ەكونوميكا • 12 تامىز، 2021

ستارتاپشىلاردى قارجىلاندىرۋعا كىرىستى

Astana Hub IT-ونىمدەرىن شىعارۋمەن اينالىساتىن باسەكەگە قابىلەتتى قازاقستاننىڭ، تمد-نىڭ جانە بۇكىل الەمنىڭ ستارتاپشىلارىنا ارناپ، Seed Money باعدارلاماسىن ىسكە قوستى. سوعان سايكەس، تىڭ جوبالاردىڭ اۆتورلارىنا 47 مىڭ دوللار نەمەسە 20 ملن تەڭگەگە دەيىن قاراجات الۋدىڭ مۇمكىندىگى تۋىپ وتىر.

جاقسىلىق ساعادات

بۇل قاراجاتتى يەلەنۋ ءۇشىن ۇمىتكەرلەرگە كونكۋرستىق ىرىكتەۋدەن ءوتىپ، Astana Hub قاتىسۋشىسىنا اينالۋ قاجەت. شەتەلدىك جوبالاردىڭ اۆتورلارىنا وسى سىنعا ءتۇسۋ ءۇشىن ەلىمىزدىڭ استاناسىنا ۋاقىتشا قونىس اۋدارۋعا تۋرا كەلەدى.

Seed Money-دان بولەك، ۇمىتكەرلەر اكسەلەراتسيانىڭ قاتىسۋشىلار رەتىندە كەڭ اۋقىمدى قولداۋمەن قامتىلادى. اتاپ ايتقاندا، IT-جوبا اۆتورلارىنا تەگىن جۇمىس كەڭىستىگى، وقىتۋ جانە تالىمگەرلىك كۋرستارى ۇسىنىلىپ، 500 IT-كومپانيادان تۇراتىن ينۆەستورلار مەن سالالىق قاۋىمداستىق وكىلدەرىمەن بايلانىس ورناتۋمەن بىرگە سالىقتىق جانە ۆيزالىق پرەفەرەنتسيالار، سونداي-اق PR باعىتتا قولداۋ مۇمكىندىگى بەرىلەدى.

Astana Hub-تان قارجىلاندىرۋ تەتىگىنە قول جەتكىزۋ ءۇشىن ىرىكتەۋدىڭ 6 كەزەڭىنەن ءوتۋ شارت. وعان ءوتىنىم بەرۋ جانە ونى تەكسەرىپ قاراۋ، ءوتىنىمدى سارالاۋ، پرەزەنتاتسياعا جوبالاردى ىرىكتەۋ، پيتچ-پرەزەنتاتسيا، كوميسسيانىڭ شەشىمى جانە سوڭىندا ۇمىتكەرلەرمەن شارت جاساسۋ كىرەدى. جەڭىمپازدار ءۇش جىل كولەمىندە ءوز تابىستارىنان قوسىمشا 1%-دى Astana Hub-تىڭ ەنشىسىنە اۋدارۋعا، سونداي-اق باسقا ستارتاپتاردى دامىتۋعا كومەكتەسۋگە مىندەتتى بولادى.

تاۋەلسىز ساراپشىلاردان جاساقتالعان كوميسسيا MVP، Product-Market Fit جانە Scale سىندى بىرنەشە كەزەڭدە 35 ۇزدىك جوبانى ىرىكتەيدى. بۇل رەتتە IT سالاسىنا قاتىستى كەز كەلگەن تەحنولوگيالىق جانە يننوۆاتسيالىق جاڭا جوبا Astana Hub باسىمدىق بەرگەن قىزمەت تۇرلەرىنە سايكەس كەلسە، اتالعان باعدارلاماعا قاتىسۋعا قۇقىلى.

ۇيىمداستىرۋشىلاردىڭ ايتۋىنشا، Seed Money باعدارلاماسى IT-ونىمدەرىنىڭ ەكسپورتىن ىنتالاندىرىپ، تاجىريبە الماسۋعا جانە ۇزدىك تاجىريبەلەردى ەنگىزۋدىڭ ناتيجەسىندە جەرگىلىكتى كادرلاردى دامىتۋعا وڭ اسەرىن تيگىزەدى.

«قارجىلاندىرۋ revenue share (تابىستى ءبولۋ) مودەلى نەگىزىندە جۇزەگە اسىرىلادى. 3 جىل ىشىندە باعدارلاماعا قاتىسۋشى ءار توقسان سايىن تۇسكەن تابىستىڭ 1% مولشەرىندەگى قاراجاتتى تولەۋگە مىندەتتى. بۇل ءوز كەزەگىندە الداعى ستارتاپشىلاردىڭ جاڭا لەگىن قارجىلاندىرۋعا جول اشادى»، دەدى Astana Hub-تىڭ باس ديرەكتورى ماعجان ماديەۆ.

وتىنىمدەردى قابىلداۋ 2 تامىزدا باستالىپ، اياقتالۋ مەرزىمى ستارتاپتىڭ دامۋ ساتىسىنا بايلانىستى بولادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز