فوتو: Olympic.kz
دزيۋدوشى ەلدوس سمەتوۆ وليمپيادا ويىندارىنىڭ العاشقى كۇنىندە-اق قازاقستان قورجىنىنا مەدال سالدى.
سمەتوۆ 1992 جىلى تاراز قالاسىندا دۇنيەگە كەلگەن. ول 2015 جىلعى الەم چەمپيونى, 2010 جىلعى جاستار اراسىنداعى الەم چەمپيونى, 2016 جىلعى ازيا چەمپيونى, 2014 جىلعى ازيا ويىندارىنىڭ جەڭىمپازى. قر ەڭبەك سىڭىرگەن سپورت شەبەرى, حالىقارالىق سپورت شەبەرى.
توكيوداعى قولا - ەلدوس سمەتوۆتىڭ ەكىنشى وليمپيادا مەدالى. ءبىرىنشىسى سپورتشى ريودا جەڭىپ العان «كۇمىس» بولدى. جاپونيا وليمپياداسىندا ءۇشىنشى ورىن العانى ءۇشىن وعان Mersedes كولىگى سىيعا تارتىلدى.
اۋىر اتلەت يگور سون قازاقستان قورجىنىنا ەكىنشى «قولانى» سالدى.
سپورتشى 1998 جىلى الماتى وبلىسىندا دۇنيەگە كەلگەن. ول 2019 جىلعى اۋىر اتلەتيكادان الەم چەمپيوناتىنىڭ كۇمىس جۇلدەگەرى.
توكيو ويىندارى - ونىڭ مانسابىنداعى العاشقى وليمپيادا. جارىستان كەيىن يگور مۇنداي ناتيجەنى ءوزى دە كۇتپەگەنىن مويىندادى. ءۇشىنشى ورىن ءۇشىن اۋىر اتلەتيكا فەدەراتسياسى وعان Toyota Camry اۆتوكولىگىن ۋادە ەتتى.
ونىڭ ارتىنان اۋىر اتلەت زۋلفيا چينشانلو ءۇشىنشى مەدالدى جەڭىپ الدى.
28 جاستاعى اۋىر اتلەت قىتايدا تۋعان, 2007 جىلدان بەرى قازاقستان قۇراماسىندا وينايدى. 2012 جىلى لوندوندا وتكەن وليمپيادادا زۋلفيا التىن مەدال جەڭىپ الدى, بىراق 2016 جىلى سپورتشىنىڭ قانىنان تىيىم سالىنعان زات تابىلعانىنا بايلانىستى ماراپاتى قايتارىپ الىندى. دوپينگ داۋىنا بايلانىستى چينشانلو ريو وليمپياداسىنا قاتىسا المادى.
قازاقستاننىڭ اۋىر اتلەتيكا فەدەراتسياسى وعان دا Toyota Camry ماركالى اۆتوكولىگىن تابىستايتىنىن ايتتى.
ءتورتىنشى «قولانى» قازاقستان قۇراماسىنىڭ كاپيتانى قامشىبەك قوڭقاباەۆ جەڭىپ الدى.
بوكسشى 29 جاستا, قىزىلوردادا تۋعان. ول الەم چەمپيوناتىنىڭ ەكى دۇركىن كۇمىس جۇلدەگەرى (2017, 2019), ازيا چەمپيوناتىنىڭ ءۇش دۇركىن كۇمىس جۇلدەگەرى (2017, 2019, 2021), الەمدىك اسكەري ويىنداردىڭ كۇمىس جۇلدەگەرى (2015), الەم اسكەري قىزمەتكەرلەرى اراسىندا چەمپيون (2014), بولگاريادا وتكەن حالىقارالىق ءتۋرنيردىڭ جەڭىمپازى (2015), قازاقستان رەسپۋبليكاسى سپارتاكياداسىنىڭ چەمپيونى (2015), اۋەسقويلار اراسىنداعى ەل چەمپيوناتىنىڭ چەمپيونى جانە جۇلدەگەرى.
پرەزيدەنت قاسىم-جومارت توقاەۆ قازاقستان تۋىن قوڭقاباەۆقا سەنىپ تاپسىردى.
«تۋ - ءبىز, وليمپياداشىلار, ءۇشىن قاسيەتتى سيمۆول. ونى توكيودا مۇمكىندىگىنشە ءجيى كوتەرىپ تۇرۋ ءۇشىن بارلىعىن جاسايمىز, سوندا ءبىزدىڭ ءانۇرانىمىز وينالادى», دەپ ۋادە ەتتى قامشىبەك مەملەكەت باسشىسىمەن كەزدەسۋدە.
