كوميتەت ۇسىنعان مالىمەت بويىنشا, اتالعان تالاپتىڭ ەۋرازيالىق ەكونوميكالىق وداققا مۇشە ەلدەردىڭ مەملەكەتتىك ءنومىرى بار كولىكتەرگە قاتىسى جوق.
«قازاقستان ازاماتتارىنا ەۋرازيالىق ەكونوميكالىق وداق اۋماعىندا بەلارۋس رەسپۋبليكاسى مەن رەسەي فەدەراتسياسىنىڭ كولىك قۇرالدارىمەن ۋاقىتشا اكەلۋ مەرزىمدەرىن ەسەپكە الماستان جۇرۋگە بولادى. ال ارمەنيا رەسپۋبليكاسى مەن قىرعىز رەسپۋبليكاسىنىڭ كولىك قۇرالدارىمەن سەنىمحات بويىنشا باسقارۋ قۇقىعىنسىز جۇرە الادى», دەپ جازىلعان كوميتەتتىڭ تۇسىندىرمەسىندە.
شەتەلدىك كولىك قۇرالدارىن اكەتۋ تۋرالى تالاپ ەۋرازيالىق ەكونوميكالىق وداق ەلدەرىنىڭ بۇكىل اۋماعىنا قولدانىلادى. ياعني, شەتەلدىك كولىك ەۋرازيالىق ەكونوميكالىق وداق اۋماعىنان تىس اۋماققا شىعارىلۋى كەرەك.
«شەتەل ازاماتتارى ءوزىنىڭ تۇرعىلىقتى ەلىنە جانە كولىكتى اكەتەتىن ەلگە قايتارۋ ءۇشىن مەملەكەتتىك شەكارادان اتالمىش كولىكتى ءمىنىپ وتە الادى. ەگەر ول مۇمكىن بولماسا, تاسىمالداۋشىلاردىڭ قىزمەتىن پايدالانا الادى», دەپ جازادى كوميتەت ماماندارى.
وداق اۋماعىنا ءۇشىنشى ەلدەردەن اكەلىنگەن كولىكتى ءتيىستى كەدەندىك راسىمدەۋسىز ءبىر جىل عانا جۇرگىزۋگە رۇقسات بەرۋ تۋرالى شەشىمدى ەۋرازيالىق ەكونوميكالىق كەڭەس 2020 جىلعى 29 ساۋىردە شىعارعان بولاتىن. بۇل كەزدە پاندەميا ءورشىپ, شەكارالار جابىق بولعاندىقتان, مەرزىم 2021 جىلدىڭ 30 قىركۇيەگىنە دەيىن ۇزارتىلعان ەدى. بۇل مەرزىم بىتكەننەن كەيىن اكىمشىلىك پوليتسيا كوميتەتى مەن مەملەكەتتىك كىرىستەر كوميتەتىنىڭ قىزمەتكەرلەرى بىرلەسىپ ۋاقىتشا ءجۇرۋ مەرزىمى اياقتالعان كولىكتەردى ىزدەستىرەتىن بولادى. ونداي كولىكتەر تابىلعان جاعدايدا ايىپ تۇراعىنا قامالادى.
«ەۋرازيالىق ەكونوميكالىق وداقتىڭ قولدانىستاعى زاڭناماسى بويىنشا ۋاقىتشا اكەلۋ مەرزىمدەرى وتكەننەن كەيىن جەكە تۇلعادا كەدەندىك تولەمدەردى تولەۋ مىندەتتەرى تۋىندايدى. تولەمنىڭ مولشەرىن اۋماقتىق مەملەكەتتىك كىرىستەر ورگاندارىنىڭ قىزمەتكەرلەرى ەسەپتەيدى», دەپ جازىلعان كوميتەتتىڭ مالىمەتىندە.
