وبلىستىق پوليتسيا دەپارتامەنتى ءباسپاسوز قىزمەتىنىڭ اقپاراتىنا قاراعاندا, 26 جاستاعى جىگىت تارتىپ العان سومكەدە 60 مىڭ تەڭگە بولعان.
«جابىرلەنۋشى ايەل مەن كۇدىكتى جىگىت «ۆوكزال ماڭى» شاعىن اۋدانىنان بىرىگىپ تاكسي جالداعان. ەكەۋى ءبىر تاكسيمەن «نۇرسايا» شاعىن اۋدانىنا كەلگەن. كولىكتەن تۇسكەن سوڭ كۇدىكتى 45 جاستاعى ايەلدىڭ سومكەسىن تارتىپ الىپ, تەلەفونىن سىندىرعان. سومكەنىڭ ىشىندە 60 مىڭ تەڭگە بولعانى انىقتالدى. مەيرامحانالاردىڭ ءبىرىنىڭ كامەراسىنا كۇدىكتىنىڭ ايەلدى جەرگە جىعىپ, سومكەسىن تارتىپ العان ءساتى ءتۇسىپ قالعان» دەپ حابارلادى دەپارتامەنتتىڭ ءباسپاسوز قىزمەتى.
قازىر 26 جاستاعى كۇدىكتى جىگىت ۇستالدى. وعان قاتىستى قر قىلمىستىق كودەكسىنىڭ 191-بابىنىڭ 2-بولىگى, 1-تارماعىمەن سوتقا دەيىنگى تەرگەۋ باستالدى.
