وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ مالىمەتىنشە, التىن تولەگەنوۆا ماۋسىم ايىنىڭ باسىندا يندەر اۋداندىق اۋرۋحاناسىنا جاتقىزىلعان. جاعدايى ناشارلاعان سوڭ اتىراۋ قالاسىنداعى مودۋلدىك اۋرۋحانانىڭ جانساقتاۋ بولىمىنە اۋىستىرىلىپتى.
«جانساقتاۋ بولىمىندە كەلگەندە ەكى جاقتى پنەۆمونيا, وكپەنىڭ 96% قابىنۋى دەگەن دياگنوز قويىلدى. ءبىر اي بويى وكپەنى جاساندى جەلدەتۋ اپپاراتىنا قوسۋلى جاتتىم. دارىگەرلەردىڭ كۇش-جىگەرىنىڭ ناتيجەسىندە قاۋىپتى ۆيرۋستان امان قالدىم. مەنى بەيىندى بولىمشەنىڭ پالاتاسىنا اۋىستىرىپ, ەمدەلۋدى جالعاستىردىم» دەيدى التىن تولەگەنوۆا.
بۇگىن, 10 تامىزدا ول مودۋلدىك اۋرۋحانانىڭ ينفەكتسيالىق ستاتسيونارىنان شىعارىلدى. ەندى ءۇش اي بويى تۇرعىلىقتى مەكەن-جايى بويىنشا دارىگەرلەردىڭ باقىلاۋىندا بولادى. سونداي-اق, ارنايى وڭالتۋدان وتەدى.
«مەن 10 كۇن بويى وتتەگى كونتسەنتراتورىنىڭ كومەگىمەن دەم الامىن. سودان كەيىن دارىگەرلەردىڭ باقىلاۋىمەن وكپەنىڭ جۇمىسىن قالپىنا كەلتىرەمىن. وسى ورايدا ەمدەلۋ كەزىندە دارىگەرلەرگە كورسەتكەن قامقورلىعى مەن جىلى ءسوزى ءۇشىن العىسىمدى بىلدىرگىم كەلەدى. ال, تۇرعىنداردان تۋعان-تۋىستارىڭىز بەن جاقىندارىڭىزدىڭ قاۋىپسىزدىگى ءۇشىن بەتپەردە كيىپ, ادامدار كوپ جينالاتىن ورىندارعا بارماۋدى سۇرايمىن» دەيدى التىن تولەگەنوۆا.