وكىنىشكە قاراي, ەل ءانۇرانى جاپونيادا شىرقالمادى. بىراق قازاقستاندىقتار جۇلدەلى ورىننان كورىنە الدى. سولاردىڭ ءبىرى قوڭقاباەۆ ەدى. بۇل ءۇشىن بوكس فەدەراتسياسى وعان 50 000 دوللار سىياقى بەرەدى. جالپى, مەملەكەتتىڭ سىياقىمەن (75 مىڭ دوللار) بىرگە بوكسشىنىڭ ەسەبىندە 125 مىڭ دوللار بولادى.
كەلەسى مەدال دا بوكسشىعا تيەسىلى. ساكەن بيبوسىنوۆ وزبەكستاندا تۋعان, 13 جاسىندا قازاقستانعا كوشىپ كەلگەن. ول 2019 جىلعى الەم چەمپيوناتىنىڭ قولا جۇلدەگەرى, قازاقستاننىڭ ەڭبەك سىڭىرگەن سپورت شەبەرى.
تۇركىستان اۋەجايىندا ءبىر توپ كاسىپكەرلەر بيبوسىنوۆقا Toyota كولىگىن سىيلادى. قوناقتار اراسىندا تۇركىستان وبلىسىنىڭ اكىمى ومىرزاق شوكەەۆ تە بولدى.
سونىمەن قاتار, بيبوسىنوۆ بوكس فەدەراتسياسىنان 50 مىڭ دوللار الۋعا قۇقىلى.
ەركىن كۇرەسشى نۇريسلام ساناەۆ قازاقستاننىڭ التىنشى جۇلدەگەرى اتاندى.
سپورتشى 1991 جىلى تۋۆادا دۇنيەگە كەلگەن. ول قازاقستان قۇراماسىندا 2014 جىلى ويناي باستادى. ەكى جىلدان كەيىن ول يسلام ءدىنىن قابىلداپ, اتى مەن تەگىن اۋىستىردى (تۋعان كەزدەگى اتى - ارتاس ساناا). ساناەۆ - 2018 جىلعى الەم چەمپيوناتىنىڭ كۇمىس جۇلدەگەرى, 2019 جىلعى الەم چەمپيوناتىنىڭ قولا جۇلدەگەرى, ازيا چەمپيونى.
توكيوداعى وليمپيادا ويىندارى ساناەۆ ءۇشىن ءبىرىنشى ويىن ەمەس. الدىڭعى وليمپيادادا بالۋان 12-ورىنعا عانا يە بولدى.
نۇريسلام ساناەۆ 9 تامىزدا قازاقستانعا ورالدى. الماتى اۋەجايىندا وعان BMW كىلتى تابىستالدى.
تاعى ءبىر «قولانى» قازاقستاننىڭ قورجىنىنا كاراتەشى دارحان ءاسادىلوۆ سالدى.
33 جاستاعى سپورتشى شىمكەنت قالاسىنىڭ تۋماسى. ول اينالىساتىن سپورت ءتورت جىل بۇرىن وليمپيادا باعدارلاماسىنا ەندى, سوندىقتان بۇل - دارحان ءۇشىن ءبىرىنشى وليمپيادا. ءاسادىلوۆ 60 كەلىگە دەيىنگى سالماق دارەجەسىندە الەمدىك رەيتينگتە كوش باستاپ تۇر. جانكۇيەرلەر ونى «التىن» الادى دەپ كۇتكەن. «قولا» العاننان كەيىن كاراتەشى ولاردان كەشىرىم سۇرادى.
وليمپيادانىڭ سوڭعى كۇنىندە كاراتەشى سوفيا بەرۋلتسەۆا سەگىزىنشى «قولانى» جەڭىپ الدى.
ول 2000 جىلى شىمكەنت قالاسىندا دۇنيەگە كەلگەن. توكيودا ەل نامىسىن قورعاعان ەڭ جاس سپورتشىلاردىڭ ءبىرى. سوفيا وليمپيادا مەدالىن بىلتىر قايتىس بولعان كاراتەدەن قازاقستان ۇلتتىق قۇراماسىنىڭ بۇرىنعى جاتتىقتىرۋشىسى جاستالاپ ساناۋوۆقا ارنادى.
ءاسادىلوۆ پەن بەرۋلتسەۆا 9 تامىزدا تۋعان جەرگە ورالدى. جانكۇيەرلەر ولاردى جىلى قارسى الدى. بەلگىلى بولعانداي, دەمەۋشىلەر كاراتەشىلەرگە ەكى جاڭا كولىك سىيلادى. اسادىلوۆقا Toyota Camry اۆتوكولىگىنىڭ كىلتى, بەرۋلتسەۆاعا Toyota RAV4 كىلتى تابىستالدى.
