدەپ, ەكىنشى دەڭگەيدەگى بانكتەردە ولارعا كارتوچكالىق شوتتار اشتى. تاربيەلەنۋشىلەردىڭ ەسەپ ايىرىسۋ شوتتارىنا تولىق قولجەتىمدىلىككە يە بولا وتىرىپ, ءموبيلدى بانكينگ ارقىلى بالالار ءۇيىنىڭ تاربيەلەنۋشىلەرىنىڭ ەسەپ ايىرىسۋ شوتتارىنان جەكە كارتوچكالىق شوتقا اقشا قاراجاتىن اۋدارۋدى جۇزەگە اسىردى. سونداي-اق تاربيەلەنۋشىلەردىڭ وزدەرىنىڭ بانك كارتالارىن پايدالانا وتىرىپ, بانكوماتتاردان كەيبىر قاراجاتتى الىپ تاستادى», دەپ حابارلادى قر ققا ءباسپاسوز قىزمەتى.
سوتتالۋشى زاڭسىز ىسپەن 2015 جىلدىڭ جەلتوقسانىنان 2020 جىلدىڭ تامىزىنا دەيىن اينالىسقان.
بالالار ءۇيىنىڭ ديرەكتورى قوندىباەۆا 2018 جىلدىڭ كۇزىندە مۇستافينانىڭ ۇرلىق فاكتىلەرى تۋرالى ءبىلىپ, ونى ۋاكىلەتتى ورگانداردان جاسىرىپ, تاربيەلەنۋشىلەرىنىڭ شوتتارىنا قول جەتكىزۋىن شەكتەمەدى.
سوتتالۋشىلار ءوز كىناسىن مويىندادى. قازىرگى ۋاقىتتا 10 ميلليون تەڭگەدەن استام مولشەردەگى زياننىڭ ءبىر بولىگى بالالار ءۇيى تاربيەلەنۋشىلەرىنىڭ پايداسىنا وتەلدى. سوت 52,4 ميلليون تەڭگە كولەمىندەگى قالعان سومانى جابىرلەنۋشىلەرگە قالپىنا كەلتىرۋدى مىندەتتەدى.
سوت ۇكىمىمەن مۇستافينا 7 جىل باس بوستاندىعىنان ايىرۋ جانە پەداگوگيكالىق قىزمەتپەن اينالىسۋ قۇقىعىنان 10 جىل مەرزىمگە ايىرا وتىرىپ, قر قك 189-بابى (اسا ءىرى مولشەردە سەنىپ تاپسىرىلعان بوتەن م ۇلىكتى يەمدەنۋ نەمەسە ىسىراپ ەتۋ) بويىنشا كىنالى دەپ تانىلدى.
قوندىباەۆا قر قك 371-بابى (نەمقۇرايلىلىق) بويىنشا 2,7 ميلليون تەڭگە سوماسىنا ايىپپۇل تاعايىنداۋمەن جانە مەملەكەتتىك قىزمەتتە قىزمەت اتقارۋ قۇقىعىنان ايىرۋمەن كىنالى دەپ تانىلدى.
