قازىرگى ۋاقىتتا اۋدانداعى «جاراسپاي» شارۋاشىلىعىندا ءشوپ شابۋ, جيناۋ جۇمىستارى قىزۋ ءجۇرىپ جاتىر. بۇگىنگە دەيىن 330 توننا ءشوپ دايىندالعان. شارۋاشىلىق باسشىلارى بيىل اۋىل تۇرعىندارىنىڭ جەم-شوپتەن تارىلمايتىنىن ايتادى. ويتكەنى اگروفيرما جىل سايىن 13,5 مىڭ گەكتار القاپتا ءداندى داقىلدار دايىنداپ, ولاردى ءتورت بىردەي استىق قويماسىندا ساقتايدى. تەحنيكانىڭ جوندەمدى بولعانىنا دا باسا ماڭىز بەرىلەدى: شارۋاشىلىقتا ماشينا-تراكتور پاركى ۇنەمى جاڭارتىلىپ وتىرادى.
جالپى العاندا, بيىل نۇرا اۋدانى بويىنشا 156 مىڭ توننا ءشوپ دايىندالعان. ال جوسپارداعى مەجە – 200 مىڭ توننا. اۋداندا ءشوپ دايىنداۋ جۇمىستارىن 20 تامىزعا دەيىن اياقتاۋ جوسپارلانعان.
ءشوپ شابۋ ناۋقانىنا اۋدانداعى «پرجەۆالسكوە» جشس دە ۇلكەن دايىندىقپەن كەلدى. جۇمىستى ۇيىمداستىرا ءبىلۋدىڭ جانە دەر كەزىندە قابىلدانعان شارالاردىڭ ارقاسىندا شارۋاشىلىق 900 توننا ءشوپ دايىندادى. ەگىس دالاسىنداعى جاعداي دا جامان ەمەس.
ەگىس دەمەكشى, بيىلعى قۋاڭشىلىققا قاراماستان, «قاينار» جشس القاپتارىنداعى ەگىننىڭ ءبىتىمى جامان ەمەس. شارۋاشىلىق ديرەكتورى سەيىتجاپار نىعمەتوۆ مۇنىڭ مينەرالدى تىڭايتقىشتاردى قولدانۋ مەن جوعارى ءونىمدى تۇقىمداردى پايدالانۋدىڭ ارقاسىندا مۇمكىن بولعانىن ايتادى. وسى جىلى كومپانيا التى استىق جينايتىن كومباين مەن سونشا جەم-ءشوپ جينايتىن دەستەلەگىشتەر, سوقالار ساتىپ الدى. اگرارشىلار ەگىن وتكەن جىلدىڭ دەڭگەيىنەن تومەن بولمايدى دەگەن ءۇمىتتىڭ ۇستىندە وتىر.
اۋدانداعى ەگىننىڭ بىتىك شىعۋىنا گريگوري پروكوپ جەتەكشىلىك ەتەتىن «شاحتەرسكوە» ەليتالىق تۇقىم ءوسىرۋ شارۋاشىلىعى سۇبەلى ۇلەس قوسىپ كەلەدى. قازىرگى ۋاقىتتا كاسىپورىننىڭ كۇشىمەن 15 مىڭ تونناعا ارنالعان قوسىمشا ساقتاۋ سىيىمدىلىقتارىنىڭ قۇرىلىسى ءجۇرىپ جاتىر. بۇگىندە شارۋاشىلىق يەلىگىندە 12 استىق جانە التى كارتوپ قويماسى جۇمىس ىستەپ تۇر. جىل باسىنان بەرى شارۋاشىلىقتى دامىتۋعا سالىنعان قاراجاتتىڭ جالپى سوماسى 2 ملرد تەڭگەدەن اسقان. بۇدان بولەك, اگرارلىق كاسىپورىن تەحنيكا تۇرلەرىن دە جىل سايىن جاڭارتىپ وتىرادى. مىسالى, وسىدان ءبىر اي بۇرىن ءداندى داقىلداردى ۋاقتىلى جيناۋ ءۇشىن وتاندىق وندىرىستەگى 8 استىق جينايتىن كومباين ساتىپ الىندى.
جالپى, نۇرا اۋدانى بويىنشا ەگىن وراعىنا 15 تامىزدا ءتۇسۋ, ال جاپپاي ەگىن جيناۋعا 1 قىركۇيەكتەن باستاپ كىرىسۋ جوسپارلانعان.
قاراعاندى وبلىسى,
نۇرا اۋدانى
